" If you fell down yesterday, stand up today."

200 மதிப்பெண் முறை ரத்து; பிளஸ்–2 தேர்வில் மதிப்பெண் 100 ஆக குறைக்கப்படுகிறது

Views - 61     Likes - 0     Liked


  • ஒவ்வொரு பாடத்திற்கும் வழங்கப்படும் 200 மதிப்பெண்ணை 100 ஆக குறைக்கவும், 40 மதிப்பெண்ணுக்கு ‘அப்ஜெக்டிவ்’ முறையில் கேள்விகள் கேட்கவும் முடிவு செய்யப்பட்டு உள்ளது.

    பாடத்திட்டம் மாற்றம்

    பிளஸ்–2, எஸ்.எஸ்.எல்.சி. தேர்வு ஆகியவற்றில் மாநில அளவில் மற்றும் மாவட்ட அளவில் ரேங்க் எடுக்கும் முறை இந்த வருடம் ரத்து செய்யப்பட்டது. இதன் காரணமாக மாணவர்களின் மன அழுத்தம் குறைந்தது.

    எஸ்.எஸ்.எல்.சி., பிளஸ்–2 தேர்வு ஆகியவை மட்டும் இதுவரை அரசு பொதுத்தேர்வாக இருந்து வந்தது.

    அண்மையில் நடந்த மருத்துவ படிப்பிற்கான ‘நீட்’ பொது நுழைவுத்தேர்வில் பிளஸ்–1 வகுப்பு பாடங்களில் இருந்து 50 சதவீத கேள்விகள் கேட்கப்பட்டன. ஆனால் பிளஸ்–1 பாடங்களை தமிழகத்தில் உள்ள தனியார் பள்ளிகள் பல சரியாக நடத்தவில்லை. அதன் காரணமாக பிளஸ்–1 தேர்வையும் அரசு பொதுத்தேர்வாக அரசு அறிவித்துள்ளது.

    இதேபோல் ‘நீட்’ தேர்வை எதிர்கொள்ளும் விதமாக அதற்கேற்ற முறையில் பிளஸ்–1, பிளஸ்–2 பாடத்திட்டத்தை மாற்றி அமைக்கவும் தமிழக அரசு முடிவு செய்து இருக்கிறது.

    எல்லாவற்றுக்கும் மேலாக பிளஸ்–2 தேர்வு முறையிலும் மாற்றம் கொண்டுவரப்படுகிறது. இது குறித்து பள்ளி கல்வித்துறை அதிகாரிகள் தமிழக அரசுக்கு பல்வேறு ஆலோசனைகளை கூறி வருகின்றனர்.

    அவை வருமாறு:–

    தேர்வு முறை மாறுகிறது

    தற்போது பிளஸ்–2 தேர்வு ஒரு தாளுக்கு 200 மதிப்பெண் என்ற அடிப்படையில் 6 தாள்களுக்கு நடத்தப்படுகிறது. அதில் 150 மதிப்பெண் எழுத்து தேர்வுக்கும், 50 மதிப்பெண் செய்முறை தேர்வுக்கும் நடத்தப்படுகிறது. இந்த தேர்வு இனிமேல் 200 மதிப்பெண்ணுக்கு பதிலாக 100 ஆக இருக்கும். செய்முறை தேர்வு 20 மதிப்பெண்ணுக்கும், எழுத்து தேர்வு 80 மதிப்பெண்ணுக்கும் நடத்த ஆலோசனை நடத்தப்படுகிறது.

    எழுத்து தேர்வில் 80 மதிப்பெண்களில் 40 மதிப்பெண்களுக்கு தேர்வு அப்ஜெக்டிவ் முறையிலும் நடத்த பரிசீலனை உள்ளது. அதாவது, அப்ஜெக்டிவ் முறையில் ஒரு கேள்வி கேட்கப்பட்டு அதற்கு ஒரு சரியான பதில் உள்பட 4 பதில்கள் இருக்கும்.

    நேரமும் குறைப்பு

    ஒவ்வொரு பாடத்திலும் மதிப்பெண் சரிபாதியாக குறைக்கப்படுவதால் பிளஸ்–2 தேர்வுகளில் தற்போதுள்ள மொத்த மதிப்பெண் 1,200 என்பது இனி 600 ஆக இருக்கும். பிளஸ்–1 மற்றும் பிளஸ்–2 மதிப்பெண்களை சேர்த்து பிளஸ்–2 இறுதிச்சான்றிதழ் வழங்கப்படும்.

    அப்ஜெக்டிவ் முறையில் கேள்விகள் அதிகம் கேட்கப்பட திட்டமிட்டு இருப்பதால் பிளஸ்–2 தேர்வு நடைபெறும் 3 மணி நேரம் என்பதை இரண்டரை மணி நேரமாக குறைக்கப்படும்.

    இவ்வாறு தேர்வுமுறையில் மாற்றம் கொண்டுவரப்படுவது குறித்த அரசாணையை தமிழக அரசு விரைவில் வெளியிடும் என்று எதிர்பார்க்கப்படுகிறது.

    News