" “Practice kindness all day to everybody and you will realize you’re already in heaven now.” – Jack Kerouac"

சி.பி.எஸ்.இ. பாடத்துக்கு இணையாக, தமிழகத்தில் பள்ளிக்கூட பாடத்திட்டங்கள் மாற்றம்

Views - 57     Likes - 0     Liked


  • மேல்நிலை கல்வி பாடத்திட்டம் கடைசியாக 2004–05–ம் ஆண்டில், அதாவது 12 ஆண்டுகளுக்கு முன்பு மாற்றப்பட்டது. அதுபோல 1–ம் வகுப்பு முதல் 10–ம் வகுப்பு வரையிலான பாடத்திட்டங்கள் 7 ஆண்டுகளுக்கு முன்பு மாற்றப்பட்டன.

    பாடத்திட்டங்களை பொதுவாக 3 முதல் 5 ஆண்டுகளில் மாற்றும் முறை பின்பற்றப்பட்டு வருகிறது. இந்த நிலையில், தமிழக கல்வித்தரத்தை மேம்படுத்துவதற்காக பள்ளி கல்வித்துறை அமைச்சர் தலைமையில் கல்வியாளர் அடங்கிய வல்லுனர் குழுவை அமைத்து அதன் பரிந்துரையை அரசு கேட்டது.

    அந்த வல்லுனர் குழு 11.5.17 அன்று கூடி, பாடத்திட்டம் மாற்றம் தொடர்பான தீர்மானங்களை அரசுக்கு வழங்கியது. மத்திய இடைநிலை கல்வி வாரியம் (சி.பி.எஸ்.இ.) மற்றும் இதர கல்வி வாரியங்களின் பாடத்திட்டத்திற்கு மேலானதாக இருக்கும்படி வடிவமைக்கப்பட வேண்டும் என்று அந்த தீர்மானத்தில் கூறப்பட்டு இருந்தது.

    மாற்ற வேண்டும்

    இந்த தீர்மானங்களின் அடிப்படையில் பொது கல்வி திட்டத்தில் 1–ம் வகுப்பு முதல் 12–ம் வகுப்பு வரை பாடத்திட்டம், பாடநூல்கள் ஆகியவை வகுப்பு வாரியாக வல்லுனர் குழு நியமித்து மாற்றப்படும்.

    2018–19–ம் ஆண்டில் 1, 6, 9 மற்றும் 11–ம் வகுப்பு பாடத்திட்டங்களில் மாற்றம் கொண்டு வரப்படும்.

    2019–20–ம் ஆண்டில் 2, 7, 10, 12–ம் வகுப்புகளிலும்; 2020–21–ம் ஆண்டில் 3, 4, 5, 8–ம் வகுப்புகளிலும் பாடத்திட்டத்தில் மாற்றம் கொண்டுவரப்படும்.

    6 முதல் 10–ம் வகுப்பு வரை உள்ள அறிவியல் பாடத்தோடு தகவல் தொழில்நுட்பவியல், கணினி பாடத்தை இணைத்து கற்பிக்கும் வகையில் பாடத்திட்டம் தயாரிக்கப்படும்.

    ஆசிரியர்களுக்கு கையேடு

    புதிய பாடத்திட்டம் மற்றும் பாடப்புத்தகங்களை உருவாக்கும்போது சில வழிகாட்டி நெறிமுறைகளை கவனத்தில் கொள்ளவேண்டும். கற்றலை மனப்பாடம் செய்யும் முறையில் இருந்து மாற்றி, படைப்பின் பாதையில் செலுத்தவேண்டும். தோல்வி பயம் மற்றும் மனஅழுத்தத்தை உருவாக்கும் தேர்வுகளை மாற்றி, கற்றலின் இனிமையை உறுதிசெய்ய வேண்டும்.

    புதுமையான கற்றல், கற்பித்தல் முறைகளை ஆசிரியர்கள் மேற்கொள்ளும் வகையில் தகுந்த ஆசிரியர் கையேடு, மாணவர்களுக்கு செய்முறை கையேடு தயாரித்து வழங்க வேண்டும்.

    பயிற்சி

    இணையவழி கற்றல், கற்பித்தலை ஊக்குவிப்பதற்காக விரிவான கற்றல் மேலாண்மைத் தளத்தை உருவாக்க வேண்டும். ஆசிரியர், மாணவர்களுக்கு எளிதில் பயன்படக்கூடிய அலைபேசி செயலிகளை (ஆப்) உருவாக்க வேண்டும்.

    பாடத்திட்ட மாற்றத்துக்கு ஏற்றவகையில் அனைத்து ஆசிரியர்களுக்கும் தொடர் பயிற்சிகள் வழங்கப்படவேண்டும். அதற்கான காலஅட்டவணை, நிதி ஒதுக்கீடு சம்பந்தப்பட்ட கருத்துரு அரசுக்கு அனுப்பப்படவேண்டும். பொதுப்பாடத்திட்ட மாற்றுப்பணியை 6 மாதங்களுக்குள் மாநில கல்வியியல் ஆராய்ச்சி மற்றும் பயிற்சி நிறுவன இயக்குனர் முடிக்கவேண்டும்.

    பிளஸ்–1 பொதுத்தேர்வு

    மேல்நிலை கல்வியின் தற்காலிக பரிமாணம், உலகளாவிய கல்விச் சூழல், போட்டி சூழல், எதிர்கால கல்வி வளர்ச்சி ஆகியவற்றை கருதி, பிளஸ்–1 தேர்வை அரசுப் பொதுத்தேர்வாக நடத்த தமிழக அரசு முடிவு செய்துள்ளது. இதற்கான அரசாணை பிறப்பிக்கப்பட்டுள்ளது.

    அந்த அரசாணையின்படி, 2017–18–ம் ஆண்டில் இருந்து பிளஸ்–1 மாணவர்களுக்கும் மாநில அளவில் அரசு பொதுத்தேர்வு நடத்தப்படும்.

    பிளஸ்–1 தேர்வுக்கு 600 மதிப்பெண்களும், பிளஸ்–2 தேர்வுக்கு 600 மதிப்பெண்களும் என இரண்டு ஆண்டுகளுக்கும் சமமான முக்கியத்துவம் அளிக்கும் வகையில் 1,200 மதிப்பெண்கள் வழங்கப்படும்.

    தேர்வு நேரம் குறைப்பு

    இதுவரை செய்முறை தேர்வு உள்ள பாடங்களுக்கு 150 மதிப்பெண்களுக்கு தேர்வு எழுதி வந்த மாணவர்கள் இனி 70 மதிப்பெண்களுக்கு மட்டுமே தேர்வு எழுத வேண்டும். செய்முறை இல்லாத பாடங்களுக்கு 200 மதிப்பெண்களுக்கு தேர்வு எழுதிவந்த மாணவர்கள் இனி 90 மதிப்பெண்களுக்கு மட்டுமே தேர்வு எழுத வேண்டும்.

    வினாக்களின் எண்ணிக்கையும், மதிப்பெண்ணும் குறைவதால், தற்போது நடைமுறையில் உள்ள பொதுத்தேர்வின் கால அளவு இரண்டரை மணி நேரமாக குறைக்கப்படுகிறது.

    பெயில் ஆனாலும்...

    அனைத்து பாடங்களிலும் மாணவர்களின் தொடர் கற்றலை ஊக்கப்படுத்தும் நோக்கத்தில் ஒவ்வொரு பாடத்திலும் 10 சதவீத மதிப்பெண் அகமதிப்பீடாக அளிக்கப்படும்.

    ஒவ்வொரு பாடத்திலும் குறைந்தபட்ச தேர்ச்சி சதவீதம் 35 சதவீதமாக நிர்ணயம் செய்யப்படுகிறது. முதலாம் ஆண்டு செய்முறை தேர்வு, இரண்டாம் ஆண்டு நடைபெறும் செய்முறை தேர்வுடன் இணைந்து நடத்தப்படும்.

    பிளஸ்–1 பொதுத்தேர்வில் சில பாடங்களில் தோல்வியுற்றால், கால விரயம் இல்லாமல் பிளஸ்–2க்கு மாணவர்கள் செல்லலாம். பிளஸ்–1ல் தோல்வியுற்ற பாடங்களை ஜூன்–ஜூலை மாதத்தில் நடக்கும் உடனடி சிறப்பு தேர்விலோ அல்லது இரண்டாம் ஆண்டு இறுதித்தேர்வின்போதோ எழுதிக்கொள்ளலாம்.

    இரண்டாம் ஆண்டு பொதுத்தேர்வுக்கு பின்னர் முதல் மற்றும் இரண்டாம் ஆண்டு தேர்வுகளுக்கான ஒருங்கிணைந்த மதிப்பெண் சான்றிதழ் வழங்கப்படும்.  இவ்வாறு அதில் கூறப்பட்டுள்ளது.

     

     

    News