" “Yesterday is history. Tomorrow is a mystery. .."

‘ஆன்–லைன்’ விற்பனை அனுமதியை கண்டித்து தமிழகத்தில் மருந்து வணிகர்கள் இன்று கடை அடைப்பு போராட்டம்

Views - 83     Likes - 0     Liked


  • மருந்து கடைகள்

    அகில இந்திய அளவில் ‘ஆன்–லைன்’ மூலம் மருந்துகள் விற்பனைக்கு அனுமதி அளிக்கவும், மருந்துகள் கொள்முதல், விற்பனை உள்பட விவரங்களை பதிவு செய்ய ‘இ–போர்ட்டல்’ என்னும் எல்க்ட்ரானிக் சேவையை அறிமுகம் செய்யவும் மத்திய அரசு புதிய சட்டம் இயற்ற உத்தேசித்துள்ளது.

    இதனை கண்டித்து அகில இந்திய அளவில் மருந்து வணிகர்கள் இன்று (செவ்வாய்க்கிழமை) ஒரு நாள் கடை அடைப்பு போராட்டத்தில் ஈடுபட உள்ளனர். அதன்படி நாடு முழுவதும் சுமார் 8 லட்சம் மருந்து கடைகள் அடைக்கப்படும் என்று எதிர்பார்க்கப்படுகிறது.

    தமிழ்நாட்டில் 30 ஆயிரம் மருந்து வணிகர்கள் இந்த கடையடைப்பு போராட்டத்தில் பங்கேற்பார்கள் என்று திருச்சியில் கடந்த 21–ந் தேதி நடைபெற்ற மாநில மருந்து வணிகர்கள் சங்கத்தின் நிர்வாகிகள் கூட்டத்தில் அறிவிக்கப்பட்டது. அதன்படி இன்று காலை 6 மணி முதல் மாலை 6 மணி வரை மருந்து வணிகர்கள் கடை அடைப்பு போராட்டத்தில் ஈடுபட உள்ளனர்.

    மக்கள் நலனே முக்கியம்

    இந்த நிலையில் இந்த கடை அடைப்பு போராட்டத்தை சென்னை, மதுரை, கரூர் ஆகிய மாவட்டங்களை சேர்ந்த மருந்து வணிகர்கள் புறக்கணித்து உள்ளனர். இதுகுறித்து சென்னை மாவட்ட மருந்து வணிகர்கள் சங்கத்தின் தலைவர் டபிள்யூ.எஸ்.மோகன் குமார் நேற்று நிருபர்களுக்கு பேட்டியளித்தார். அப்போது அவர் கூறியதாவது:–

    ஆன்–லைன் வர்த்தகம் அமல்படுத்தப்பட்டால் டாக்டர் சீட்டு இல்லாமல் மருந்துகள் கிடைக்கும். போதை மருந்துகள் இளைஞர்கள் கையில் தாராளமாக கிடைக்கும். கிராமபுறங்களில் உள்ள மருந்து கடைகளில் கம்ப்யூட்டர் வசதி இல்லாத நிலையில் இ–போர்ட்டல் சேவையை மத்திய அரசு கொண்டு வந்தால் கிராமபுற மக்களுக்கு மருந்துகள் கிடைப்பது அரிதாகிவிடும். எனவே மத்திய அரசு கொண்டு வர உள்ள ஆன்–லைன் வர்த்தகம், இ–போர்ட்டல் சேவை சட்டத்தை நாங்கள் கடுமையாக எதிர்க்கிறோம்.

    எனினும் மக்கள் நலன் கருதியும், மத்திய அரசின் சட்டத்தில் இருந்து தமிழ்நாடு மருந்து வணிகர்களை காப்பாற்ற நடவடிக்கை எடுக்கப்படும் என்று சுகாதாரத்துறை செயலாளர் டாக்டர் ராதாகிருஷ்ணன் அளித்துள்ள உத்தரவாதத்தை ஏற்றும் நாளை (இன்று) நடைபெறும் கடை அடைப்பு போராட்டத்தில் நாங்கள் ஈடுபட மாட்டோம்.

    கருப்பு ‘பேட்ஜ்’

    மதுரை, கரூர் மாவட்டத்தை சேர்ந்த வணிகர்களும் எங்களுடைய நிலைப்பாட்டுக்கு ஆதரவு அளித்துள்ளனர். அவர்களும் கடையடைப்பு போராட்டத்தில் பங்கேற்க போவது இல்லை என்று அறிவித்துள்ளனர். எனவே சென்னையில் 5 ஆயிரம் மருந்து கடைகள் உள்பட கரூர், மதுரை ஆகிய மாவட்டங்களை சேர்த்து 10 ஆயிரம் மருந்து கடைகள் வழக்கம் போல் திறந்து இருக்கும்.

    மத்திய அரசின் சட்டத்தை எதிர்க்கும் விதமாக கருப்பு ‘பேட்ஜ்’ அணிந்து மருந்து விற்பனையில் ஈடுபடுவோம்.  இவ்வாறு அவர் கூறினார்.

    News