" “The best preparation for tomorrow is doing your best today.”"

கார்ட்டோசாட்–2இ செயற்கைகோளுடன் பி.எஸ்.எல்.வி. சி–38 ராக்கெட் விண்ணில் செலுத்தப்படுகிறது

Views - 49     Likes - 0     Liked


  • பூமியை கண்காணிக்கும் கார்ட்டோசாட்–2இ மற்றும் 36 நானோ வகை செயற்கைகோள்களுடன் பி.எஸ்.எல்.வி. சி–38 ராக்கெட்டை வருகிற 23–ந் தேதி (வெள்ளிக்கிழமை) விண்ணில் செலுத்த இஸ்ரோ திட்டமிட்டு இருப்பதாக விஞ்ஞானிகள் கூறினர்.

    பூமியை கண்காணிப்பது, தொலையுணர்வு தகவல்களை பெறுவது, கடல்சார் ஆராய்ச்சி, தகவல் தொடர்பு மற்றும் வானிலை பயன்பாடு உள்ளிட்ட பல்வேறு பணிகளுக்காக செயற்கைகோள்களை இஸ்ரோ வடிவமைத்து வெற்றிகரமாக விண்வெளிக்கு செலுத்தி வருகிறது.

    அந்தவகையில் பூமி கண்காணிப்பு மற்றும் தொலையுணர்வுக்காக கார்ட்டோசாட் வகை செயற்கைகோள்கள் விண்ணில் செலுத்தப்படுகின்றன.

    தற்போது 1,235 கிலோ எடை கொண்ட 7–வது கார்ட்டோசாட்–2இ என்ற செயற்கைகோள் வடிவமைக்கப்பட்டு உள்ளது.

    பி.எஸ்.எல்.வி. சி–38 ராக்கெட் மூலம் கார்ட்டோசாட்– 2இ செயற்கைகோளை வருகிற 23–ந் தேதி (வெள்ளிக்கிழமை) சென்னையை அடுத்த ஸ்ரீஹரிகோட்டாவில் உள்ள சதீஷ்தவான் விண்வெளி ஆய்வு மையத்தில் உள்ள முதலாவது ஏவுதளத்தில் இருந்து விண்ணில் செலுத்த இஸ்ரோ திட்டமிட்டு உள்ளது. இந்த செயற்கைகோள் பூமியில் இருந்து 500 கிலோ மீட்டர் உயரத்தில் சுற்றுப்பாதையில் நிலை நிறுத்தப்படுகிறது.

    அதில் இயற்கை வளங்களை பல்வேறு கோணங்களில் துல்லியமாக படம் எடுக்க உதவும் 3 கேமராக்கள் பொருத்தப்பட்டுள்ளன. இந்த செயற்கைகோளின் ஆயுள்காலம் 5 ஆண்டுகள் ஆகும். ராக்கெட்டை ஏவப்படும் நேரத்தை இறுதி செய்யும் பணிகளில் இஸ்ரோ ஈடுபட்டு வருகிறது.

    இஸ்ரோ பி.எஸ்.எல்.வி. ரக ராக்கெட்டுகளை வெற்றிகரமாக விண்ணில் செலுத்தி வருவதால் இந்திய செயற்கைகோள்களுடன், வெளிநாடுகளைச் சேர்ந்த வாடிக்கையாளர்களும் தங்கள் செயற்கைகோள்களை விண்ணில் செலுத்த அதிகம் முன்வருகின்றனர்.

    அந்தவகையில் கார்ட்டோசாட்–2இ செயற்கைகோளுடன் வெளிநாடுகளைச் சேர்ந்த 36 நானோ வகை செயற்கைகோள்களும் இந்த ராக்கெட்டில் அனுப்பப்பட்டு விண்ணில் நிலை நிறுத்தப்படுகின்றன. இந்த திட்டத்தை ரூ.160 கோடியில் இஸ்ரோ நிறைவேற்ற திட்டமிட்டுள்ளது.  மேற்கண்ட தகவலை இஸ்ரோ விஞ்ஞானிகள் தெரிவித்துள்ளனர்.

    News