" “May you live all the days of your life.” – Jonathan Swift."

பழைய 500, 1,000 ரூபாய் நோட்டுகளை ஜூலை 20-ம் தேதிக்குள் அளிக்க வேண்டும்: வங்கிகளுக்கு ரிசர்வ் வங்கி உத்தரவு

Views - 55     Likes - 0     Liked


  • பண மதிப்பு நீக்கம் செய்யப்பட்ட பழைய 500 மற்றும் 1,000 ரூபாய் நோட்டுகளை டெபாசிட் செய்ய வங்கிகளுக்கும், அஞ்சல் அலுவலகங்களுக்கும் மேலும் 30 நாட்கள் அவகாசம் அளித்துள்ளதாக ரிசர்வ் வங்கி (ஆர்பிஐ) அறிவித்துள்ளது. ஜூலை 30-ம் தேதிக்குள் ரிசர்வ் வங்கியிடம் ஒப்படைக்க வேண்டும் என உத்தரவிடப்பட்டுள்ளது.

    இத்துடன் அவகாசம் அளிக்கப்பட்ட காலத்தில் பணத்தை டெபாசிட் செய்யாதது ஏன் என்பதற்கான விளக்கத்தையும் அளிக்க வேண்டும் என ரிசர்வ் வங்கி அறிவுறுத்தியுள்ளது.

    இது குறித்து ரிசர்வ் வங்கி வெளியிட்டுள்ள அறிக்கையில், ``அனைத்து வங்கி மற்றும் அஞ்சல் அலுவலகங்களில் தங்கள் வாடிக்கையாளர்களிடம் டிசம்பர் 30, 2016-க்கு முன்னதாகப் பெற்றுக்கொண்ட பணமதிப்பு நீக்கம் செய்யப்பட்ட ரூபாய் நோட்டுகளையும், நவம்பர் 10 முதல் 14, 2016 வரையிலான காலகட்டத்தில் மாவட்ட மத்திய கூட்டுறவு வங்கிகள் பெற்றுக்கொண்ட மதிப்பு நீக்கம் செய்யப்பட்ட ரூபாய் நோட்டுகளையும் ரிசர்வ் வங்கியின் எந்த அலுவலகத்தில் வேண்டுமானாலும் 30 நாட்களுக்கு உள்ளாக டெபாசிட் செய்யலாம்.

    முன்னதாக அவகாசம் அளிக்கப்பட்ட டெபாசிட் காலத்தில் பணத்தை டெபாசிட் செய்யாதது ஏன் என்பது குறித்த சரியான காரணங்களைக் கூறினால் மட்டுமே இது பொருந்தும்'' என்று தெரிவிக்கப்பட்டுள்ளது.

    வங்கித் துறையினர் கருத்து

    ரிசர்வ் வங்கியின் இந்த அறிவிப்பு தொடர்பாக அகில இந்திய வங்கி அதிகாரிகள் கூட்டமைப்பு பொதுச்செயலாளர் டி.தாமஸ் பிராங்கோவிடம் கேட்டபோது, அவர் கூறியதாவது:

    பாரத ஸ்டேட் வங்கியை பொருத்தவரை, பொதுமக்களிடம் இருந்து பெறப்பட்ட மதிப்பு நீக்கம் செய்யப்பட்ட பழைய ரூ.500, ரூ.1000 நோட்டுகளை, உடனுக்குடன் ரிசர்வ் வங்கியில் செலுத்திவிட்டோம். தற்போது எங்களிடம் எந்த பழைய நோட்டும் இல்லை. ஆனால் சில வங்கிகள் மற்றும் அஞ்சல் துறையிலிருந்து, பழைய நோட்டுகளை ரிசர்வ் வங்கி இன்னும் பெற்றுக்கொள்ளவில்லை. அந்த நோட்டுகளை என்ன செய்ய வேண்டும் என்றும் அவற்றுக்கு தெரிவிக்கவில்லை. அதனால் அந்த பழைய நோட்டுகளை, அந்தந்த வங்கிகளே, தங்கள் பாதுகாப்பில் வைத்துள்ளன. அவற்றை ரிசர்வ் வங்கியில் செலுத்துமாறு தற்போது அறிவுறுத்தப்பட்டுள்ளது என்றார்.

    அகில இந்திய வங்கி ஊழியர் சங்க பொதுச்செயலர் சி.எச்.வெங்கடாசலம் கூறும்போது, டிசம்பர் 30-ம் தேதிக்கு பிறகு, ரிசர்வ் வங்கி, எந்த வங்கியிடமிருந்தும் பழைய நோட்டுகளைப் பெறவில்லை. உதாரணமாக, தூத்துக்குடியில் உள்ள ஒரு வங்கிக் கிளையில் டிசம்பர் 30-ம் தேதி பெறப்பட்ட பணத்தை உடனுக்குடன், சென்னையில் உள்ள ரிசர்வ் வங்கியில் செலுத்த இயலாது. அதனால் அந்த நோட்டுகள் அந்தந்த வங்கிகளிடமே உள்ளன. உரிய காரணத்தை தெரிவித்து, பழைய நோட்டுகளை செலுத்துமாறு ரிசர்வ் வங்கி அறிவுறுத்தியுள்ளது. அதன்படி, வங்கிகள், தங்களால் டிசம்பர் 30-ம் தேதிக்குள் செலுத்த முடியாத காரணத்தை தெரிவிப்பார்கள் என்றார்.

    News