" “May you live all the days of your life.” – Jonathan Swift."

தமிழகத்தில் நதிநீர் இணைப்பு திட்டத்தை நிறைவேற்ற வேண்டும் பிரதமர் மோடிக்கு மு.க.ஸ்டாலின் கடிதம்

Views - 47     Likes - 0     Liked


  • தி.மு.க. செயல் தலைவர் மு.க.ஸ்டாலின், பிரதமர் நரேந்திர மோடிக்கு இன்று கடிதம் அனுப்பியுள்ளார். அதில் கூறி இருப்பதாவது:-

    தமிழகத்தில் நதி நீர் இணைப்பு திட்டத்தை நிறைவேற்றிட முதன் முதலில் நடவடிக்கை எடுத்த  தி.மு.க. சார்பில் நதி நீர் இணைப்பு திட்டத்தின் முக்கியத்துவத்தினை தங்களின் மேலான பார்வைக்கு கொண்டு வர 

    விரும்புகிறேன். மாநிலங்களுக்கு இடையிலான நதி நீர் இணைப்பு பிரச்சினைகளால் தமிழகம் இன்றைக்கு மிக மோசமான சூழலை அனுபவித்து வருகிறது என்பதையும், தமிழக விவசாயிகள் இதற்கு முன்பு எப்போதும் இல்லாத வகையில் சொல்லொனாத்  துயரினை ஒவ்வொரு நாளும் சந்தித்து வருகின்றனர் என்பதையும் கனத்த இதயத்துடன் தெரிவித்துக்கொள்ள விரும்புகிறேன். 

    அண்டை மாநிலங்களில் இருந்து உரிய நீரினை பெறுவதற்கு போராட்டம், பொய்த்து விட்ட பருவ மழை மற்றும் மோசமான வறட்சி போன்றவை விவசாயி களின் அன்றாட வாழ்க்கை யையும், அவர்களது வாழ்வா தாரத்தினையும் பெரிதும் பாழ்ப்படுத்தியுள்ளது. இதனால் நூற்றுக்கணக்கான விவசாயிகள் தற்கொலை செய்து கொண்டிருக்கிறார்கள். அண்டை மாநிலங்களுடன் எப்போதும் சுமூகமாகவும், சகோதர மனப்பான்மையுடனும் என்றும் அணுகி வரும் தமிழகத்தின் முயற்சிகளுக்கு மாறாக, ஒவ்வொரு வருடமும் தமிழகத்திற்கு கிடைக்கும் நீர்பாசன ஆதாரங்களை முடக்குவதும், மாநிலங் களுக்கு இடையேயான நதி நீர் ஒப்பந்தங்களை மீறி அநியாய மாக தடுப்பணைகள் கட்டுவதும் அண்டை மாநிலங்களின் எதேச்சதிகாரமான 
    போக்காக மாறி வருகிறது.

    தற்போதைய சூழலில், நாட்டின் விவசாயிகளையும், விவசாயத்தையும் காப்பாற்ற நதிநீர் இணைப்பு மட்டுமே காலத்தின் கட்டாயம் என்பதையும், நீண்ட காலத்தீர்வு என்பதையும் தெரிவித்துக் கொள்கிறேன். இந்த தருணத்தில் 2002 ஆம் ஆண்டு ஆகஸ்ட் 14 ஆம் தேதி, மிகச்சிறந்த தொலைநோக்கு பார்வை கொண்ட மறைந்த டாக்டர். அப்துல் கலாம் தனது சுதந்திர தின உரையில் தெரிவித்ததை கனிவுடன் நினைவு கூறுகிறேன். “ஒரு பக்கம் வெள்ளம், ஒரு பக்கம் வறட்சி என நமது தேசம் ஒரு முரண்பாட்டினை வெகு காலமாக கண்டும் உணர்ந்தும் வருகிறது. ஆதலால், நீர் மேலாண்மை தான் தற்போது நமது நாட்டிற்கு மிக அவசியம் தேவை” என்ற அந்த கருத்தை சுட்டிக் காட்ட விரும்புகிறேன். 

    தங்களுடைய தலைமையிலான ஆற்றல் மிகு அரசு 16.7.2014 அன்று சிறப்புக் குழு அமைத்து, கடைசி யாக 2.2.2016 அன்று நடை பெற்ற கூட்டத்துடன் இது வரை 8 கூட்டங்களை நதி நீர் இணைப்புத் திட்டங்கள் குறித்து கூட்டி விவாதித் திருப்பது சற்று ஆறுதலாக இருக்கிறது.

    நதி நீர் இணைப்புத் திட்டம் தேசத்துக்கான, தேசத்தால் செயல்படுத்தப்பட வேண்டிய தேசிய திட்டம். இதனால் தமிழகத்தை சேர்ந்த விவசாயிகள் மட்டுமல்லாமல், நாடு முழுவதும் இருக்கக்கூடிய விவசாயிகளுக்கும், பல்வேறு தரப்பினருக்கும் மிகுந்த பயனளிப்பதாக இத்திட்டம் அமையும். உன்னதமான இந்த திட்டத்தை நிறைவேற்றுவதன் மூலம் , மாநிலங்களுக்கு இடையிலான நதிநீர் பிரச்சினைகள் தீர்வதோடு, அண்டை மாநிலங்களுக்கு இடையில் அமைதி நிலவி, தேசிய ஒருமைப்பாட்டினை மேலும் வலுவாக்கவும், தேசிய வளர்ச்சி மற்றும் தேசிய பொருளாதாரம் மேம்படவும் மிகச்சிறந்த வாய்ப்பாக அமையும் என்பதால் நதி நீர் இணைப்புத் திட்டங்களில் பிரதமர் உடனடி கவனம் செலுத்த வேண்டும் என்று கேட்டுக் கொள்கிறேன். இவ்வாறு அதில் கூறியுள்ளார்.
    News