" “No matter how hard the past, you can always begin again.”"

இலவச வீடு கேட்டு கலெக்டர் அலுவலகத்தில் திரண்ட பொதுமக்கள்

Views - 58     Likes - 0     Liked


  • மத்திய, மாநில அரசுகள் நகரத்தில் அடுக்குமாடி திட்டம், கிராமத்தில் தொகுப்பு வீடு திட்டத்தை அமல்படுத்தி, வீடில்லாத மக்களுக்கு இலவச வீடு வழங்க வேண்டும் என்ற கோரிக்கையை வலியுறுத்தியும், கேரள அரசைப்போல் தமிழகத்தில் வீடில்லாதவர்களுக்கு வீடு வழங்க வேண்டும் என்று வலியுறுத்தியும் அகில இந்திய விவசாய தொழிலாளர் சங்கம் சார்பில் நாகர்கோவிலில் உள்ள கலெக்டர் அலுவலகத்தில் ஜூன் 30–ந் தேதி மனு வழங்கும் முகாம் நடத்துவது என ஏற்கனவே முடிவு செய்யப்பட்டு இருந்தது.

    அதன்படி நேற்று குமரி மாவட்டத்தின் பல்வேறு பகுதிகளைச் சேர்ந்த விவசாய தொழிலாளர்கள் ஏராளமானோர் நாகர்கோவில் கலெக்டர் அலுவலகம் எதிரில் திரண்டனர். பின்னர் அங்கு கோரிக்கை விளக்க கூட்டம் நடந்தது. கூட்டத்துக்கு அகில இந்திய விவசாய தொழிலாளர் சங்க மாவட்ட செயலாளர் மலைவிளை பாசி தலைமை தாங்கி பேசினார். மார்க்சிஸ்ட் கம்யூனிஸ்டு கட்சி நிர்வாகிகள் முன்னாள் எம்.பி. பெல்லார்மின், என்.எஸ்.கண்ணன், உஷா, சாகுல்ஹமீது, சிவானந்தம், பேபி உள்பட ஏராளமானோர் கலந்து கொண்டு கோரிக்கைகளை விளக்கி பேசினர். அகில இந்திய விவசாய தொழிலாளர் சங்க மாநில பொதுச்செயலாளர் அமிர்தலிங்கம் நிறைவுரை ஆற்றினார்.

    பின்னர் விவசாய தொழிலாளர்கள் மற்றும் பொதுமக்கள் அனைவரும் கலெக்டர் அலுவலக வளாகத்துக்குள் மனு கொடுக்க வந்தனர். அவர்களிடம் தாசில்தார்கள் மற்றும் கலெக்டர் அலுவலக அதிகாரிகள் மனுக்களை வாங்கினர். பின்னர் மலவிளை பாசி தலைமையிலான நிர்வாகிகள் கோரிக்கைகள் அடங்கிய மனுவை கலெக்டர் சஜ்ஜன்சிங் சவானிடம் வழங்கினர்.

    மனு கொடுக்க விவசாய தொழிலாளர்கள் மற்றும் பொதுமக்கள் ஏராளமானோர் திரண்டு வந்ததால் கலெக்டர் அலுவலகம் பரபரப்புடன் காட்சி அளித்தது. மேலும் ஒரே நேரத்தில் அனைவரும் மனு கொடுக்கச் சென்றதால் அவர்களிடையே தள்ளுமுள்ளு ஏற்பட்டது. இதனால் அங்கு பாதுகாப்பு பணியில் ஈடுபட்டிருந்த போலீசார் கூட்டத்தை கட்டுப்படுத்த திணறினர். இதையடுத்து விவசாய தொழிலாளர் சங்க நிர்வாகிகளே மனு கொடுக்க வந்தவர்களிடம் மனுக்களை மொத்தமாகப் பெற்று அதிகாரிகளிடம் வழங்கினர்.

    News