" “The best preparation for tomorrow is doing your best today.”"

விவசாயிகளுக்கான நல திட்டங்கள்: மத்திய அரசுக்கு 6 மாதம் அவகாசம் - சுப்ரீம் கோர்ட்டு

Views - 48     Likes - 0     Liked


  • குஜராத்தில் விவசாயிகள் தற்கொலை செய்து கொள்வதை தடுக்க மத்திய அரசு நடவடிக்கை எடுக்குமாறு உத்தரவிடவேண்டும் என்று கோரி அந்த மாநிலத்தைச் சேர்ந்த ‘கிராந்தி’ என்ற தன்னார்வ தொண்டு நிறுவனம் சுப்ரீம் கோர்ட்டில் பொதுநல மனு ஒன்றை தாக்கல் செய்தது. இந்த மனு தலைமை நீதிபதி ஜே.எஸ்.கேஹர், நீதிபதி டி.ஒய்.சந்திரசூட் ஆகியோர் அடங்கிய அமர்வு முன்பு நேற்று விசாரணைக்கு வந்தது.
     
    அப்போது மத்திய அரசின் சார்பில் ஆஜரான அட்டார்னி ஜெனரல் கே.கே.வேணுகோபால் வாதாடுகையில் கூறியதாவது:-
     
    நல திட்டங்கள்
     
    விவசாயிகளின் நலன் கருதி மத்திய அரசு பல்வேறு நல திட்டங்களை செயல்படுத்தி வருகிறது. இந்த திட்டங்கள் நல்ல பயனையும் அளிக்கின்றன. அதே நேரத்தில், முழுமையான பலன் அளிக்கும் வகையில் இத்திட்டங்களை பரவலாக்க மத்திய அரசுக்கு மேலும் அவகாசம் தேவைப்படுகிறது.
     
    மொத்தம் 12 கோடி விவசாயிகளில் ஏற்கனவே 5 கோடியே 34 லட்சம் விவசாயிகள் பயிர்க்காப்பீட்டு திட்டம் போன்ற நலத்திட்டங்களால் பயன் அடைந்து உள்ளனர். ‘கிசான் கிரெடிட் கார்டுகள்’ (விவசாயிகள் கடன் அட்டைகள்) குறைந்த தொகையில் காப்பீட்டை வழங்குகின்றன. விவசாயிகளின் நலனை காக்கும் வகையில் மேலும் பல்வேறு திட்டங்களை செயல்படுத்த மத்திய அரசு தீர்மானித்து உள்ளது.
     
    பயிர்க்காப்பீட்டு திட்டம்
     
    இதுவரை 30 சதவீத விவசாய நிலங்கள் பயிர்க்காப்பீட்டு திட்டத்தின் கீழ் கொண்டு வரப்பட்டு உள்ளன. ஏற்கனவே 40 சதவீத விவசாயிகள் இதனால் பயன் அடைந்து இருக்கிறார்கள். வருகிற 2018-2019-ம் ஆண்டில் மேலும் 50 சதவீத விவசாயிகள் பயன் அடைவார்கள். எனவே மத்திய அரசுக்கு குறைந்தது ஒரு ஆண்டு கால அவகாசம் அளிக்க வேண்டும்.
     
    இவ்வாறு அவர் கூறினார்.
     
    நீதிபதிகள் உத்தரவு
     
    மனுதாரர் தரப்பில் ஆஜரான மூத்த வக்கீல் காலின் கொன்சால்விஸ் வாதாடுகையில், “தனியார் காப்பீட்டு நிறுவனங்களுக்கு மத்திய அரசு ரூ.13,500 கோடி ஒதுக்கீடு செய்து உள்ளது. ஆனால் இந்த தொகை இதுவரை விவசாயிகளுக்கு பலன் அளிக்கும் வகையில் பயன்படுத்தப்படவில்லை. மத்திய அரசு என்ன திட்டம் அறிவித்தாலும் விவசாயிகளின் தற்கொலை நாளுக்கு நாள் அதிகரித்து வருகிறது. இந்த தற்கொலைகளை தடுத்து நிறுத்துவதற்கான வழிமுறைகளை மத்திய அரசு கண்டிப்பாக கண்டறிய வேண்டும்” என்றார்.
     
    இருதரப்பு வாதங்களையும் கேட்ட நீதிபதிகள் பிறப்பித்த உத்தரவில் கூறி இருப்பதாவது:-
     
    6 மாதம் அவகாசம்
     
    இந்த விவகாரத்தில் அரசின் திட்டங்கள் வெற்றிகரமான பலன்களை அளிக்க மத்திய அரசு தரப்பில் ஒரு வருட கால அவகாசம் கோரப்படுகிறது. விவசாயிகள் பிரச்சினை மிகவும் தீவிரமான பிரச்சினை. அரசின் கவனம் அனைத்து வகையிலும் தேவைப்படும் பிரச்சினை ஆகும். விவசாயிகளின் பிரச்சினை ஒரே நாள் இரவில் தீர்க்கக் கூடியது அல்ல.
     
    அரசின் திட்டங்களை பயனுள்ள வகையில் செயல்படுத்தும் வழிமுறைகள், ஆலோசனைகளை மனுதாரரின் வக்கீலிடம் கேட்டு பெறுமாறு மத்திய அரசுக்கு கோர்ட்டு அறிவுறுத்துகிறது. இந்த பிரச்சினையில் மத்திய அரசுக்கு 6 மாத காலம் அவகாசம் வழங்கப்படுகிறது. 6 மாதங்களுக்கு பிறகு இந்த வழக்கு மீண்டும் விசாரிக்கப்படும்.
     
    இவ்வாறு நீதிபதிகள் உத்தரவிட்டனர். 

     

    News