" Work hard, stay humble, and follow your heart."

மலைவாழை மேம்பாட்டிற்கு ரூ.1 கோடி : வேளாண் முதன்மை செயலர் தகவல்

Views - 73     Likes - 0     Liked


  • ''தமிழகத்தில் மூன்று லட்சம் எக்டேரில் வாழை சாகுபடி நடக்கிறது. இதில் 2 லட்சம் 
    டன் வாழை உற்பத்தி செய்யப்படுகிறது. மலை வாழை மேம்பாட்டுக்காக ஒரு கோடி ரூபாய் ஒதுக்கப்பட்டுள்ளது,'' என வேளாண் முதன்மை செயலர் ககன்தீப் சிங் பேடி கூறினார்.

    மதுரை வேளாண்மை கல்லுாரி வேளாண்மை துறை, இந்திய தொழில் கூட்டமைப்பு (சி.ஐ.ஐ.), நபார்டு வங்கி சார்பில் தேசிய வாழை விழா நேற்று துவங்கியது. சி.ஐ.ஐ., தலைவர் ரவிச்சந்திரன் வரவேற்றார். தமிழ்நாடு வாழை சாகுபடி கூட்டமைப்பு தலைவர் கருப்பையா, நபார்டு வங்கி பொது மேலாளர் நாகூர் அலி ஜின்னா, சி.ஐ.ஐ., துணை தலைவர் தினேஷ் முன்னிலை வகித்தனர்.

    தமிழக வேளாண் முதன்மை செயலர் ககன்தீப்சிங் பேசியதாவது: சுவாமி வழிபாட்டில் துவங்கி உணவு வரை வாழைப்பழம் முக்கிய பங்கு வகிக்கிறது. தமிழகத்தில் கடும் வறட்சி நிலவுகிறது. எனினும் தமிழக அரசு, இந்திய தொழில் கூட்டமைப்பு, நபார்டு சார்பில் தொடர்ந்து நான்காவது முறையாக தேசிய வாழை விழா நடத்துவது பெருமைக்குரியது. தமிழகத்தில் மூன்று லட்சம் எக்டேரில் வாழை சாகுபடி நடக்கிறது. இதில் 2 லட்சம் டன் வாழை உற்பத்தி செய்யப்படுகிறது. மலை வாழை மேம்பாட்டிற்கு ஒரு கோடி ரூபாய் ஒதுக்கப்பட்டுள்ளது. திசு வாழை சாகுபடிக்கு எக்டேருக்கு 35,500 ரூபாய் மானியம் வழங்கப்படுகிறது. காய்கறி, பழங்களை 'ஏ.சி.' அறைகளில் வைத்து பாதுகாத்து விற்பனை செய்ய 1.87 கோடி ரூபாய், வேளாண் மேம்பாட்டிற்கு 398 கோடி ரூபாய் மற்றும் வாழை மேம்பாட்டிற்கு மட்டும் 62 கோடி ரூபாய் ஒதுக்கீடு செய்து முதல்வர் பழனிசாமி உத்தரவிட்டுள்ளார். இந்திய அளவில் வாழை உற்பத்தியில் 30 சதவீதம் தமிழகம் மேற்கொள்கிறது. சர்வதேச அளவில் வாழை உற்பத்தியில் தமிழகம் ஐந்தாவது இடத்தில் உள்ளது. விவசாயிகள் மனது வைத்தால் முதலிடம் பெற முடியும் என்றார்.

    மத்திய வேளாண் அமைச்சக இணை செயலர் ஷகில் அகமது பேசுகையில், ''முக்கனிகளில் வாழை முதலிடம் வகிக்கிறது. இது அறிவாளிகளின் பழம் என்றும் கூறுவர். ஆப்ரிக்காவில் தோன்றி இந்தியாவை அடுத்து லத்தீன் அமெரிக்கா என வாழை பரவியதாக வரலாறு கூறுகிறது. வாழைப்பழம் கிலோ 30 ரூபாய். இதை மதிப்புக்கூட்டும்போது வாழைப்பழம் பவுடர் கிலோ 300 ரூபாய். வாழையில் மதிப்புக்கூட்டும்போது பல மடங்கு லாபம் கிடைக்கிறது. இதை விவசாயிகள் பின்பற்ற வேண்டும்,'' என்றார்.

    அமைச்சர்கள் சீனிவாசன், செங்கோட்டையன், துரைக்கண்ணு, செல்லுார் ராஜு, உதயகுமார், கலெக்டர் வீரராகவராவ், வேளாண் பல்கலை துணை வேந்தர் ராமசாமி, வேளாண் இணை இயக்குனர் செல்வபாண்டி, துணை இயக்குனர்கள் ராமநாதன், பூபதி (தோட்டக்கலை), உதவி இயக்குனர்கள் சுப்புராஜ் பன்னீர்செல்வம், 14 மாநில விவசாயிகள் கலந்து கொண்டனர். வாழை கண்காட்சி மற்றும் கருத்தரங்கு இன்றும், நாளையும் நடக்கிறது. சி.ஐ.ஐ., துணை தலைவர் பொன்னுசாமி நன்றி கூறினார்.

     
     
     

     

    News