" Work hard, stay humble, and follow your heart."

புதிய ஜனாதிபதியாக ராம்நாத் கோவிந்த் நாளை பதவி ஏற்பு பிரணாப் முகர்ஜி புதிய பங்களாவில் குடியேறுகிறார்

Views - 61     Likes - 0     Liked


  • புதிய ஜனாதிபதியாக ராம்நாத் கோவிந்த் நாளை (செவ்வாய்க்கிழமை) பதவி ஏற்க இருப்பதையொட்டி ஜனாதிபதி மாளிகையில் இருந்து வெளியேறி பிரணாப் முகர்ஜி புதிய பங்களாவில் குடியேறுகிறார்.

    இன்று வெளியேறுகிறார்

    கடந்த 2012–ம் ஆண்டு ஜூலை மாதம் 25–ந்தேதி ஜனாதிபதியாக பொறுப்பேற்ற பிரணாப் முகர்ஜியின் பதவி காலம் இன்றுடன் (திங்கட்கிழமை) நிறைவடைகிறது. கடந்த வாரம் நடந்த ஜனாதிபதி தேர்தலில் தேசிய ஜனநாயக கூட்டணி சார்பில் போட்டியிட்ட ராம்நாத் கோவிந்த் வெற்றி பெற்றார். அவர் நாளை நாட்டின் 14–வது ஜனாதிபதியாக பதவி ஏற்கிறார்.

    இதையொட்டி ஜனாதிபதியின் அதிகாரப்பூர்வ வசிப்பிடமான ஜனாதிபதி மாளிகையில் இருந்து இன்று பிரணாப் முகர்ஜி வெளியேறுகிறார். டெல்லி ராஜாஜி மார்க் பகுதியில் தனக்கு ஒதுக்கப்பட்டுள்ள 10–ம் எண் கொண்ட அரசு பங்களாவில் அவர் குடியேறுகிறார்.

    11,776 சதுரடி பங்களா

    11,776 சதுரடி பரப்பளவில் கட்டப்பட்டுள்ள இந்த பங்களா தற்போது வண்ணம் பூசப்பட்டு புதுப்பொலிவுடன் காட்சியளிக்கிறது. பங்களாவின் முற்றமும் அலங்கரிக்கப்பட்டு உள்ளது. பிரணாப் முகர்ஜி புத்தக பிரியர் என்பதால், அதிக இட வசதியுடன் நூலகமும் அமைக்கப்பட்டு இருக்கிறது.

    மறைந்த முன்னாள் ஜனாதிபதி அப்துல்கலாம் தான் பதவியில் இருந்து ஓய்வு பெற்றதும், இந்த பங்களாவில் குடியேறி வசித்து வந்தார். 2015–ம் ஆண்டு மரணம் அடையும் வரை அவர் அங்குதான் தங்கியிருந்தார். பின்பு இந்த பங்களா மத்திய மந்திரி மகேஷ் சர்மாவுக்கு ஒதுக்கப்பட்டது. பிரணாப் முகர்ஜி இங்கு குடிவருவதால் மகேஷ் சர்மா தனக்கு ஒதுக்கப்பட்டு உள்ள அக்பர் சாலை 10–ம் எண் இல்லத்தில் குடியேறுகிறார்.

    அருங்காட்சியகத்தில் ஒப்படைப்பு

    81 வயது பிரணாப் முகர்ஜியிடம் சிகரெட் பைப் பிடிக்கும் பழக்கம் நீண்டகாலமாக இருந்து வந்தது. உடல் நலம் கருதி டாக்டர்கள் கைவிடும்படி கேட்டுக்கொண்டதால் அந்த பழக்கத்தை விட்டு விட்டார்.

    எனினும், அவர் தனக்கு அன்பளிப்பாக கிடைத்த 500–க்கும் மேற்பட்ட வித விதமான சிகரெட் பைப்புகளை சேகரித்து பாதுகாத்து வைத்திருந்தார். ஜனாதிபதி மாளிகையில் இருந்து வெளியேறுவதால் அவற்றை அங்குள்ள அருங்காட்சியகத்தில் பிரணாப் முகர்ஜி ஒப்படைத்தார்.

    இந்திராவின் நம்பிக்கையை பெற்றவர்

    மறைந்த பிரதமர் இந்திரா காந்தியின் மந்திரி சபையில் 1982–ம் ஆண்டு முதல் 1984–ம் ஆண்டு வரை நிதி மந்திரியாக பிரணாப் முகர்ஜி பதவி வகித்தார். அவரது நம்பிக்கைக்கு உரியவராகவும் திகழ்ந்தார்.

    இந்திராவின் மறைவுக்கு பிறகு, நரசிம்மராவ், மன்மோகன் சிங் ஆகியோருடைய மந்திரி சபையிலும் இடம் பிடித்தார். வெளியுறவு, ராணுவ மந்திரி பதவிகளையும் வகித்து உள்ளார்.

    News