" “Not only must we be good, but we must also be good for something.” – Henry David Thoreau"

வட்டி விகிதத்தை 0.25 சதவீதம் குறைத்தது ரிசர்வ் வங்கி

Views - 39     Likes - 0     Liked


  • சந்தை எதிர்பார்ப்புகளுக்கு ஏற்ப குறுகிய கால கடன்களுக்கான வட்டி விகிதத்தை 0.25 சதவீதம் அளவுக்கு ரிசர்வ் வங்கி குறைத்திருக்கிறது. 6.25 சதவீதத்தில் இருந்து 6 சதவீதமாக ரெபோ விகிதம் குறைக்கப்பட்டிருக்கிறது. அதேபோல ரிவர்ஸ் ரெபோ விகிதமும் 0.25 சதவீதம் குறைக்கப்பட்டு தற்போது 5.75 சதவீதமாக இருக்கிறது.

    நிதிக்கொள்கை குழுவில் உள்ள ஆறு நபர்களில் உரிஜித் படேல், துணை கவர்னர் விரல் ஆச்சார்யா உள்ளிட்ட நால்வர் தற்போதைய வட்டி குறைப்புக்கு ஆதரவாக இருந்தனர். டாக்டர் ரவிந்திர தோலக்யா 0.50 சதவீதம் வட்டி குறைப்பு செய்ய வேண்டும் என பரிந்துரை செய்தார். மற்றொரு உறுப்பினர் டாக்டர் எம்டி பத்ரா தற்போதைய நிலையே தொடரவேண்டும் என பரிந்துரை செய்தார். கடந்த 2010-ம் ஆண்டு நவம்பர் மாதத்துக்கு பிறகு ரெபோ விகிதம் குறைவாக இருப்பது தற்போதுதான்.

    குறைந்த கடன் வளர்ச்சி விகிதம், மிக குறைவான பணவீக்க விகிதம், குறைவான பொருளாதார வளர்ச்சி உள்ளிட்ட காரணங்களால் ரெபோ விகிதம் குறைக்கப்பட்டிருக்கிறது. சில்லரை பணவீக்கம் ஆறு ஆண்டுகளில் இல்லாத அளவு குறைந்திருக்கிறது. இன்னும் சில மாதங்களுக்கு இதே விகிதத்தில் இருக்கும் என கணிக்கப்பட்டிருக்கிறது. வங்கி கடன் வளர்ச்சி விகிதம் ஆறு சதவீதம் என்னும் நிலையிலேயே இருக்கிறது.

    நடப்பு நிதி ஆண்டு வளர்ச்சி 7.3 சதவீதமாக இருக்கும் என ரிசர்வ் வங்கி முன்பு கணித்திருந்தது. தற்போது அந்த கணிப்பில் எந்தவிதமான மாற்றமும் செய்யவில்லை.

    நிதி அமைச்சகம் வரவேற்பு

    கடந்த அக்டோபருக்கு பிறகு ரிசர்வ் வங்கி வட்டியை குறைத்திருக்கிறது. இந்த வட்டி குறைப்பை நிதி அமைச்சகம் வரவேற்றிருக்கிறது. நீடித்த வளர்ச்சி மற்றும் மிதமான பணவீக்கத்துக்கு இந்த வட்டி குறைப்பு அவசியம் என பொருளாதார விவகாரங்களுக்கான செயலாளர் சுபாஷ் சந்திர கார்க் தெரிவித்திருக்கிறார்.

    கடன்களுக்கான வட்டி குறையாது

    சில மாதங்களுக்குப் பிறகு வட்டி குறைப்பு செய்யப்பட்டிருப்பதால், கடன்களுக்கான வட்டி குறையும் என்னும் எதிர்பார்ப்பு அதிகரித்திருக்கிறது. அதிகபட்சம் இன்னும் 0.15 சதவீதம் வரை கடனுக்கான வட்டி குறையலாம். 2015-ம் ஆண்டு தொடக்கம் முதல் வட்டி விகிதத்தை ரிசர்வ் வங்கி குறைக்க தொடங்கியது. 2015-ம் ஆண்டு 1.25 சதவீதமும், 2016-ம் ஆண்டு 0.50 சதவீதமும் வட்டியை ரிசர்வ் வங்கி குறைத்தது. ஆனால் இந்த அளவுக்கு வங்கிகள் கடனுக்கான வட்டியை குறைக்கவில்லை.

    தற்போதைய வட்டி குறைப்பால் டெபாசிட்களுக்கான வட்டியை வங்கிகள் உடனடியாக குறைக்கும். ஆனால் கடனுக்கான வட்டியை குறைப்பதற்கான வாய்ப்பு குறைவு என வல்லுநர்கள் தெரிவிக்கின்றனர்.

    சந்தையில் உற்சாகம் இல்லை

    ரிசர்வ் வங்கி வட்டியை குறைத்தாலும், பங்குச் சந்தை மற்றும் கடன் சந்தையில் உற்சாகம் இல்லை. சென்செக்ஸ் 98 புள்ளிகள் சரிந்தது. அதேபோல நிப்டி 33 புள்ளிகள் சரிந்து முடிந்தது. துறைவாரியாக பார்க்கும் போது ஐடி துறை குறியீடு அதிகம் சரிந்தது. அதனைத் தொடர்ந்து கேபிடல் குட்ஸ், எப்எம்சிஜி, டெக்னாலஜி உள்ளிட்ட துறைகள் சரிந்து முடிந்தன. கன்ஸ்யூமர் டியூரபிள் மற்றும் மின் துறை குறியீடு உயர்ந்து முடிந்தன.

    சென்செக்ஸ் பங்குகளில் என்டிபிசி, ஹீரோமோட்டோ கார்ப், அதானி போர்ட்ஸ் மற்றும் லுபின் பங்குகள் உயர்ந்தன. மாறாக சன் பார்மா, டாக்டர் ரெட்டீஸ், டாடா மோட்டார்ஸ், கோடக் வங்கி மற்றும் டிசிஎஸ் ஆகிய பங்குகள் சரிந்தன. ரிசர்வ் வங்கியின் அடுத்த நிதிக்கொள்கை கூட்டம் அக்டோபர் 3 மற்றும் 4 தேதிகளில் நடைபெறும் என அறிவிக்க ப்பட்டிருக்கிறது.

    News