" “Why fit in when you were born to stand out?”"

குற்றாலத்தில் வெள்ளப்பெருக்கு: அருவிகளில் குளிக்க தடை

Views - 55     Likes - 0     Liked


  • நெல்லை மாவட்டம் குற்றாலத்தில் கடந்த ஜூன் மாதம் சீசன் தொடங்கியது. சீசன் தொடங்கிய ஒரு வாரம் மட்டும் மெயின் அருவி, ஐந்தருவி, சிற்றருவி, புலியருவி, பழைய குற்றாலம் என அனைத்து அருவிகளிலும் தண்ணீர் விழுந்தது. இடையிடையே மெயின் அருவி, ஐந்தருவியில் வெள்ளப்பெருக்கு ஏற்பட்டது.

    சீசன் தொடங்கிய 10 நாட்கள் கழித்து குற்றாலத்தில் அனைத்து அருவிகளிலும் தண்ணீர் குறைய தொடங்கியது. சாரலும் இல்லை. மெயின் அருவி, ஐந்தருவியில் மட்டும் தண்ணீர் மிகவும் குறைவாக விழுந்தது. பழைய குற்றாலம், புலியருவி, சிற்றருவி தண்ணீர் இல்லாமல் வறண்டு கிடந்தன. இதனால் சுற்றுலா பயணிகளின் வரத்தும் குறைவான அளவே இருந்தது.

    இந்தநிலையில் கடந்த 2 நாட்களாக குற்றாலம் மேற்கு தொடர்ச்சி மலைப்பகுதியில் சாரல் மழை விட்டு விட்டு பெய்தது. நேற்றுமுன்தினம் இரவில் குற்றாலம் பகுதியில் லேசானது முதல் மிதமான மழை பெய்தது. இதனால் அனைத்து அருவிகளிலும் தண்ணீர் அதிக அளவு விழ தொடங்கியது. நள்ளிரவில் மெயின் அருவி, ஐந்தருவியில் திடீரென்று வெள்ளப் பெருக்கு ஏற்பட்டது. சுற்றுலா பயணிகள் குளிக்க தடை விதிக்கப்பட்டது. இந்த வெள்ளப்பெருக்கு அதிகாலை வரை நீடித்தது.

    காலை 6 மணிக்கு பிறகு மெயின் அருவி, ஐந்தருவியில் தண்ணீர் வரத்து குறைந்தது. அதன்பிறகு சுற்றுலா பயணிகள் குளிக்க அனுமதிக்கப்பட்டனர். கடந்த 2 நாட்களாக குற்றாலத்தில் ரம்மியமான சூழல் நிலவுவதாலும், அருவிகளிலும் தண்ணீர் வரத்து அதிகரித்துள்ளதாலும் சுற்றுலா பயணிகளின் வருகை அதிகரிக்க தொடங்கி உள்ளது.

    மாலை 4 மணி அளவில் மெயின் அருவி, ஐந்தருவியில் திடீரென்று வெள்ளப்பெருக்கு ஏற்பட்டது. மரக்கிளைகள், கற்கள் வெள்ளத்தில் அடித்து வரப்பட்டன. இதனால் சுற்றுலா பயணிகள் குளிக்க தடை விதிக்கப்பட்டது. எனவே குற்றாலத்துக்கு வந்த சுற்றுலா பயணிகள் பழைய குற்றாலம், மெயின் அருவியில் குளித்து மகிழ்ந்தனர்.

    வழக்கமாக ஆகஸ்டு மாதம் 15-ந் தேதியுடன் குற்றாலத்தில் சீசன் முடிவுக்கு வந்து விடும். ஆனால் இந்த ஆண்டு சீசன் எதிர்பார்த்த அளவு இல்லை. எனவே சீசன் முடிந்து விட்டது என்று சுற்றுலா பயணிகள் நினைத்து இருந்த நேரத்தில் அருவியில் மீண்டும் தண்ணீர் விழ தொடங்கி இருப்பது சுற்றுலா பயணிகளை மகிழ்ச்சி அடைய செய்துள்ளது.

    News