" “The best preparation for tomorrow is doing your best today.”"

நாகர்கோவிலில் மத்திய அரசின் மக்கள் நல திட்டங்கள் பற்றிய விழிப்புணர்வு முகாம்

Views - 61     Likes - 0     Liked


  • குமரி மாவட்ட பா.ஜனதா சார்பில் மத்திய அரசின் மக்கள் நல திட்டங்கள் பற்றிய விழிப்புணர்வு முகாம் நாகர்கோவிலில் உள்ள ஒரு திருமண மண்டபத்தில் நேற்று நடந்தது. முகாமுக்கு மாவட்ட தலைவர் முத்துகிருஷ்ணன் தலைமை தாங்கினார். இதில் மத்திய மந்திரி பொன்.ராதாகிருஷ்ணன் பங்கேற்று மத்திய அரசின் மக்கள் நல திட்டங்கள் அடங்கிய புத்தகத்தை வெளியிட்டார்.

    பின்னர் அவர் பேசுகையில், ‘பிரதமர் நரேந்திரமோடி கடந்த 3 ஆண்டுகளில் மக்களுக்காக அறிமுகப்படுத்திய 60–க்கும் மேற்பட்ட திட்டங்களில் முக்கியமானவை பற்றி மக்களுக்கு எடுத்துக்கூறும் வகையில் இந்த முகாம் நடத்தப்படுகிறது. பிரதமர் நரேந்திரமோடி கடந்த சில தினங்களுக்கு முன் மத்திய அரசின் உயர் அதிகாரிகள் 69 பேரை அழைத்து பேசினார். அப்போது, அரசின் திட்டங்களை மக்களிடம் எப்படி எடுத்துச் செல்கிறீர்கள்? திட்டங்களை நடைமுறைப்படுத்தியதில் உள்ள அனுபவங்கள் மற்றும் திட்டங்களை செயல்படுத்துவதில் புதிய யுக்திகள் ஏதாவது இருக்கிறதா? என்றெல்லாம் பேசினார்.

    அதில் ஒரு அதிகாரி செல்வமகள் சேமிப்பு திட்டம் தமிழகத்தில் செயல்படுத்தப்படும் முறை பற்றி கூறினார். இத்திட்டத்தின் இந்தி வார்த்தையை மக்களிடம் கொண்டு செல்லும்படி உயர் அதிகாரிகள் தெரிவித்ததாகவும், ஆனால் தமிழகத்தில் செல்வமகள் சேமிப்பு திட்டம் என்று தமிழ் பெயரில் செயல்படுத்தியது பற்றியும் தெரிவித்தார். மொழி மாற்றத்தின் மூலம் தமிழகத்தில் இத்திட்டத்துக்கு நல்ல வரவேற்பு இருந்ததாகவும் அவர் கூறினார். இதுபோல பல்வேறு திட்டங்களை பிரதமர் நரேந்திரமோடி அரசு வகுத்துள்ளது. அதுபற்றி தெரிந்துகொண்டு பயனடைய வேண்டும்‘ என்றார்.

    அதைத் தொடர்ந்து அரசின் திட்டங்களை பற்றி ஆடிட்டர் சத்தியகுமார் எடுத்துரைத்தார். அப்போது அவர் பேசுகையில், ‘நாட்டின் பட்ஜெட் ரூ.24 லட்சம் கோடி ஆகும். அதே சமயத்தில் நாட்டின் கடன் சுமை ரூ.70 லட்சம் கோடி அளவுக்கு இருக்கிறது. இந்திய பணம் ரூ.90 லட்சம் கோடி கருப்பு பணமாக வெளிநாடுகளில் பதுக்கி வைக்கப்பட்டு உள்ளது.

    இந்த கருப்பு பணத்தை நம் நாட்டுக்கு கொண்டு வர மத்திய அரசு நடவடிக்கை எடுத்து இருக்கிறது. ரூ.90 லட்சம் கோடியையும் மீட்டால் நம் நாட்டின் கடனை மொத்தமாக செலுத்தி விடலாம். நம் நாட்டில் வறுமை கோடு பட்டியலில் 22 சதவீத மக்கள் ஒரு வேளை சாப்பாட்டுக்கே வழியில்லாமல் கஷ்டப்படுகிறார்கள். சிறு, குறு மற்றும் நடுத்தர தொழில்களை மத்திய அரசு ஊக்குவித்து வருகிறது.

    பிரதமர் நரேந்திரமோடி பொறுப்பேற்ற பிறகு உள்நாட்டு உற்பத்தியை அதிகரிக்க வேண்டும் என்று சம்பந்தப்பட்ட அதிகாரிகளுக்கு உத்தரவிட்டு இருக்கிறார். பொருட்கள் உற்பத்தியில் சீனா முதலிடத்தில் இருக்க காரணம் பெரிய பெரிய தொழில் நிறுவனங்களை ஊக்குவிப்பதால் அல்ல. சீன அரசு சிறிய தொழில்களுக்கும் ஆதரவு அளிக்கிறது. இதனால் தான் சீன பொருட்களுக்கு உலக அளவில் வரவேற்பு இருக்கிறது. இந்த முறையை தற்போது பா.ஜனதா அரசும் கடைபிடித்து வருகிறது‘ என்றார். முன்னதாக மத்திய அமைச்சரின் சிறப்பு அதிகாரி கணேசன் பேசினார்.

    முகாமில், மாவட்ட பார்வையாளர் தேவ், மணிசாமி, நாகர்கோவில் நகரசபை முன்னாள் தலைவி மீனாதேவ், நகர தலைவர் ராஜன், பொதுச்செயலாளர் அஜித் உள்பட பலர் கலந்து கொண்டனர்.

    News