" “No matter how hard the past, you can always begin again.”"

‘முத்ரா’ திட்டத்தில் 5½ கோடி பேருக்கு வேலைவாய்ப்பு ஆய்வு தகவல்

Views - 50     Likes - 0     Liked


  • பிரதமர் நரேந்திர மோடி 2015–ம் ஆண்டு, ஏப்ரல் 8–ந் தேதி முத்ரா திட்டத்தை தொடங்கி வைத்தார். இந்த திட்டம், நிதியற்றோருக்கு நிதி வழங்குவதை குறிக்கோளாகக் கொண்டுள்ளது.

    ரூ.20 ஆயிரம் கோடி முதலீட்டுடன் தொடங்கப்பட்டுள்ள மத்திய அரசின் முத்ரா வங்கி, சிறு மற்றும் குறுந்தொழில் முனைவோருக்கு ரூ.10 லட்சம் வரையில் கடன் வழங்குகிறது.

    பிரதம மந்திரி முத்ரா யோஜனா திட்டத்தின்கீழ் சிசு, தருண், கிசோர் என 3 வகையிலான பிரிவில் ரூ.50 ஆயிரம் தொடங்கி ரூ.10 லட்சம் வரையில் கடன் வசதி வழங்கப்படுகிறது. இதன்மூலம் சிறிய வணிக நிறுவனங்கள், உற்பத்தி நிறுவனங்கள், காய்கறி விற்பனையாளர்கள், அழகு நிலையங்கள், நடைபாதை வணிகர்கள், படித்தவர்கள், மகளிர் தொழில் முனைவோர் என பல தரப்பினரும் பயன் அடைவதாக சொல்லப்படுகிறது.

    இந்த திட்டத்தின் செயல்பாடுகள் பற்றி ‘ஸ்கொச்’ குரூப் ஆய்வு ஒன்றை நடத்தி பல தகவல்களை வெளியிட்டுள்ளது.

    அதில், முத்ரா திட்டத்தின்கீழ் இது வரையில் 5 கோடியே 44 லட்சத்து 79 ஆயிரத்து 763 வேலை வாய்ப்புகள் உருவாக்கப்பட்டுள்ளன. இவற்றில் 3 கோடியே 77 லட்சத்து 53 ஆயிரத்து 217 நேரடி வேலை வாய்ப்புகளும், 1 கோடியே 67 லட்சத்து 26 ஆயிரத்து 545 மறைமுகவேலை வாய்ப்புகளும் அடங்கும் என கூறப்பட்டுள்ளது.

    இதுபற்றி ஸ்கொச் குரூப் தலைவர் சமீர் கொச்சார் கூறியதாவது:–

    மோடி அரசின் இருண்ட குதிரையாக (வெளியே முழுமையாக தெரியாத வெற்றிகரமான திட்டமாக) ‘முத்ரா’ திட்டம் உருவாகி உள்ளது. நாடு எதிர்கொண்டுள்ள மிக முக்கியமான பிரச்சினைக்கு (வேலையில்லா திண்டாட்டம்) இந்த திட்டம் தீர்வாகி வருகிறது. இந்த திட்டம் சிறு தொழில் முனைவோரை உருவாக்கி வருகிறது. வேலை வாய்ப்புகளை உருவாக்குவதில் முக்கிய பங்காற்றுகிறது.

    இந்த திட்டத்தின்கீழ் இதுவரையில் ரூ.3 லட்சத்து 42 ஆயிரம் கோடி கடன் வழங்கப்பட்டுள்ளது. 8 கோடி பேருக்கும் அதிகமானோர் இந்தக் கடனைப் பெற்றுள்ளனர்.

    இவ்வாறு அவர் கூறினார்.

     

     

    News