" Work hard, stay humble, and follow your heart."

‘சிம்’ கார்டுடன் ஆதார் எண்ணை இணைக்காவிட்டால் செல்போன் இணைப்பு துண்டிக்கப்படும்

Views - 45     Likes - 0     Liked


  • நாடு முழுவதும் கோடிக்கணக்கான செல்போன் வாடிக்கையாளர்கள் உள்ளனர். இதில் பெரும்பாலானோர் ‘பிரிபெய்டு’ முறையிலான சிம்கார்டை பயன்படுத்தி வருகின்றனர். இதில் போலி பெயர் மற்றும் முகவரியில் ஏராளமான செல்போன்கள் பயன்படுத்தப்பட்டு வருவதாக புகார் எழுந்தது.

    குறிப்பாக பயங்கரவாதிகள் மற்றும் சமூக விரோதிகள் போலியான பெயரில் சிம் கார்டுகளை பெற்று சட்டவிரோத நடவடிக்கைகளுக்கு பயன்படுத்துவதாகவும், எனவே இந்த சிம் கார்டுகளின் விவரங்களை சரிபார்க்குமாறு அரசுக்கு உத்தரவிடக்கோரியும் லோக்நிதி அறக்கட்டளை என்ற நிறுவனம் சுப்ரீம் கோர்ட்டில் வழக்கு தொடர்ந்தது.

    கடந்த பிப்ரவரி மாதம் இந்த மனுவை விசாரித்த சுப்ரீம் கோர்ட்டு நாடு முழுவதும் பயன்பாட்டில் உள்ள சிம் கார்டுகளுடன் ஆதார் எண்ணை இணைத்து சரி பார்ப்பதற்கான நடவடிக்கைகளை ஒரு ஆண்டுக்குள் முடிக்க வேண்டும் என மத்திய அரசுக்கு உத்தரவிட்டது. மேலும் இதற்கான நெறிமுறைகளை வகுத்து கோர்ட்டில் விரைவில் தாக்கல் செய்யுமாறும் நீதிபதிகள் அறிவுறுத்தி இருந்தனர்.

    இதைத்தொடர்ந்து சிம் கார்டுடன் ஆதார் எண்ணை இணைப்பதற்கான நடவடிக்கைகளில் மத்திய அரசு துரிதமாக ஈடுபட்டு உள்ளது. இதன் தொடர்ச்சியாக, அடுத்த ஆண்டு (2018) பிப்ரவரிக்குள் சிம் கார்டுடன் ஆதார் எண்ணை இணைக்க வேண்டும் எனவும், தவறும்பட்சத்தில் செல்போன் இணைப்பு துண்டிக்கப்படும் எனவும் மத்திய அரசு வட்டாரங்கள் தகவல் வெளியிட்டு உள்ளன.

    இதன் மூலம் சமூக விரோதிகள், குற்றவாளிகள் மற்றும் பயங்கரவாதிகள் சட்ட விரோத செயல்களுக்கு சிம் கார்டுகளை பயன்படுத்துவது தடுக்கப்படும் எனவும் அதில் கூறப்பட்டு உள்ளது. இவ்வாறு சிம் கார்டுடன் ஆதார் இணைக்கும் போது வாடிக்கையாளர்களின் தனிப்பட்ட விவரங்களை செல்போன் நிறுவனங்கள் சேகரிக்க முடியாது எனவும் அதிகாரிகள் தெரிவித்தனர்.

    ஏனெனில் வாடிக்கையாளர்களிடம் இருந்து பெறப்படும் உயிரி தொழில்நுட்ப தகவல்கள் அனைத்தும் மறைக்கப்பட்டு, ஆதார் ஆணையத்துக்கு அனுப்பி வைக்க வேண்டும் எனக்கூறியுள்ள அதிகாரிகள், வாடிக்கையாளர்களின் இத்தகைய தனிப்பட்ட விவரங்களை சேகரித்தால் அது ஆதார் சட்டப்படி 3 ஆண்டு வரை சிறைத்தண்டனை பெறக்கூடிய குற்றமாகும் என்றும் அரசு வட்டாரங்கள் கூறியுள்ளன.

    News