" “Not only must we be good, but we must also be good for something.” – Henry David Thoreau"

நாகர்கோவிலில் சீல்` வைக்கப்பட்ட பெட்ரோல் ‘பங்க்’ இடித்து அகற்றம்

Views - 47     Likes - 0     Liked


  • நாகர்கோவில் வேப்பமூடு சந்திப்பு பகுதியில் நகராட்சிக்கு சொந்தமான இடத்தில் ஒரு பெட்ரோல் ‘பங்க்‘ செயல்பட்டு வந்தது. இந்தப்பகுதியில் ஏற்படும் போக்குவரத்து நெருக்கடிக்கு தீர்வு காண, பெட்ரோல் ‘பங்க்‘ செயல்பட்டு வந்த இடத்தை நகராட்சி நிர்வாகம் கையகப்படுத்தி மக்கள் பயன்பாட்டுக்கு கொண்டுவர நடவடிக்கை எடுத்தது. அதையடுத்து நகராட்சி ஆணையர் சரவணக்குமார் உத்தரவின்பேரில், அதிகாரிகள் பெட்ரோல் ‘பங்க்‘கை அகற்றிக்கொள்ளுமாறு அதன் நிர்வாகிகளுக்கு நோட்டீஸ் கொடுத்தனர்.

    இதை எதிர்த்து பெட்ரோல் ‘பங்க்‘ நிர்வாகத்தினர் கோர்ட்டில் மனு தாக்கல் செய்தனர். இந்த மனு தள்ளுபடி ஆனது. அதைத்தொடர்ந்து நகராட்சி அதிகாரிகள் சம்பந்தப்பட்ட பெட்ரோல் பங்கை கைப்பற்றி, ‘சீல்` வைத்தனர். அதன்பிறகும் பெட்ரோல் பங்க் நிர்வாகத்தினர் நகராட்சிக்கு எதிராக கோர்ட்டில் மனு தாக்கல் செய்தனர். அந்த மனுவும் தள்ளுபடி ஆனது.


    எனவே நேற்று பெட்ரோல் பங்க் செயல்பட்ட இடத்தில் இருந்த அறை மற்றும் கட்டுமானங்களை இடித்து அகற்றும் பணி நடந்தது. நகரமைப்பு அதிகாரி கெபின் ஜாய் தலைமையிலான அதிகாரிகள் மற்றும் நகராட்சி ஊழியர்கள் பொக்லைன் எந்திரம் மூலம் இதனை அகற்றினர்.

    அங்கிருந்து அகற்றப்பட்ட பொருட்கள் அனைத்தையும் நகராட்சி வாகனங்களில் ஏற்றி நகராட்சி அலுவலகத்துக்கு கொண்டு சென்றனர். மேலும் அவற்றை நகராட்சி அதிகாரிகள் ஏலம் விடுவதற்கான நடவடிக்கைகளையும் மேற்கொண்டு வருகிறார்கள்.


    வேப்பமூடு சந்திப்பு பகுதியில் சாலையை விரிவுபடுத்துவது தொடர்பாக நெடுஞ்சாலைத்துறை அதிகாரிகளுடன் நகராட்சி அதிகாரிகளுடன் கலந்து பேச உள்ளனர். பெட்ரோல் பங்க் செயல்பட்ட இடத்தில் இருந்து சாலை விரிவாக்கத்துக்கு தேவையான இடத்தை நெடுஞ்சாலைத்துறைக்கு வழங்கிய பின்னர், மீதமுள்ள இடத்தை வாகன நிறுத்தத்துக்கு பயன்படுத்துவதா? அல்லது நகராட்சி பூங்காவுடன் இணைப்பதா? என முடிவு செய்யப்படும் என நகராட்சி அதிகாரிகள் தெரிவித்தனர்.

    News