" “May you live all the days of your life.” – Jonathan Swift."

குழந்தைகளுக்கு ரோட்டா வைரஸ் தடுப்பு சொட்டு மருந்து வழங்கும் பணி கலெக்டர் தொடங்கி வைத்தார்

Views - 77     Likes - 0     Liked


  • பொது சுகாதாரம் மற்றும் நோய்த்தடுப்பு மருத்துவத்துறை மூலம் தேசிய தடுப்பூசி திட்டத்தின்கீழ் ரோட்டா வைரஸ் தடுப்பு சொட்டு மருந்து வழங்கும் பணியின் தொடக்க நிகழ்ச்சி நாகர்கோவில் கிருஷ்ணன்கோவில் நகர்ப்புற ஆரம்ப சுகாதார நிலையத்தில் நேற்று  நடந்தது. 

    நிகழ்ச்சியில் கலெக்டர் சஜ்ஜன்சிங் சவான் கலந்து கொண்டு குழந்தைகளுக்கு ரோட்டா வைரஸ் தடுப்பு சொட்டு மருந்து வழங்கி, பணியை தொடங்கி வைத்தார்.

    பின்னர் அவர் கூறியதாவது:–

    இந்தியாவில் ஒவ்வொரு ஆண்டும் 5 வயதிற்கு உட்பட்ட குழந்தைகளின் இறப்புகளில் தோராயமாக 13 சதவீதம் அதாவது 3 லட்சம் இறப்புகள் வயிற்றுப்போக்கின் காரணமாக ஏற்படுகிறது. வயிற்றுக்போக்குகளில் 40 சதவீதம் ரோட்டா வைரஸ் கிருமி தொற்றினால் ஏற்படுகிறது. ஒரு வருடத்தில் தோராயமாக 32.7 லட்சம் குழந்தைகள் புற நோயாளிகளாகவும், 8.72 லட்சம் குழந்தைகள் உள்நோயாளிகளாகவும் இத்தொற்றினால் ஏற்படும் வயிற்றுப்போக்குக்காக சிகிச்சை பெறுகின்றனர். 

    இதில் ஒரு வருடத்தில் 78 ஆயிரம் குழந்தைகள் இத்தொற்றினால் ஏற்படும் வயிற்றுப்போக்கினால் இறக்கின்றனர். வயிற்றுப்போக்கின் தாக்கம் மற்றும் இறப்புகளை முழுமையாக கட்டுப்படுத்துவதற்கு ஒருங்கிணைந்த அணுகுமுறை மிகவும் அவசியம்.

    அதன்படி ரோட்டா வைரஸ் தடுப்பு மருந்துகள் அளித்தல், தனிமனித மற்றும் சுற்றுப்புறத்தில் சுகாதாரம் பேணுதல், தாய்ப்பால் அளிப்பதை ஊக்குவித்தல், குழந்தைக்கு உணவூட்டுவதை நிறுத்தாமல் தொடர்ந்து அளித்தல் மற்றும் வைட்டமின் – ஏ திரவம், ஓ.ஆர்.எஸ். மற்றும் துத்தநாக மாத்திரை அளித்தல் ஆகிய சிகிச்சை முறைகளும் பரிந்துரைப்படுகின்றன.

     இந்தியாவில் தேசிய தடுப்பூசி திட்டத்தின் கீழ் ரோட்டா வைரஸ் தடுப்பு மருந்து படிப்படியாக கொடுக்கப்பட உள்ளது. 


    முதற்கட்டமாக இத்தடுப்பு மருந்து அரியானா, இமாச்சல பிரதேசம், ஆந்திரா மற்றும் ஒடிசா ஆகிய 4 மாநிலங்களில் வெற்றிகரமாக கடந்த ஆண்டு மார்ச் மாதம் அறிமுகப்படுத்தப்பட்டது. தற்போது இரண்டாம் கட்டமாக தமிழ்நாடு, ராஜஸ்தான், மத்திய பிரதேசம், அசாம் மற்றும் திரிபுரா மாநிலங்களில் விரிவுபடுத்தப்பட்டுள்ளது. இம்மருந்து மூன்று தவணைகளாக முறையே 1½, 2½  மற்றும் 3½ மாதங்களில் கொடுக்கப்படும். மற்ற மருந்துகளுடன் சேர்ந்தே, 5 சொட்டுகள் வாய் வழியாக கொடுக்கப்படும். 

     குமரி மாவட்டத்தில் வருடந்தோறும் ஒரு வயதுக்கு உட்பட்ட 23 ஆயிரம் குழந்தைகள் இத்திட்டத்தின்மூலம் பயனடைவார்கள் என எதிர்பார்க்கப்படுகிறது. 

    இவ்வாறு கலெக்டர் சஜ்ஜன்சிங் சவான் கூறினார்.

    நிகழ்ச்சியில் சுகாதார பணிகள் துணை இயக்குனர் மதுசூதனன், நகர்நல அதிகாரி (நாகர்கோவில்) வினோத்ராஜா, அரசு டாக்டர்கள் மற்றும் செவிலியர்கள் உள்பட பலர் கலந்து கொண்டனர்.

    News