" “Even the worst days have an ending, and the best days have a beginning.”"

கையகப்படுத்திய நிலத்துக்கு இழப்பீடு வழங்காததால் கலெக்டர் கார், அலுவலக கம்ப்யூட்டர்கள் ஜப்தி

Views - 55     Likes - 0     Liked


  • நாகர்கோவில் இருளப்பபுரம் பகுதியை சேர்ந்தவர் சிவகாமி அம்மாள். இவருடைய மகன் பிரபு. வக்கீலாக பணியாற்றி வருகிறார். இவர்களுக்கு சொந்தமாக 21 சென்ட் நிலம் வல்லன்குமாரன்விளையில் இருந்தது. இவரின் நிலத்தையடுத்து, இவர்களின் உறவினரான சண்முகசுந்தரம் என்பவருக்கு சொந்தமாக 21 சென்ட் நிலம் இருந்தது.

    இந்தநிலையில் கடந்த 1993–ம் ஆண்டு, இருளப்பபுரம்–வல்லன்குமாரன்விளை பகுதியில் தமிழ்நாடு வீட்டு வசதி வாரியம் சார்பில் கட்டிடம் கட்டுவதற்காக, பிரபு மற்றும் சண்முகசுந்தரம் ஆகியோருக்கு சொந்தமான 42 சென்ட் நிலத்தை இழப்பீட்டின் அடிப்படையில் அதிகாரிகள் கையகப்படுத்தியதாக தெரிகிறது. நிலத்தின் அப்போதைய மதிப்பின் அடிப்படையில் சென்ட் ஒன்றிற்கு ரூ.3 ஆயிரத்து 50 வீதம் 42 சென்ட்டுக்கும் மதிப்பு கணக்கிடப்பட்டு இழப்பீடு வழங்க அதிகாரிகள் தரப்பில் உறுதி அளிக்கப்பட்டது.

    அதன்படி இழப்பீட்டு தொகையில், சிறிது தொகையை அரசு தரப்பில் இருந்து சண்முகசுந்தரம் மற்றும் பிரபு குடும்பத்தினர் பெற்றதாக தெரிகிறது. இதையடுத்து, அவர்களுக்கு வழங்க வேண்டிய பாக்கி தொகை தருவதில் அரசு தரப்பில் தாமதம் ஏற்பட்டதாக கூறப்படுகிறது.

    இதுகுறித்து 1994–ம் ஆண்டு சண்முகசுந்தரம் மற்றும் பிரபு தரப்பில் கோர்ட்டில் வழக்கு தொடரப்பட்டது. வழக்கு விசாரணையின் முடிவில், வழக்குதாரர்களுக்கு ரூ.3 லட்சத்து 20 ஆயிரத்தை முதல் வருடத்திற்கு 9 சதவீத வட்டியுடன் வழங்க வேண்டும் எனக்கூறி கோர்ட்டு உத்தரவிட்டது. இதன் பின்னரும், இழப்பீடு தொகையை கொடுப்பதில் அரசு தரப்பில் தாமதப்படுத்தியதாக தெரிகிறது.

    எனவே இதுதொடர்பாக கடந்த 2005–ம் ஆண்டு நிறைவேற்று மனு தாக்கல் செய்யப்பட்டு, வழக்கு மீண்டும் விசாரணைக்கு எடுத்துக்கொள்ளப்பட்டது. இந்த வழக்கு நாகர்கோவிலில் உள்ள முதலாவது கூடுதல் சார்பு நீதிமன்றத்தில் நடந்து வந்தது. இந்தநிலையில் தற்போது வழக்கு விசாரணை முடிவில், இழப்பீடு வழங்காத காரணத்திற்காக, கலெக்டர் கார் மற்றும் கலெக்டர் அலுவலகத்தில் உள்ள 10 கம்ப்யூட்டர்களை ஜப்தி செய்யுமாறு நீதிபதி அமிர்தவேலு உத்தரவிட்டார்.

    அதன்படி, கோர்ட்டு ஊழியர்கள் போலீஸ் பாதுகாப்புடன் நேற்று நாகர்கோவிலில் குமரி மாவட்ட கலெக்டர் அலுவலக வளாகத்தில் நின்ற கலெக்டரின் கார் மற்றும் அலுவலகத்தில் உள்ள 10 கம்ப்யூட்டர்களை ஜப்தி செய்தனர்.

    இழப்பீடு வழங்காத காரணத்தால், மாவட்ட கலெக்டரின் கார் மற்றும் அலுவலகத்தில் உள்ள கம்ப்யூட்டர்கள் ஜப்தி செய்யப்பட்ட சம்பவம் கலெக்டர் அலுவலக வளாகத்தில் நேற்று பரபரப்பை ஏற்படுத்தியது.

    News