" “Not only must we be good, but we must also be good for something.” – Henry David Thoreau"

4,820 சிறப்பு பஸ்கள் இயக்கப்படுகிறது தீபாவளி கூட்ட நெரிசலை சமாளிக்க ஏற்பாடு

Views - 39     Likes - 0     Liked


  • தீபாவளி பண்டிகையை முன்னிட்டு போக்குவரத்து துறை மூலம் இயக்கப்படும் சிறப்பு பஸ்கள் மற்றும் சிறப்பு ஏற்பாடுகள் குறித்த ஆலோசனை கூட்டம் சென்னை பல்லவன் சாலையில் உள்ள மாநகர் போக்குவரத்து கழக பதிவு அலுவலகத்தில் நேற்று நடைபெற்றது. இந்த கூட்டத்துக்கு போக்குவரத்து துறை அமைச்சர் எம்.ஆர்.விஜயபாஸ்கர் தலைமை தாங்கினார்.
     
    இதில் போக்குவரத்து துறை கூடுதல் தலைமைச் செயலாளர் பி.டபுள்யூ.சி.டேவிதார், இணை செயலாளர் எஸ்.நடராஜன், இணை கமிஷனர் வேலுச்சாமி உள்பட அதிகாரிகள் பலர் கலந்து கொண்டனர். கூட்டம் முடிந்ததும், அமைச்சர் எம்.ஆர்.விஜயபாஸ்கர் நிருபர்களுக்கு பேட்டியளித்தார்.
     
    அப்போது அவர் கூறியதாவது:-
     
    சென்னையில் இருந்தும் பிற ஊர்களில் இருந்தும் சொந்த ஊர்களுக்கு செல்வதற்கான போக்குவரத்து சிரமம் இல்லாமல் அமைய வேண்டும் என்ற அடிப்படையில் சென்ற ஆண்டு தீபாவளி, பொங்கல் பண்டிகை காலங்களில் சென்னை கோயம்பேடு உள்பட 5 இடங்களில் இருந்து 4 ஆயிரத்து 208 சிறப்பு பஸ்கள் இயக்கப்பட்டன.
     
    அதேபோல் இந்த ஆண்டும் சிறப்பான ஏற்பாடுகளை செய்து வருகிறோம். இந்த ஆண்டு தீபாவளி பண்டிகையை முன்னிட்டு அடுத்த மாதம் (அக்டோபர்) 15, 16, 17 ஆகிய தேதிகளில் தினசரி இயக்கக்கூடிய 2 ஆயிரத்து 275 பஸ்களுடன், 4 ஆயிரத்து 820 சிறப்பு பஸ்கள் இயக்கப்பட உள்ளன. மறுமார்க்கமாக 20, 21, 22 ஆகிய தேதிகளிலும் சிறப்பு பஸ்கள் இயக்கப்பட இருக்கின்றது.
     
    தற்போது வரை 32 ஆயிரத்து 204 பயணிகள் முன்பதிவு செய்துள்ளனர். தொடர்ந்து முன்பதிவு நடைபெற்று வருகிறது. சென்ற ஆண்டு சென்னையில் இருந்து மட்டும் 16 ஆயிரத்து 195 பஸ்கள் மொத்தமாக இயக்கப்பட்டன. அதில் 5 லட்சத்து 43 ஆயிரம் பயணிகள் பயணம் செய்தனர். அதில் 92 ஆயிரம் பேர் முன்பதிவு மூலம் பயணம் செய்து இருக்கிறார்கள்.
     
    இந்த ஆண்டும் சென்னை கோயம்பேடு, தாம்பரம், பூந்தமல்லி, ஊரப்பாக்கம் உள்பட 5 இடங்களில் இருந்து பஸ்கள் இயக்கப்பட உள்ளன. மேலும் கே.கே.நகர், கிண்டி ஆகிய 2 இடங்களில் எந்த பகுதியில் இருந்து பயணிகளின் வசதிக்காக பஸ்களை இயக்கலாம் என்று போலீசாரும், போக்குவரத்து துறை அதிகாரிகளும் ஆய்வு செய்து வருகின்றனர். விரைவில் அதை தெரிவிப்போம்.
     
    கோவை, திருச்சி, சேலம், மதுரை போன்ற ஊர்களில் இருந்தும் பிற இடங்களுக்கு செல்ல பஸ்கள் இயக்கப்பட உள்ளன. சென்னையில் இருந்து போகக்கூடிய பஸ்கள் ரிங் ரோடு வழியாக சென்றால் போக்குவரத்து இடையூறு இல்லாமல் இருக்கும் என்று அதிகாரிகள் தெரிவித்தனர். அதன்படி பஸ்களை இயக்க திட்டமிட்டு இருக்கிறோம்.
     
    நெரிசல் மிகுந்த நேரத்தில் கனரக வாகனங்களை சென்னை புறநகர் பகுதியில் நிறுத்தி வைப்பதற்கான வசதியும் செய்வது தொடர்பாக கலந்து ஆலோசித்து வருகிறோம்.
     
    பண்டிகை காலங்களில் ஆம்னி பஸ்கள் அதிகம் கட்டணம் வசூலித்தால் கடுமையான நடவடிக்கை எடுக்கப்படும். ஏற்கனவே அதிக கட்டணம் வசூலித்ததாக 57 ஆம்னி பஸ்கள் சிறைப்பிடிக்கப்பட்டுள்ளன. இதனால் அதிக கட்டணம் வசூலிப்பது குறைந்துள்ளது. கடந்த முறை பஸ்கள் அதிகளவில் பழுதாகி இருந்ததாக புகார்கள் வந்தன.
     
    அதை சரிசெய்து இருக்கிறோம். தீபாவளி பண்டிகைக்காக இயக்கப்படும் சிறப்பு பஸ்களில் பழுதான பஸ்கள் என்ற புகார்கள் இனி வராது. மறைமுக கட்டணம் எதுவும் உயர்த்தப்படவில்லை. அடிப்படை கட்டணம் உயர்த்தி இருப்பதாக தகவல்கள் வருகின்றன. அது உண்மை இல்லை.
     
    இவ்வாறு அவர் கூறினார்.
    News