" “Not only must we be good, but we must also be good for something.” – Henry David Thoreau"

திருவள்ளுவர் சிலை - விவேகானந்தர் பாறை இடையே இணைப்பு பாலம் அமைக்க திட்ட மதிப்பீடு தயாரிப்பு

Views - 47     Likes - 0     Liked


  • சர்வதேச சுற்றுலா தலமான கன்னியாகுமரிக்கு தினமும் ஏராளமான வெளிநாட்டு மற்றும் உள்நாட்டு சுற்றுலா பயணிகள் வந்து செல்கிறார்கள். சுற்றுலாவை ஊக்குவிக்கவும், இன்னும் ஏராளமான சுற்றுலா பயணிகளை கன்னியாகுமரிக்கு வரவழைக்கவும் மாவட்ட நிர்வாகம் சார்பில் ஆண்டு தோறும் பல்வேறு நடவடிக்கைகள் எடுக்கப்படுகிறது.

    செப்டம்பர் மாதம் 27-ந் தேதி உலக சுற்றுலா தின விழா கொண்டாடப்படுகிறது. அதன்படி கன்னியாகுமரி படகு துறையில் நேற்று உலக சுற்றுலா தின விழா கொண்டாடப்பட்டது.

    விழாவையொட்டி மாவட்ட கலெக்டர் சஜ்ஜன் சிங் சவான் நேற்று அதிகாலையிலேயே கன்னியாகுமரிக்கு வந்தார்.

    அவர் கன்னியாகுமரிக்கு வந்த வெளிநாட்டு சுற்றுலா பயணிகளுக்கு சங்கு மாலை அணிவித்தும், நெற்றியில் திலகமிட்டும் வரவேற்றார்.

    இந்த நிகழ்ச்சியில், மாவட்ட சுற்றுலா அதிகாரி நெல்சன், பூம்புகார் கப்பல் போக்குவரத்து கழக மேலாளர் சுடலை முத்து, தமிழ்நாடு சுற்றுலா வளர்ச்சி கழக மேலாளர் ஜாக்சன் வில்லியம், இணை மேலாளர் அசோக், பேரூராட்சிகளின் உதவி இயக்குனர் மாடசாமி சுந்தர்ராஜ், உதவி பொறியாளர் பாண்டியராஜன், பூம்புகார் கப்பல் போக்குவரத்து கழக அண்ணா தொழிற்சங்க தலைவர் ராஜேஷ், செயலாளர் வெங்கடாச்சலம், பொருளாளர் வனமூர்த்தி, தமிழ்நாடு கடல்சார் வாரிய துறைமுக பாதுகாப்பு அதிகாரி மாரி செல்வன் உள்பட பலர் கலந்து கொண்டனர்.

    விழாவையொட்டி கன்னியாகுமரியில் நேற்று கிராமிய கலை நிகழ்ச்சிகள் நடந்தன. தப்பாட்டம், கரகாட்டமும் களை கட்டியது.

    இதனை கன்னியாகுமரிக்கு வந்த வெளிநாட்டு சுற்றுலா பயணிகள் ஆர்வமுடன் கண்டு ரசித்தனர். அவர்களுடன் உள்ளூர் பயணிகளும் நிகழ்ச்சியை கண்டு களித்தனர்.

    சுற்றுலா தினவிழாவில் பங்கேற்ற கலெக்டர் சஜ்ஜன் சிங் சவான் நிருபர்களிடம் கூறியதாவது:-

    கன்னியாகுமரிக்கு கடந்த ஆண்டு 85 லட்சம் சுற்றுலா பயணிகள் வந்துள்ளனர். இந்த ஆண்டு செப்டம்பர் மாதம் வரை 75 லட்சம் சுற்றுலா பயணிகள் வந்துள்ளனர். கடந்த ஆண்டை காட்டிலும் இந்த ஆண்டு கூடுதல் சுற்றுலா பயணிகள் வருவார்கள் என நம்புகிறோம்.

    குமரி மாவட்டத்தில் கன்னியாகுமரியை தவிர இன்னும் பல சுற்றுலா தலங்கள் உள்ளன. அவற்றை மத்திய, மாநில அரசுகளின் நிதி உதவியுடன் மேம்படுத்த முயற்சி மேற்கொண்டு வருகிறோம்.

    திருவள்ளுவர் சிலை - விவேகானந்தர் பாறை இடையே இணைப்பு பாலம் அமைக்க திட்ட மதிப்பீடு தயாரிக்கப்பட்டுள்ளது. விரைவில் இந்த பணிகள் தொடங்க நடவடிக்கை எடுக்கப்படும். ஆசிய வங்கி நிதி உதவியுடன் சுற்றுலா வளர்ச்சி திட்டங்கள் நிறைவேற்றப்படும்.

    இவ்வாறு அவர் கூறினார். 

    News