" “Yesterday is history. Tomorrow is a mystery. .."

ரூ. 7 லட்சம் கோடியில் தேசிய நெடுஞ்சாலை திட்டம் மத்திய மந்திரிசபை ஒப்புதல்

Views - 69     Likes - 0     Liked


  • நமது நாட்டில் சாலைகள் மிக மோசமான நிலையில் உள்ளன. சர்வதேச தரத்தில் இல்லை. இதன் காரணமாக ஒரு சரக்கு லாரி நாள் ஒன்றுக்கு 250-300 கி.மீ. தொலைவைத்தான் கடக்க முடிகிறது. இதுவே வளர்ந்த நாடுகளில் இரு மடங்கையும் தாண்டி 700-800 கி.மீ. அளவாக உள்ளது.
     
    எனவே நமது நாட்டிலும் சாலை வசதிகளை மேம்படுத்த மத்திய அரசு முடிவு எடுத்துள்ளது. இப்படி அடிப்படை கட்டமைப்பு வசதிகள் பெருகுகிறபோது, அது அன்னிய நேரடி முதலீடுகளை பெருக்க ஒரு வாய்ப்பாக அமையும்.
     
    சுமார் ரூ. 7 லட்சம் கோடி
     
    இந்த நிலையில், தலைநகர் டெல்லியில் மத்திய மந்திரிசபை கூட்டம், பிரதமர் நரேந்திர மோடி தலைமையில் நேற்று நடந்தது. இந்த கூட்டத்தில் சுமார் ரூ. 7 லட்சம் கோடி (சரியாக ரூ.6.9 லட்சம் கோடி) மதிப்பிலான தேசிய நெடுஞ்சாலை திட்டத்துக்கு ஒப்புதல் வழங்கப்பட்டது.
     
    இந்த திட்டத்தின் சிறப்பு அம்சங்கள் வருமாறு:-
     
    * இந்த திட்டத்தின் கீழ் ஏறத்தாழ 83 ஆயிரம் கி.மீ. தொலைவிலான சாலைகள் மேம்படுத்தப்படும்; விரிவுபடுத்தப்படும். திட்டத்தின் காலம் 5 ஆண்டுகள். 2022-ம் ஆண்டில் நிறைவு பெறும்.
     
    * நாட்டின் எல்லைப்பகுதிகளை இணைக்கிற 28 ஆயிரத்து 400 கி.மீ. தொலைவிலான பாரத்மாலா திட்டம், இந்த நெடுஞ்சாலை திட்டத்தில் ஒரு அங்கமாக அமைந்துள்ளது. இந்த திட்டம் என்.எச்.டி.பி. என்னும் தேசிய நெடுஞ்சாலை வளர்ச்சி திட்டத்துக்கு அடுத்த பெரிய திட்டமாக அமையும்.
     
    பொருளாதாரம் சூடுபிடிக்கும்
     
    * இந்த திட்டத்தின்மூலம் பொருளாதார நடவடிக்கைகள் சூடு பிடிக்கும். அடுத்த 5 ஆண்டுகளில் 32 கோடி மனித வேலை நாட்கள் உருவாகும்.
     
    * முக்கிய வழித்தடங்களில் போக்குவரத்து சுமுகமாக நடைபெற ஏதுவாக, இரு முனைகள் இடையே ஒரே மாதிரியான 4 வழிப்பாதை அமைக்கப்படும். இவற்றில் பெரும்பாலான சாலைகள், சரக்கு வாகனங்கள் துரிதமாக செல்வதற்கு வசதியாக அமையும்.
     
    இந்த திட்டம் குறித்து மூத்த அதிகாரி ஒருவர் கூறுகையில், “ புதிதாக போடுகிற சாலைகள், மேம்படுத்தப்படும் சாலைகளை உள்ளடக்கிய புதிய நெடுஞ்சாலை திட்டம், வாகன போக்குவரத்து செலவினை குறைப்பதை நோக்கமாக கொண்டுள்ளது. சிறப்பான சாலைவசதி, சாலை போக்குவரத்து துறையை மாற்றி அமைக்கும்” என்று குறிப்பிட்டார்.
     
    குஜராத் சட்டசபை தேர்தல் தேதி அறிவிக்கப்பட உள்ள நிலையில், சுமார் ரூ. 7 லட்சம் கோடி மதிப்பிலான இந்த நெடுஞ்சாலை திட்டத்துக்கு மத்திய மந்திரிசபை ஒப்புதல் வழங்கி இருப்பது முக்கியத்துவம் பெற்றுள்ளது. 

     

    News