" “The best preparation for tomorrow is doing your best today.”"

ஜல்லிக்கட்டில் காயமடைந்தால் இழப்பீடு வழங்க முடியாது: உயர் நீதிமன்றம் உத்தரவு

Views - 40     Likes - 0     Liked


  • ஜல்லிக்கட்டில் காயம் அடைந்தவருக்கு இழப்பீடு கேட்பது ஜல்லிக்கட்டுக்கு தடை விதிப்பதற்கான வாய்ப்பை உருவாக்கும். எனவே ஜல்லிக்கட்டில் காயம் அடைந்தவர்களுக்கு இழப்பீடு வழங்க முடியாது என உயர் நீதிமன்ற நீதிபதி தெரிவித்தார்.

    புதுக்கோட்டை மாவட்டம் ஆவுடையார் கோயில் அருகே உள்ள ஒடுக்கூரைச் சேர்ந்த எம்.தேவராசன், உயர் நீதிமன்ற கிளையில் தாக்கல் செய்த மனு: விராலிமலை அருகே உள்ள செங்கலக்குடி கிராமத்தில் கடந்த மார்ச் மாதம் நடந்த ஜல்லிக்கட்டில் பங்கேற்றேன்.

    அப்போது காயமடைந்து திருச்சி அரசு மருத்துவமனையிலும், பின்னர் தீவிர சிகிச்சைக்காக தஞ்சாவூர் அரசு மருத்துவமனையிலும் சேர்க்கப்பட்டேன். ரத்த ஓட்டம் இல்லாததால் எனது இடது கால் அகற்றப்பட்டது.

    ஜல்லிக்கட்டுக்கு அதிகாரிகள் முறையான ஏற்பாடுகளை செய்திருந்தால் நான் ஒரு காலை இழந்திருக்கமாட்டேன். சம்பவம் நடைபெற்ற ஒரு மணி நேரம் கழித்தே என்னை மருத்துவமனையில் சேர்த்தனர். பத்து மணி நேரம் கடந்த பிறகே மருத்துவர்கள் எனக்கு சிகிச்சை அளித்தனர்.

    வருவாய், சுகாதாரம், காவல் ஆகிய துறை அதிகாரிகளின் கவனக்குறைவு காரணமாகவே நான் ஒரு காலை இழந்துள்ளேன். இதனால் ரூ.50 லட்சம் இழப்பீடு கோரி தமிழக அரசுக்கு ஜூலையில் மனு அனுப்பினேன். இதுவரை பதில் அளிக்கவில்லை. எனவே எனது மனுவின் அடிப்படையில் ரூ.50 லட்சம் இழப்பீடு மற்றும் 12 சதவீத வட்டி வழங்க உத்தரவிட வேண்டும் என கோரியிருந்தார்.

    இந்த மனு நீதிபதி ஆர்.மகாதேவன் முன்பு நேற்று விசாரணைக்கு வந்தது. மனுதாரர் சார்பில் வழக்கறிஞர் கணபதி சுப்பிரமணியன் வாதிட்டார்.

    விசாரணையின்போது, ‘தமிழர்களின் பாரம்பரிய விளையாட்டான ஜல்லிக்கட்டு தொடர்ந்து நடைபெற பல்வேறு தரப்பினரும் போராடி வருகின்றனர். ஜல்லிக்கட்டு விளையாட்டை முறையாக நடத்துவதற்கு விதிமுறைகள் வகுக்கப்பட்டுள்ளன. அப்படியிருக்கும்போது சொந்த விருப்பத்தின் பேரில் ஜல்லிக்கட்டில் பங்கேற்றுவிட்டு, இப்போது இழப்பீடு கோருவது ஜல்லிக்கட்டுக்கு தடை விதிப்பதற்கான சூழலை ஏற்படுத்தும். எனவே இழப்பீடு வழங்க முடியாது. மனுதாரர் சிகிச்சைக்கு உதவ கேட்டுக்கொண்டால் அந்த கோரிக்கையை பரிசீலிக்க தயார்’ என நீதிபதி தெரிவித்தார்.

    இதுதொடர்பாக இன்று பதில் அளிப்பதாக மனுதாரரின் வழக்கறிஞர் தெரிவித்தார். இதையடுத்து விசாரணை இன்றைக்கு ஒத்திவைக்கப்பட்டது.

    News