" “The best preparation for tomorrow is doing your best today.”"

நாகர்கோவிலில் புத்தன் அணை குடிநீர் திட்டத்தை கைவிடக்கோரி உண்ணாவிரதம்

Views - 65     Likes - 0     Liked


  • நாகர்கோவில், 

    புத்தன் அணையில் இருந்து நாகர்கோவில் நகருக்கு குழாய் மூலம் குடிநீர் கொண்டு வரும் திட்டத்தை கைவிடக்கோரியும், அதற்கு மாற்றாக ஆண்டில் 365 நாட்களும் தண்ணீர் கிடைக்கக்கூடிய உலக்கையருவி திட்டம், முக்கடல் அணையை தூர்வாரி ஆக்கிரமிப்புகளை அகற்றி அணையின் உயரத்தை உயர்த்தும் திட்டம், பழையாறு, வள்ளியாறு, குழித்துறை தாமிரபரணியாறு போன்ற ஆறுகளால் வீணாக கடலில் கலக்கும் நீரை தடுத்து நிறுத்தி குடிநீருக்கு பயன்படுத்தும் திட்டம், புத்தேரி குளம்– தேரூர் குளம் போன்ற குளங்களை தூர்வாரி செயல்படுத்தும் திட்டம் போன்ற மாற்று திட்டங்களை செயல்படுத்த வலியுறுத்தியும், குமரி மாவட்ட பூமி பாதுகாப்பு சங்க கூட்டமைப்பு சார்பில் நாகர்கோவில் கலெக்டர் அலுவலகம் முன் நேற்று உண்ணாவிரத போராட்டம் நடந்தது.

    போராட்டத்துக்கு மாவட்ட பூமி பாதுகாப்புச்சங்க கூட்டமைப்பு தலைவர் பத்மதாஸ் தலைமை தாங்கினார். நிர்வாகிகள் சக்திவேல் முருகன், மாடசாமி உள்பட பலர் முன்னிலை வகித்தனர். மாவட்ட பாசனத்துறை தலைவர் வின்ஸ் ஆன்றோ உண்ணாவிரத போராட்டத்தை தொடங்கி வைத்தார்.

    அரசியல் கட்சி நிர்வாகிகள்

     குமரி கிழக்கு மாவட்ட தி.மு.க.செயலாளர் சுரேஷ்ராஜன் எம்.எல்.ஏ., மார்க்சிஸ்ட் கம்யூனிஸ்டு கட்சியை சேர்ந்த முன்னாள் எம்.எல்.ஏ. லீமாரோஸ், ம.தி.மு.க. மாவட்ட செயலாளர் வக்கீல் வெற்றிவேல், த.மா.கா. மாநில துணைத்தலைவரும், முன்னாள் எம்.எல்.ஏ.வுமான குமாரதாஸ், மார்க்சிஸ்ட் லெனினிஸ்டு (விடுதலை) கட்சி மாவட்ட செயலாளர் அந்தோணிமுத்து, பா.ஜனதா சார்பில் திரவியம், காங்கிரஸ் கட்சியின் முன்னாள் மாவட்ட தலைவர் ராஜகோபால், ஆர்.எஸ்.ராஜன், கிருஷ்ணசாமி ஆசான், ராஜகுமார், முருகேசபிள்ளை, புலவர் செல்லப்பா உள்பட பலர் வாழ்த்தி பேசினர்.

    காலை 10 மணிக்கு தொடங்கிய இந்த உண்ணாவிரத போராட்டம் மாலை 5 மணி வரை நடந்தது. இதில் பூமி பாதுகாப்பு சங்க கூட்டமைப்பு நிர்வாகிகள், விவசாய சங்கங்களின் நிர்வாகிகள் ஏராளமானோர் கலந்து கொண்டனர்.

     முடிவில் கோரிக்கைகள் அடங்கிய மனு ஒன்றை பூமி பாதுகாப்பு சங்க கூட்டமைப்பு நிர்வாகிகள் கலெக்டர் அலுவலகத்தில் கொடுத்தனர்.

    News