" “May you live all the days of your life.” – Jonathan Swift."

குமரி மாவட்டத்தில் நிவாரண பணிகளுக்கு மத்திய அரசு ரூ.500 கோடி வழங்க வேண்டும் திருநாவுக்கரசர் பேட்டி

Views - 43     Likes - 0     Liked


  • ஒகி புயலால் ஏற்பட்ட பாதிப்புகளை பார்வையிடுவதற்காக தமிழக காங்கிரஸ் தலைவர் திருநாவுக்கரசர் நேற்று குமரி மாவட்டத்திற்கு வந்தார். சென்னையில் இருந்து விமானம் மூலம் திருவனந்தபுரம் வந்த அவர், அங்கிருந்து கார் மூலம் குமரி மாவட்டம் குழித்துறை அருகே உள்ள குறுமத்தூர் பகுதிக்கு சென்றார். அங்கு புயல் மழையால் சேதமடைந்த ரப்பர் மரங்களை பார்வையிட்டு சேத விவரங்கள் குறித்து கேட்டறிந்தார். மேலும், பாதிக்கப்பட்ட விவசாயிகளுக்கு ஆறுதல் கூறினார்.

    பின்னர், அவர் நிருபர்களுக்கு பேட்டி அளித்தார். அப்போது அவர் கூறியதாவது:-

    புயல், மழையால் குமரி மாவட்டம் வரலாறு காணாத அளவு பாதிக்கப்பட்டுள்ளது. நெல், வாழை, ரப்பர் போன்ற பயிர்கள் பெருமளவில் சேதமடைந்துள்ளன. வாழை விவசாயத்தை பொறுத்தமட்டில் ஒரு ஏக்கர் நிலத்திற்கு ரூ.2 லட்சம் வரை செலவாகும். ஆனால், தமிழக அரசு ஒரு ஏக்கருக்கு ரூ.14 ஆயிரம் மட்டுமே நிவாரண தொகையாக அறிவித்துள்ளது. இந்த தொகை போதுமானதாக இல்லை.

    குமரி மாவட்டத்தின் பொருளாதாரத்தை நிலைநிறுத்தும் ரப்பர் பயிருக்கு எந்த நிவாரணமும் அறிவிக்கப்படவில்லை. நான் பயணம் செய்து வந்த இடங்களில் சாலையோரம் பல மின்கம்பங்கள் முறிந்து கிடப்பதை பார்த்தேன். இதனால், அப்பகுதியில் மின்சாரம் தடைப்பட்டு பல பகுதிகள் இருளில் மூழ்கி உள்ளதாக சொன்னார்கள்.

    குடிநீர் தட்டுப்பாடும் பல இடங்களில் ஏற்பட்டுள்ளது. இவற்றை விரைவில் சீரமைக்க வேண்டும். இயற்கை சீற்றத்தால் இறந்தவர்களின் விவரங்களை முழுமையாக சேகரித்து நிவாரணம் வழங்க வேண்டும்.

    ஆழ்கடலுக்கு மீன்பிடிக்க சென்ற ஆயிரக்கணக்கான மீனவர்களின் விவரம் இன்னும் தெரியவில்லை. பலர் இறந்து உடல்கள் கரை ஒதுங்கியுள்ளதாக தகவல் வெளியாகி உள்ளது. பல மீனவர்கள் வேறு மாநிலங்களில் பாதுகாப்பாக கரை ஒதுங்கி இருப்பதாக கூறப்படுகிறது. ஒவ்வொருவரின் உயிரின் முக்கியத்துவத்தை அறிந்து அவர்களை தேடிக் கண்டுபிடிக்க வேண்டும்.

    அதிக அளவிலான கப்பல் கள், படகுகளை பயன்படுத்தி மீனவர்களை தேடிக் கண்டுபிடிக்க மத்திய அரசு நடவடிக்கை எடுக்க வேண்டும்.

    தமிழக முதல்-அமைச்சர் எடப்பாடி பழனிசாமி இதுவரை பாதிக்கப்பட்ட பகுதிகளை பார்வையிட வரவில்லை. இது மிகவும் வருத்தத்தை அளிக்கிறது.

    கடலில் மீன்பிடிக்க சென்று புயலின் தாக்கத்தால் மரணம் அடைந்தவர்களுக்கு கேரள அரசு ரூ.10 லட்சம் உதவித்தொகை வழங்கி வருகிறது. ஆனால், தமிழக அரசோ ரூ.4 லட்சம் அறிவித்து உள்ளது. கேரள அரசு வழங்குவதுபோல் தமிழக அரசும் உதவித்தொகையாக ரூ.10 லட்சமாக வழங்க வேண்டும். குமரி மாவட்ட நிவாரண பணிக்காக ரூ.25 கோடி ஒதுக்கப்பட்டுள்ளது. இந்த தொகை போதாது.

    குமரி மாவட்டத்தில் ஏற்பட்ட பாதிப்பை தேசிய பேரிடராக அறிவித்து மத்திய அரசு ரூ.500 கோடி வழங்க வேண்டும்.

    News