" If you fell down yesterday, stand up today."

வீட்டின் பூட்டை உடைத்து 10 பவுன் நகை திருட்டு மர்ம நபர்களை போலீஸ் தேடுகிறது

Views - 42     Likes - 0     Liked


  • நாகர்கோவில்,

    நாகர்கோவில் இருளப்பபுரத்தை சேர்ந்தவர் ஜோஸ் பொன்ராஜ் (வயது 69). இவருடைய மனைவி கடந்த சில மாதங்களுக்கு முன் இறந்துவிட்டார். அதன் பிறகு ஜோஸ் பொன்ராஜூடன், அவரது மகள் ஜெபனிஷா (32) வசித்து வந்தார். ஜெபனிஷாவின் கணவர் டார்வின்ராஜ். இவர் வெளிநாட்டில் வேலை பார்த்து வருகிறார். இவர்களுக்கு ஒரு மகள் உள்ளார்.

    இந்த நிலையில் ஜோஸ் பொன்ராஜ் மற்றும் ஜெபனிஷா ஆகியோர் நேற்று முன்தினம் மாலையில் அப்பகுதியில் உள்ள ஒரு ஆலயத்துக்கு பிரார்த்தனைக்காக சென்றனர். இதனால் வீட்டில் யாரும் இல்லை. பின்னர் இரவு 11 மணிக்கு மீண்டும் வீடு திரும்பினர். அப்போது வீட்டு முன் கதவின் பூட்டு உடைக்கப்பட்டு கதவு திறந்து கிடந்தது. இதைப்பார்த்து அவர்கள் அதிர்ச்சியடைந்தார்.

    பின்னர் வீட்டுக்குள் சென்று பார்த்தபோது பொருட்கள் ஆங்காங்கே சிதறிக்கிடந்தன. படுக்கை அறையில் இருந்த பீரோ கதவிலும் பூட்டு உடைக்கப்பட்டு இருந்தது. அதில் இருந்து துணிகள் கீழே கிடந்தன. பீரோவில், ஜோஸ் பொன்ராஜ் வைத்திருந்த 10 பவுன் நகையை காணவில்லை. வீட்டில் ஆள் இல்லாததை நோட்டமிட்ட யாரோ மர்ம நபர்கள் வீட்டுக்குள் புகுந்து நகையை திருடி சென்றது தெரியவந்தது.

    இதுபற்றி கோட்டார் போலீசுக்கு நேற்று காலை தகவல் தெரிவிக்கப்பட்டது. அதன்பேரில் போலீசார் அங்கு விரைந்து சென்று பார்வையிட்டு விசாரணை நடத்தினர். வீட்டில் கைவரிசை காட்டிய மர்ம நபர்கள் ஏதேனும் தடயங்களை விட்டுச் சென்றுள்ளார்களா? என்று போலீசார் ஆய்வு செய்தனர். இதனையடுத்து கைரேகை நிபுணர்கள் வந்து மர்ம நபர்களின் ரேகைகளை பதிவு செய்தனர். மோப்பநாயும் வரவழைக்கப்பட்டது. அந்த நாய் வீட்டில் எல்லா இடத்தை மோப்பம் பிடித்தது. பின்னர் வீட்டில் இருந்து சிறிது தூரம் வேகமாக ஓடியது. ஆனால் யாரையும் கவ்விப்பிடிக்கவில்லை.

    வீட்டுக்குள் புகுந்து நகையை திருடியது மட்டும் அல்லாமல், சமையலறைக்கும் சென்று பழங்கள் மற்றும் சமைத்து வைத்திருந்த உணவையும் மர்ம நபர்கள் நிதானமாக உட்கார்ந்து சாப்பிட்டு விட்டு சென்றுள்ளனர்.

    இந்த துணிகர திருட்டு குறித்து போலீசார் வழக்கு பதிவு செய்து மர்ம நபர்களை தேடி வருகிறார்கள். இச்சம்பவம் அப்பகுதியில் பரபரப்பை ஏற்படுத்தி உள்ளது.

    ஜோஸ் பொன்ராஜின் வீட்டை சுற்றிலும் காம்பவுண்டு சுவர் உள்ளது. சுவர் மீது ஏறி யாரேனும் மர்ம நபர்கள் வீட்டுக்குள் புகுந்துவிட கூடாது என்பதற்காக சுவரின் மேல் ஆணி மற்றும் உடைந்த கண்ணாடி பாட்டில்கள் பதித்து வைக்கப்பட்டுள்ளன. ஆனால் நகையை திருடி சென்ற மர்ம நபர்கள் சாமர்த்தியமாக தேங்காய் நெட்டுகளை ஆணி மற்றும் உடைந்த கண்ணாடி பாட்டில்கள் மீது வைத்துள்ளனர். பின்னர் லாவகமாக காம்பவுண்டு சுவர் மீது ஏறி குதித்து வீட்டுக்குள் புகுந்து உள்ளனர்.

     

    News