" “Not only must we be good, but we must also be good for something.” – Henry David Thoreau"

குமரி மாவட்டத்தில் புயல் சேதங்களை மத்திய குழுவினர் 2–வது நாளாக ஆய்வு

Views - 46     Likes - 0     Liked


  • நாகர்கோவில்,

    குமரி மாவட்டத்தில் ‘ஒகி‘ புயலால் ஏற்பட்ட பாதிப்புகளை பார்வையிட்டு சேதங்களை ஆய்வு செய்வதற்காக மத்திய குழுவினர் நேற்று முன்தினம் குமரி மாவட்டம் வந்தனர். அந்த குழுவில் மத்திய உள்துறை இணைச் செயலாளர் சஞ்சீவ்குமார் ஜிந்தால், கால்நடை பராமரிப்பு துறை மற்றும் மீன்வள ஆணையர் பால்பாண்டியன், மின்துறை துணை இயக்குனர் ஓ.பி.சுமன், கப்பல்துறை அதிகாரி பரமேஸ்வர் பாலி, வேளாண்மை கூட்டுறவு மற்றும் விவசாயிகள் நல இயக்குனர் மனோகரன் ஆகிய 5 பேர் இடம் பெற்றுள்ளனர்.

    இந்த குழுவினரும், தமிழக அரசின் உயர் அதிகாரிகளும் நேற்று முன்தினம் 3 பிரிவுகளாக பிரிந்து சென்று மீனவ கிராமங்களிலும், மலைப்பகுதிகளிலும், விவசாய நிலங்களிலும் ஏற்பட்ட சேதங்களை நேரில் ஆய்வு செய்தனர். பாதிப்புக்குள்ளான மக்களை சந்தித்து அவர்களின் குறைகளை கேட்டறிந்தனர்.

    இந்த நிலையில் மத்திய குழுவினரின் ஆய்வு நேற்று 2–வது நாளாக நடந்தது. நேற்றும் 3 பிரிவுகளாக தமிழக அரசு அதிகாரிகளுடன் சென்று ஆய்வு செய்தனர்.

    திருப்பதிசாரம் பகுதியில் மழை வெள்ளத்தால் சேதம் அடைந்த நெற்பயிர்களை பார்வையிட்டனர். பின்னர் வேளாண்மை ஆராய்ச்சி நிலையத்துக்கு சென்ற அதிகாரிகள், அங்கு புயலில் மரம் விழுந்து சேதம் அடைந்த கட்டிடத்தை ஆய்வு செய்தனர்.

    புயல்–மழையால் சேதம் அடைந்த சுமார் 10 டன் நெல் விதைகளையும் பார்த்தனர். அதை தொடர்ந்து சுசீந்திரம், கற்காடு, பறக்கை, வடக்கு தாமரைகுளம் ஆகிய பகுதியில் பாதிக்கப்பட்ட விவசாய நிலங்களை பார்வையிட்டனர்.

    வடக்கு தாமரைகுளத்தில் வயல்களில் மழைக்காலங்களில் தேங்கும் நீரை வெளியேற்ற வழி இல்லை என்றும், மழை வெள்ளம் சூழ்ந்தபோது மின் மோட்டார் மூலமாக தண்ணீரை வெளியேற்றியதாக அதிகாரிகளிடம், விவசாயிகள் தெரிவித்தனர். எனவே விளை நிலங்களில் தேங்கும் தண்ணீரை வெளியேற்றுவதற்கு வசதி செய்து தருமாறு அவர்கள் கோரிக்கை வைத்தனர். இது சம்பந்தமாக உரிய நடவடிக்கை எடுப்பதாக அதிகாரிகள் தெரிவித்தனர்.

    அதன் பிறகு உசரவிளையில் உள்ள தென்னந்தோப்புக்கு சென்று புயலில் சாய்ந்த தென்னைகளை பார்வையிட்டனர். இந்த ஆய்வின்போது கலெக்டர் சஜ்ஜன்சிங் சவான், கலெக்டரின் நேர்முக உதவியாளர் (வேளாண்மை) நிஜாமுதீன் உள்பட பலர் உடனிருந்தனர்.

    மத்திய கால்நடை பராமரிப்பு துறை மற்றும் மீன்வள ஆணையர் பால்பாண்டியன், கப்பல்துறை அதிகாரி பரமேஸ்வர் பாலி ஆகியோர் தலைமையிலான மத்திய குழுவினர் குளச்சல் துறைமுகத்துக்கு சென்றனர். அவர்களை குளச்சல் காணிக்கை மாதா ஆலய பங்குதந்தை எட்வின், செயலாளர் வால்டர், துறைமுக ஏலக்கார வியாபாரிகள் சங்க தலைவர் வர்க்கீஸ் ஆகியோர் வரவேற்றனர். ‘ஒகி‘ புயலில் சேதமடைந்த பழைய மீன் ஏலக்கூடம், அலைதடுப்பு சுவர் ஆகியவற்றை அதிகாரிகள் பார்வையிட்டனர்.

    அவர்களிடம், ‘குளச்சல் மீன்பிடி துறைமுகத்தில் மீன்களை ஏற்றுமதி செய்யும் வகையில் கட்டமைப்பு வசதிகளை அதிகப்படுத்தி ஒருங்கிணைந்த மீன்பிடி துறைமுகமாக மாற்ற வேண்டும். குமரி மாவட்டத்தில் உள்ள அனைத்து விசைப்படகுகளையும் பதிவு செய்து உரிமம் வழங்க வேண்டும்.

    ‘ஒகி‘ புயலால் சேதமடைந்த பழைய மீன் ஏலக்கூடத்தை சீரமைக்க வேண்டும். குளச்சல் மீன்பிடி துறைமுகத்தில் மேற்கு அலைதடுப்பு சுவரின் பக்கவாட்டில் படகுகளை நிறுத்தும் தளம் அமைக்க வேண்டும்‘ என்ற கோரிக்கைகளை பங்குத்தந்தை எட்வின் மற்றும் மீனவர்கள் வலியுறுத்தினர். இந்த கோரிக்கைகள் தொடர்பாக அரசிடம் அறிக்கை சமர்ப்பித்து தகுந்த நடவடிக்கை எடுக்கப்படும் என்று அதிகாரிகள் கூறினார்கள்.

    இதனையடுத்து முட்டத்தில் உள்ள துறைமுகத்துக்கு சென்று புயல் பாதிப்புகளை பார்வையிட்டனர். அதன் பிறகு துறைமுகத்தில் உள்ள கூட்டரங்கில் மத்திய குழுவினர், கலெக்டர் சஜ்ஜன்சிங் சவான் மற்றும் அதிகாரிகளுடன் ஆலோசனை நடத்தினார்கள்.

    மின்துறை துணை இயக்குனர் ஓ.பி.சுமன் தலைமையில் சென்ற அதிகாரிகள் பேச்சிப்பாறை, கோதையாறு பகுதிகளுக்கு சென்று அங்கு புயலில் சாய்ந்த மின் கம்பங்களை பார்வையிட்டனர். மேலும், பேச்சிப்பாறை அணையையும் அதிகாரிகள் பார்வையிட்டனர். மத்திய குழுவினரின் ஆய்வு பணி நேற்று மதியம் 12 மணிக்கு முடிந்துவிட்டது. இதைத் தொடர்ந்து மத்திய குழுவினர் சென்னைக்கு புறப்பட்டுச் சென்றனர்.

    மத்திய குழுவினர் ஆய்வு பற்றி கலெக்டர் சஜ்ஜன்சிங் சவானிடம் கேட்டபோது, ‘குமரி மாவட்டத்தில் ஒகி புயல் பாதிப்புகளை மத்திய குழுவினர் பார்வையிட்டு ஆய்வு செய்துள்ளனர். மலைப்பகுதிகள், கடலோர பகுதிகள் மற்றும் விவசாய நிலங்களை பார்வையிட்டுள்ளனர். மத்திய குழுவினரின் ஆய்வறிக்கை மத்திய அரசுக்கு சமர்ப்பிக்கப்படும். அதன் பிறகு மத்திய அரசு, கூடுதலாக புயல் நிவாரண நிதி வழங்கும்‘ என்றார்.

    News