" “Not only must we be good, but we must also be good for something.” – Henry David Thoreau"

அடுத்த ஆண்டில் தமிழகம் முழுவதும் தேர்வு மையங்களில் கண்காணிப்பு கேமரா வசதி: பள்ளிக்கல்வி துறை அமைச்சர் செங்கோட்டையன் தகவல்

Views - 52     Likes - 0     Liked


  • அடுத்த ஆண்டில் அனைத்து தேர்வு மையங்களிலும் கண்காணிப்பு கேமரா வசதி ஏற்படுத்தப்படும் என்று பள்ளிக்கல்வி துறை அமைச்சர் கே.ஏ.செங்கோட்டையன் அறிவித்துள்ளார்.

    எஸ்எஸ்எல்சி, பிளஸ் 1, பிளஸ் 2 பொதுத் தேர்வுகளுக்கான முன்தயாரிப்பு பணிகள் தொடர்பான ஆலோசனை கூட்டம் சென்னை கோட்டூர்புரம் அண்ணா நூற்றாண்டு நூலக அரங்கில் நேற்று நடைபெற்றது. இந்த கூட்டத்தில் அனைத்து மாவட்ட கல்வி அதிகாரிகளும், மாவட்ட முதன்மை கல்வி அதிகாரிகளும், தேர்வுத் துறை அதிகாரிகளும் கலந்துகொண்டனர். கூட்டத்தை தொடங்கி வைத்த பின்னர் அமைச்சர் செங்கோட்டையன் நிருபர்களிடம் கூறியதாவது:

    இந்த ஆண்டு எஸ்எஸ்எல்சி பொதுத்தேர்வை 10 லட்சத்து 96 மாணவ-மாணவிகளும், பிளஸ் 1 பொதுத்தேர்வை 8 லட்சத்து 61 ஆயிரத்து 913 பேரும், பிளஸ் 2 பொதுத்தேர்வை 8 லட்சத்து 66 ஆயிரத்து 934 பேரும் எழுதுகிறார்கள். மாணவர்கள் நீண்டதூரம் சென்று தேர்வு எழுதுவதை தவிர்க்க, 10 கிலோ மீட்டருக்கு மேல் தூரம் இல்லாத வகையில் இந்த ஆண்டு கூடுதலாக 515 தேர்வு மையங்கள் அமைக்கப்படுகின்றன. வரும் காலத்தில் ஓரிடத்தில் 100 மாணவர்கள் இருந்தாலே அங்கு ஒரு தேர்வு மையம் அமைக்க வேண்டும் என்பது எங்களின் விருப்பம்.

    8,500 பறக்கும் படைகள்

    பொதுத்தேர்வுப் பணியில் 94 ஆயிரத்து 380 ஆசிரியர்களும், 6,402 கண்காணிப்பாளர்களும், 931 கூடுதல் கண்காணிப்பாளர்களும் ஈடுபட உள்ளனர். மேலும், தேர்வு மையங்களில் தவறுகள் நடைபெறாமல் தடுக்க திடீர் ஆய்வு மேற்கொள்ள மாநிலம் முழுவதும் 8,500 பறக்கும் படைகள் அமைக்கப்படுகின்றன. பள்ளி மாணவர்களுக்கு விபத்து காப்பீட்டு திட்டத்தை உடனடியாக நடைமுறைப்படுத்தும் வகையில் அரசாணை வெளியிடப்பட்டுள்ளது. அதன்படி, மாணவர்களுக்கு விபத்து காரணமாக உயிரிழப்பு ஏற்பட்டால் ரூ.1 லட்சமும், பெரிய அளவில் காயம் உண்டானால் ரூ.50 ஆயிரமும், சிறிய காயங்களுக்கு ரூ.25 ஆயிரமும் சம்பவம் நடந்த அடுத்த 48 மணி நேரத்தில் வழங்கப்படும்.

    தமிழகத்தில் பாடத்திட்டத்தை மாற்றியமைக்கும் பணிகள் நடைபெற்று வருகின்றன. வரும் கல்வியாண்டில் 1,6,9,11 ஆகிய வகுப்புகளுக்கு புதிய பாடத்திட்டம் நடைமுறைப்படுத்தப்படும். எஞ்சிய 8 வகுப்புகளுக்கும் அதற்கு அடுத்த ஆண்டே புதிய பாடத்திட்டத்தை அமல்படுத்த முடிவுசெய்துள்ளோம். புதிய பாடத்திட்டமானது சிபிஎஸ்இ பாடத்திட்டத்தை மிஞ்சும் அளவுக்கு அமைந்திருக்கும்.

    நீதிபோதனை வகுப்புகள்

    மாணவர்களுக்கு நல்லொழுக்கத்தை கற்றுக்கொடுக்கும் நீதிபோதனை வகுப்புகள் பள்ளிகளில் கொண்டுவரப்படும். அதேபோல், மாணவர்களுக்கு யோகா பயிற்சியும் அளிக்கப்படும்.

    இவ்வாறு அவர் கூறினார்.

    ஸ்மார்ட் கிளாஸ்

    முன்னதாக ஆய்வுக்கூட்டத்தை தொடங்கிவைத்து பேசிய செங்கோட்டையன், “தேர்வு மையங்களில் சிறு தவறுகூட நடந்துவிடக்கூடாது என்பதற்காக அடுத்த ஆண்டு அனைத்து தேர்வு மையங்களிலும் கண்காணிப்பு கேமரா வசதி ஏற்படுத்தப்படும். ரூ.600 கோடி செலவில் 3 ஆயிரம் அரசு பள்ளிகளில் ஸ்மார்ட் கிளாஸ் வகுப்பறை அமைப்பதற்கான பணிகள் நடைபெற்று வருகின்றன. மாணவர்களின் உயர்கல்வி மற்றும் வேலைவாய்ப்புக்கு உதவும் வகையில் ஹெல்ப்லைன் வசதி அமைக்கப்படும். தென்மாவட்டங்களில் உள்ள அரசு பள்ளிகளில் 4,742 ஆசிரியர்கள் கூடுதலாக பணியாற்றி வருவது பள்ளிக்கல்வித் துறை நடத்திய ஆய்வில் தெரிய வந்தது” என்றார்.

    இந்த கூட்டத்தில் பள்ளிக்கல்வித்துறை முதன்மைச் செயலர் பிரதீப் யாதவ், எஸ்எஸ்ஏ திட்ட இயக்குநர் கே.நந்தகுமார், தமிழ்நாடு பாடநூல் கழக நிர்வாக இயக்குநர் டி.ஜெகந்நாதன், ஆசிரியர் தேர்வு வாரிய தலைவர் சீனிவாசன், செயலாளர் எம்.பழனிச்சாமி, பள்ளிக்கல்வி இயக்குநர் ஆர்.இளங்கோவன் உள்ளிட்டோர் கலந்துகொண்டனர்.

    News