" “Not only must we be good, but we must also be good for something.” – Henry David Thoreau"

பிளஸ்–2 தேர்வு தொடங்கியது தமிழ் முதல் தாள் எளிதாக இருந்ததாக மாணவர்கள் கருத்து

Views - 53     Likes - 0     Liked


  • நாகர்கோவில், 

    தமிழகம் மற்றும் புதுச்சேரி மாநிலங்களில் பிளஸ்–2 மாணவ– மாணவிகளுக்கான பொதுத்தேர்வு நேற்று தொடங்கியது. இந்த தேர்வு வருகிற ஏப்ரல் மாதம் 6–ந் தேதி வரை நடைபெற இருக்கிறது. தேர்வை மொத்தம் 9 லட்சத்து 7 ஆயிரத்து 620 மாணவ– மாணவிகள் எழுதுகிறார்கள். 

    குமரி மாவட்டத்தில் 238 பள்ளிகளைச் சேர்ந்த 11 ஆயிரத்து 206 மாணவர்களும், 13 ஆயிரத்து 344 மாணவிகளுமாக மொத்தம் 24 ஆயிரத்து 550 பேர் பிளஸ்–2 பொதுத்தேர்வு எழுத நாகர்கோவில், தக்கலை, குழித்துறை ஆகிய 3 கல்வி மாவட்டங்களிலும் 79 தேர்வு மையங்கள் அமைக்கப்பட்டுள்ளன.

    இந்தநிலையில் நேற்று மொழிப்பாடங்களுக்கான தேர்வு தொடங்கியது. பெரும்பாலான மாணவ– மாணவிகள் தமிழ் முதல்தாள் தேர்வை எழுதினர். சில மாணவ– மாணவிகள் தாங்கள் தேர்வு செய்திருந்த மொழிப்பாடங்களான மலையாளம், இந்தி, பிரெஞ்சு போன்ற மொழிப்பாடங்களுக்கான முதல் தாள் தேர்வுகளை எழுதினர். பிளஸ்–2 தேர்வு நடைபெற்ற அனைத்து பள்ளிகளிலும் பலத்த போலீஸ் பாதுகாப்பு போடப்பட்டு இருந்தது.

    மேலும் தேர்வு அறைக்குள் செல்போன், கால்குலேட்டர் போன்ற எலக்ட்ரானிக் பொருட்கள் கொண்டு செல்ல தடை விதிக்கப்பட்டு இருந்தது.

    கொட்டாரம் அரசு மேல்நிலைப்பள்ளி தேர்வு மையத்தில் நடந்த பிளஸ்–2 பொதுத் தேர்வை கலெக்டர் பிரசாந்த் வடநேரே நேரில் சென்று பார்வையிட்டு ஆய்வு செய்தார். பின்னர் அவர் கூறியதாவது:–

    குமரி மாவட்டத்தில் பிளஸ்–2 பொதுத்தேர்வை 24,550 மாணவ– மாணவிகள் 79 தேர்வு மையங்களில் எழுதுகின்றனர். இந்த ஆண்டு தேர்வு எழுதும் பிளஸ்–2 மாணவ– மாணவிகளில் 75 பேர் மாற்றுத்திறனாளி மாணவர்கள் ஆவர். இவர்களில் 30 மாணவர்களுக்கு சொல்வதை எழுத தனியாக ஆசிரியர்கள் நியமனம் செய்யப்பட்டுள்ளனர். இவர்களுக்கு தனி அறையும் ஒதுக்கப்பட்டுள்ளது.

    தேர்வு நடைபெறும் 79 தேர்வு மையங்களுக்கும் வேறு பள்ளிகளைச் சேர்ந்த தலைமையாசிரியர்கள் முதன்மைக் கண்காணிப்பாளர்களாக நியமனம் செய்யப்பட்டுள்ளனர். ஒவ்வொரு கல்வி மாவட்டத்துக்கும் 60 பேர் கொண்ட பறக்கும் படை அமைக்கப்பட்டுள்ளது. மேலும் மாவட்ட அளவில் முதன்மைக்கல்வி அதிகாரி தலைமையில் 60 பேர் கொண்ட சிறப்பு பறக்கும் படையும் அமைக்கப்பட்டுள்ளது. இதுதவிர கல்வி மாவட்ட அதிகாரிகள், மாவட்ட தொடக்க கல்வி அதிகாரிகள், மாவட்ட உதவி திட்ட அலுவலர்கள், முதன்மைக்கல்வி அலுவலர் ஆகியோர் தலைமையில் சிறப்பு அலுவலர் பறக்கும் படையும் அமைக்கப்பட்டுள்ளது.

    குமரி மாவட்டத்தில் நடைபெறுகின்ற அனைத்து பொதுத்தேர்வுகளையும், எவ்விதமான புகார்களுக்கும் இடம் கொடுக்காத வகையில் நல்ல முறையில் நடத்தி முடித்திடவும் நடவடிக்கைகள் மேற்கொள்ளப்பட்டுள்ளது. பிளஸ்–2 தேர்வில் கடந்த ஆண்டு குமரி மாவட்டம் 5–வது இடத்தில் இருந்தது. இந்த ஆண்டு முதல் இடத்துக்கு வரும் என்ற நம்பிக்கை உள்ளது. எனவே தேர்வு எழுதும் அனைத்து மாணவ– மாணவிகளுக்கும் எனது வாழ்த்துக்களை தெரிவித்துக் கொள்கிறேன்.

    இவ்வாறு கலெக்டர் பிரசாந்த் வடநேரே தெரிவித்தார். ஆய்வின்போது கலெக்டருடன், மாவட்ட முதன்மைக்கல்வி அதிகாரி பாலாவும் உடன் சென்றார்.

    குமரி மாவட்ட பள்ளிகளைச் சேர்ந்த பிளஸ்–2 மாணவ– மாணவிகள் 24,550 பேரும், தனித்தேர்வர்கள் 576 பேரும் என மொத்தம் 25,126 பேர் தேர்வு எழுத ஏற்பாடுகள் செய்யப்பட்டு இருந்தது. ஆனால் 24,945 பேர் மட்டுமே நேற்று தேர்வு எழுத வந்திருந்தனர். 181 பேர் தேர்வு எழுத வரவில்லை.

    தேர்வு எழுதி விட்டு வந்த பிளஸ்–2 மாணவ– மாணவிகளிடம் தேர்வு குறித்து கேட்டபோது, “தமிழ் முதல்தாள் தேர்வு மிகவும் எளிதாக இருந்தது“ என்று கருத்து கூறினர்.

    News