" “Yesterday is history. Tomorrow is a mystery. .."

குமரி மாவட்டத்தில் காவலர் பணிக்கான தேர்வை 9,194 பேர் எழுதினர் போலீஸ் டி.ஐ.ஜி. ஆய்வு

Views - 47     Likes - 0     Liked


  • நாகர்கோவில், 

    தமிழக சீருடைப்பணியாளர் தேர்வாணையம் சார்பில் 2017–18–ம் ஆண்டுக்கான இரண்டாம் நிலை காவலர்கள் (ஆண்கள் மற்றும் பெண்கள்), சிறைக்காவலர்கள் மற்றும் தீயணைப்பாளர்கள் (ஆண்கள்) பணிகளுக்கான பொது எழுத்து தேர்வு தமிழகம் முழுவதும் நேற்று நடந்தது. குமரி மாவட்டத்தில் இந்த தேர்வை எழுத 10,428 பேர் விண்ணப்பித்திருந்தனர். 

    இவர்களுக்காக நாகர்கோவில் ஸ்காட் கிறிஸ்தவக்கல்லூரி, பொன்ஜெஸ்லி கல்லூரி, இந்துக்கல்லூரி, ராஜாஸ் மகளிர் என்ஜினீயரிங் கல்லூரி, சுங்கான்கடை செயின்ட் சேவியர் என்ஜினீயரிங் கல்லூரி, தோவாளை சி.எஸ்.ஐ. என்ஜினீயரிங் கல்லூரி, குமாரகோவில் நூருல் இஸ்லாம் உயர்கல்வி நிலையம் ஆகிய 7 இடங்களில் தேர்வு மையங்கள் அமைக்கப்பட்டு இருந்தது. இந்த தேர்வுக்கான வினாத்தாள்கள் நேற்று முன்தினம் வந்தன. அவை மாவட்ட போலீஸ் சூப்பிரண்டு அலுவலகத்தில் பாதுகாப்பாக வைக்கப்பட்டு இருந்தன. நேற்று காலையில் அங்கிருந்து அந்தந்த தேர்வுமையங்களுக்கு வினாத்தாள்கள் அனுப்பி வைக்கப்பட்டன.

    தேர்வு மையங்களுக்கு நேற்று காலையிலேயே இளைஞர்கள், இளம்பெண்கள் பலர் வந்திருந்தனர். அவர்களுடன் பெற்றோர் மற்றும் உறவினர்களும் வந்திருந்தனர். இதனால் ஒவ்வொரு தேர்வு மையத்திலும் நேற்று திருவிழா போல் கூட்டமாக காட்சி அளித்தது. தேர்வு மைய நுழைவுச்சீட்டு வைத்திருந்தவர்கள் மட்டுமே, கடுமையான சோதனைக்கு பின் உள்ளே அனுமதிக்கப்பட்டனர். அவர்கள் செல்போன், கைக்கடிகாரம், எலக்ட்ரானிக் சாதனங்கள் கொண்டு செல்ல தடை விதிக்கப்பட்டு இருந்தது. தேர்வு முடியும் வரை யாரும் வெளியே செல்ல அனுமதிக்கப்படவில்லை.

    நாகர்கோவிலில் தேர்வு மையத்துக்கு சில பெண்கள் கைக்குழந்தைகளுடன் வந்தனர். அவர்கள் தங்களுடன் வந்திருந்த பெற்றோர் மற்றும் கணவரிடம் கைக்குழந்தையை ஒப்படைத்து விட்டு தேர்வு எழுத சென்றனர்.

    குமரி மாவட்டத்தில் தேர்வு எழுத விண்ணப்பித்திருந்த 10,428 பேரில் நேற்று 9,194 பேர் மட்டுமே தேர்வு எழுதினர். 1234 பேர் தேர்வு எழுத வராமல் ‘ஆப்சென்ட்‘ ஆகியிருந்தனர். இதன் சதவீதம் 11.8 ஆகும். தேர்வு மையங்களில் முறைகேடு நடைபெறாமல் தடுக்க மாவட்ட போலீஸ் சூப்பிரண்டும், தமிழ்நாடு சீருடைப்பணியாளர்கள் தேர்வாணைய துணைக்குழு தலைவருமான ஸ்ரீநாத் தலைமையில் 360 போலீசார் பாதுகாப்பு பணியில் ஈடுபடுத்தப்பட்டனர். 

    நெல்லை சரக போலீஸ் டி.ஐ.ஜி. கபில்குமார் சரத்கார் 7 மையங்களுக்கும் சென்று தேர்வை ஆய்வு செய்தார். 

    தேர்வுகள் முடிவடைந்ததும் விடைத்தாள்கள் அனைத்தும் பொன்ஜெஸ்லி என்ஜினீயரிங் கல்லூரியில் உள்ள தேர்வு மையத்துக்கு கொண்டு வரப்பட்டது. அவை அனைத்தும் அங்கு கட்டி, ஒழுங்குபடுத்தப்பட்டது. பின்னர் அங்கிருந்து பலத்த போலீஸ் பாதுகாப்புடன் விடைத்தாள்கள் அனைத்தும் சென்னையில் உள்ள சீருடை பணியாளர் தேர்வு ஆணைய அலுவலகத்துக்கு கொண்டு செல்லப்பட்டது.

    News