" If you fell down yesterday, stand up today."

கோர்ட்டுகளில் செயல்பட்டு வரும் “சமரச மையத்தின் பயன்களை மக்கள் அறிய வேண்டும்” நீதிபதி பேச்சு

Views - 51     Likes - 0     Liked


  • நாகர்கோவில், 

    சென்னை ஐகோர்ட்டின் ஒரு அங்கமான தமிழ்நாடு சமரச மையம் உத்தரவின் பேரில் சமரச நிறுவன நாள் விழிப்புணர்வு விழா நாகர்கோவிலில் கோர்ட்டு வளாகத்தில் உள்ள மாவட்ட சமரச மையத்தில் நேற்று நடந்தது. விழாவிற்கு மாவட்ட நீதிபதி கருப்பையா தலைமை தாங்கினார். பின்னர் அங்கு சமரச மையம் என்ற பெயர் பலகையை திறந்து வைத்தார். சார்பு நீதிபதியும், குமரி மாவட்ட சமர மையத்தின் ஒருங்கிணைப்பாளருமான பசும்பொன் சண்முகையா வரவேற்றார்.

    விழாவில் மாவட்ட போலீஸ் சூப்பிரண்டு ஸ்ரீநாத், வருவாய் அதிகாரி இளங்கோ, குடும்ப கோர்ட்டு நீதிபதி கோமதி நாயகம், தலைமை குற்றவியல் நீதிபதி முருகானந்தம், நாகர்கோவில் வக்கீல் மற்றும் சார்பு நீதிபதிகள் பங்கேற்றனர். அதைத் தொடர்ந்து விழாவில் மாவட்ட நீதிபதி கருப்பையா பேசியபோது கூறியதாவது:–

    கோர்ட்டுகளில் செயல்பட்டு வரும் சமரச மையத்தின் பயன்களை மக்கள் அறிய வேண்டும். அதன் செயல்பாடுகளை அனைவரும் தெரிந்து கொள்ள வேண்டும். இதற்காகத்தான் சமரச மைய நிறுவன நாள் விழா கொண்டாடப்படுகிறது. கோர்ட்டில் தொடரப்படும் வழக்குகள் மீதான விசாரணை பல ஆண்டுகளாக நடைபெறும். மாவட்ட கோர்ட்டில் தொடரப்படும் வழக்கு ஐகோர்ட்டு மற்றும் சுப்ரீம் கோர்ட்டு வரை செல்லும். ஆனால் சமரச மையத்தில் அப்படி இல்லை. பேச்சுவார்த்தை மூலம் உடனே தீர்வு காணப்படுகிறது. சமரச மையத்தில் நீதிபதிகள் இருக்க மாட்டார்கள். வழக்காளர்களின் பிரச்சினையை வக்கீல் ஒருவர் நடுவராக இருந்து தீர்த்து வைப்பார். சமரச மையத்தில் நீங்களே எதிர்தரப்புடன் நேரடியாக பேச்சுவார்த்தை நடத்தலாம். 

    கோர்ட்டில் தொடரப்படும் வழக்கில் தீர்ப்பு கூறப்படும் போது ஒருவர் வெற்றி பெறுவார். மற்றொருவர் தோல்வி அடைவார். ஆனால் சமரச மையத்தில் வெற்றி, தோல்வி பாகுபாடு இல்லாமல் சுமூக தீர்வு காணப்படும். சமரச மையத்தின் பயன்கள் அனைவருக்கும் சென்று சேர வழிவகைகள் செய்ய வேண்டும். 

    இவ்வாறு மாவட்ட நீதிபதி கருப்பையா கூறினார்.

    இதனையடுத்து சமரச மையம் செயல்பாடுகள் அடங்கிய துண்டு பிரசுரங்கள் வினியோகம் செய்யப்பட்டது. தொடர்ந்து 13–ந் தேதி வரை கோர்ட்டு முன் துண்டு பிரசுரங்கள் வினியோகம் செய்யப்படுகின்றன. விழா ஏற்பாடுகளை மாவட்ட சமரச மையமும், சட்டப்பணிகள் ஆணைக்குழுவும் இணைந்து செய்திருந்தன. 

    News