" “No matter how hard the past, you can always begin again.”"

குமரியில் 3–வது நாளாக கடல் சீற்றம் கரையோர கிராமங்களில் தண்ணீர் புகுந்தது

Views - 49     Likes - 0     Liked


  • கருங்கல், 

    கடலில் ஏற்பட்டுள்ள இயற்கை மாற்றத்தால் கடல் சீற்றம் ஏற்படும் என இந்திய கடல்சார் தகவல் மையம் எச்சரிக்கை விடுத்திருந்தது. அதன்படி குமரி மாவட்டத்தில் கடந்த 20–ந் தேதி முதல் கடல் சீற்றம் தொடங்கியது. கன்னியாகுமரி, குளச்சல், கொல்லங்கோடு, நீரோடி உள்பட மாவட்டம் முழுவதும் ராட்சத அலைகள் எழுந்து கரையில் மோதிய வண்ணம் இருந்தன. இதனால், மீனவர்கள் யாரும் மீன்பிடிக்க செல்லவில்லை. அத்துடன் கடற்கரையையொட்டிய பகுதிகளில் தங்கியிருந்த மக்கள் பீதியில் காணப்பட்டனர். பல மீனவ கிராமங்களில் மக்கள் இரவு முழுவதும் தூங்காமல் விடிய, விடிய விழித்திருந்தனர்.

    குமரி மாவட்டத்தில் நேற்று 3–வது நாளாக கடல் சீற்றம் தொடர்ந்தது. நேற்று ஞாயிற்றுக்கிழமை என்பதால் மீனவர்கள் யாரும் மீன்பிடிக்க செல்லவில்லை. அதே நேரத்தில் கடல் சீற்றம் தொடர்ந்து நிலவியதால் கடற்கரை கிராமங்களில் பதற்றம் நிலவியது.


    சர்வதேச சுற்றுலா தலமான கன்னியாகுமரியில் கடல் சீற்றம் அதிகமாக காணப்பட்டது. கடலில் எழுந்த ராட்சத அலைகள் பாறைகள் மீது மோதி சிதறியது பார்ப்பவர்களை அச்சம் கொள்ள வைத்தது. சுற்றுலா பயணிகள் குளித்து மகிழும் முக்கடல் சங்கமம் கரை பகுதி முழுவதும் கடல்நீர் புகுந்து ஆக்கிரமித்தது. இதனால், அந்த பகுதியில் போலீசார் கண்காணிப்பு பணியில் ஈடுபட்டு யாரும் கடலில் இறங்காதவாறு எச்சரித்தனர்.

    கடல் சீற்றம் காரணமாக நேற்று 2–வது நாளாக விவேகானந்தர் மண்டபத்துக்கும், திருவள்ளுவர் சிலைக்கும் படகு போக்குவரத்து ரத்து செய்யப்பட்டது.


    குளச்சல் பகுதியில் நேற்று முன்தினம் முதல் கடல் சீற்றம் அதிகமாக காணப்பட்டது. ராட்சத அலைகள் எழுந்து கரையை நோக்கி சீறி பாய்ந்ததால் அந்த பகுதியில் உள்ள மணல் பரப்பு முழுவதும் நீரால் சூழப்பட்டது.

    கொட்டில்பாடு கடற்கரையையொட்டி ஏராளமான தென்னந்தோப்புகள் உள்ளன. கடல் சீற்றம் காரணமாக இந்த தென்னந்தோப்புகளில் கடல் நீர் புகுந்தது. இதனால், அந்த பகுதி குளம் போல் காட்சி அளித்தது.


    அழிக்கால் பகுதியில் கடலில் எழுந்த ராட்சத அலைகள் ஊருக்குள் புகுந்தன. இதனால், அந்த பகுதியில் வீடுகளை சுற்றிலும் தண்ணீர் தேங்கி நின்றது. இதையடுத்து மீனவர்கள் தங்களது படகுகள், மற்றும் உடமைகளை பாதுகாப்பான இடங்களுக்கு எடுத்து சென்றனர்.

    மண்டைக்காடு புதூர் பகுதியில் கடற்கரையோர சாலை சேதமடைந்தது. இதனால், அந்த வழியாக வாகனங்கள் செல்ல முடியாத நிலை ஏற்பட்டது. இந்த பகுதியில் கடற்கரையில் அமைக்கப்பட்டிருந்த உயர்கோபுர மின்விளக்கு ராட்சத அலையால் சேதமடைந்து அறுந்து விழுந்தது. இதையடுத்து மின்சாரத்துறை ஊழியர்கள் விரைந்து சென்று உயர்கோபுர மின்விளக்கை பாதுகாப்பாக அப்புறப்படுத்தினர்.

    மண்டைக்காடு பகவதியம்மன் கோவில் அருகே பக்தர்கள் பாதுகாப்பாக கடலில் இறங்கும் வகையில் சப்பாத்து பாலம் அமைக்கப்பட்டிருந்தது. கடலில் எழுந்த ராட்சத அலைகள் பாலத்தின் மீது பயங்கரமாக மோதி சிதறின. இதனால், கடலரிப்பு ஏற்பட்டு பாலம் சேதமடைந்து இடிந்து விழுந்தது.


    கொல்லங்கோடு, வள்ளவிளை, நீரோடி போன்ற கடற்கரை கிராமங்களில் கடந்த 3 நாட்களாக கடல் சீற்றம் நிலவியது. கடலில் எழுந்த ராட்சத அலைகள் தடுப்பு சுவரை தாண்டி கிராமங்களில் நுழைந்தன. இதில் கரையோரம் இருந்த ஏராளமான வீடுகளில் தண்ணீர் புகுந்தது. இதனால், பொதுமக்கள் வீடுகளை விட்டு வெளியேறி பாதுகாப்பாக உறவினர் வீடுகளில் தஞ்சம் அடைந்தனர். நேற்று முன்தினம் இரவு முழுவதும் கடல் சீற்றம் நீடித்ததால் தூக்கமின்றி பொதுமக்கள் தவித்தனர்.

    நேற்று வள்ளவிளை கிராமத்தில் கடல் அலை புகுந்து 8 வீடுகள் சேதமடைந்தன. மேலும், ஏராளமான வீடுகளில் தண்ணீர் புகுந்ததால் மீனவர்கள் வீட்டை விட்டு வெளியேறி கொல்லங்கோட்டில் உள்ள ஒரு பள்ளியில் அமைக்கப்பட்டிருந்த பாதுகாப்பு முகாமில் தஞ்சம் புகுந்தனர். நேற்று இந்த முகாமில் 34 குடும்பத்தினர் தங்கி இருந்தனர்.


    கருங்கல் அருகே மிடாலம் பகுதியில் ராட்சத அலையால் கரையோரம் இருந்த 2 வீடுகள் சேதமடைந்தன. இதில் ஒரு வீடு முற்றிலுமாக சேதம் அடைந்து கடலுக்குள் இடிந்து விழுந்தது. மேலும், அந்த பகுதியில் உள்ள கல்லறை தோட்டம் முற்றிலுமாக பாதிக்கப்பட்டது.

    ராமன்துறையில் கரையோரம் நிறுத்தி வைத்திருந்த 5 நாட்டுபடகுகளை கடல் அலை இழுத்து சென்றது. அவற்றில் 2 படகுகள் முற்றிலுமாக உடைந்தன.


    கடல்சீற்றம் காரணமாக தேங்காப்பட்டணம் பகுதியில் கடுமையான கடல் அரிப்பு ஏற்பட்டு வருகிறது. தேங்காப்பட்டணம்– இனயம் சாலையில் அரையன்தோப்பு பகுதியில் கடலரிப்பு காரணமாக சாலை முற்றிலுமாக துண்டிக்கப்பட்டது.

    இதனால், அந்த பகுதியில் போக்குவரத்து முற்றிலுமாக தடைப்பட்டது. இதையடுத்து வாகனங்கள் மாற்றுப்பாதையில் இயங்கின.


    கடல்சீற்றம் காரணமாக நேற்று மாவட்டத்தின் பல பகுதிகளில் 50–க்கும் மேற்பட்ட வீடுகளில் தண்ணீர் புகுந்தது.

    கடலரிப்பால் பாதிக்கப்பட்ட மண்டைக்காடுபுதூர், குறும்பனை, கொட்டில்பாடு, அழிக்கால் போன்ற பகுதிகளை மாவட்ட கலெக்டர் பிரசாந்த் வடநேரே நேரில் ஆய்வு செய்து மீனவர்களுக்கு ஆறுதல் கூறினார். அவருடன் அரசு அதிகாரிகள் பலர் உடன்சென்றனர்.

    News