சென்னை வாலிபர்கள் இறங்கி நின்று சண்டையிட்டபோது பரிதாப சாவு
Views - 217 Likes - 0 Liked
-
திண்டிவனம்,
சென்னை திருவொற்றியூர் மேற்கு மாடவீதியை சேர்ந்தவர் சைதன்யா ஈஸ்வரன் (வயது 27). இவர் தனது குடும்பத்தினருடன் காரில் ராமேஸ்வரத்தில் நடந்த விழா ஒன்றில் கலந்து கொள்ள சென்றார். பின்னர் அங்கிருந்து அதே காரில் நேற்று முன்தினம் இரவு சென்னைக்கு திரும்பினர். நேற்று அதிகாலை விழுப்புரம் மாவட்டம் திண்டிவனம் பகுதியில் கார் வந்து கொண்டிருந்தது.
இந்த நிலையில் சென்னை கெருகம்பாக்கம் சக்கரபாணி நகரை சேர்ந்த முரளி (38) என்பவர் தனது குடும்பத்தினருடன் திருவண்ணாமலையில் பவுர்ணமி கிரிவலம் சென்றுவிட்டு, சென்னைக்கு காரில் திரும்பி வந்து கொண்டிருந்தார்.
இருவரின் காரும் திண்டிவனத்தை கடந்து வந்து கொண்டிருந்தது. அப்போது இருவரும் ஒருவருக்கொருவர் போட்டி போட்டு சென்றதாக கூறப்படுகிறது. பூச்சிகொளத்தூர் என்ற இடத்தில் வந்தபோது, சைதன்யா ஈஸ்வரன் தனது காரை முரளியின் காருக்கு முன்னால் நிறுத்தினார். தொடர்ந்து முரளியும் காரை நிறுத்தினார்.
பின்னர் சைதன்யா ஈஸ்வரன், அவருடன் வந்த வெங்டேஸ்வரர் (26) ஆகியோர் காரில் இருந்து இறங்கி, முரளியிடம் சென்று தகராறு செய்து கொண்டிருந்தனர். முரளி காரிலேயே இருந்தார். அந்த நேரத்தில் சென்னை நோக்கி வேகமாக வந்த ஒரு வேன் டிரைவரின் கட்டுப்பாட்டை இழந்து முரளி கார் மீதும், வெங்கடேஸ்வரர் மீதும் மோதிவிட்டு சாலையில் கவிழ்ந்தது.
இதற்கிடையே முரளியின் கார் முன்னோக்கி சென்று சைதன்யா ஈஸ்வரன் மற்றும் அவரது கார் மீது மோதி சாலையோர பள்ளத்தில் கவிழ்ந்தது. இவ்வாறு அடுத்தடுத்து நடந்த விபத்தில் வெங்கடேஸ்வரர், சைதன்யா ஈஸ்வரன் ஆகியோர் சம்பவ இடத்திலேயே உடல் நசுங்கி பலியானார்கள்.
இதற்கிடையே சாலையோர பள்ளத்தில் கவிழ்ந்த காரில் இருந்த முரளி, அவருடன் வந்த சுரேஷ், சுரேசின் மனைவி நித்யா (30), தம்பி பாக்கியராஜ் (25) ஆகியோர் காயமடைந்தனர். சைதன்யா ஈஸ்வரன் காரில் வந்தவர்கள் காயமின்றி உயிர் தப்பினர்.
விபத்து பற்றி தகவல் அறிந்தவுடன் ஒலக்கூர் போலீசார் விரைந்து சென்று காயமடைந்த 4 பேரையும் மீட்டு சிகிச்சைக்காக திண்டிவனம் அரசு ஆஸ்பத்திரிக்கு அனுப்பி வைத்தனர்.
இதற்கிடையே விபத்தை ஏற்படுத்திய வேனில் வந்த அனைவரும் வேனை அங்கேயே விட்டுவிட்டு தப்பி சென்றுவிட்டனர். இதனால் அதில் வந்தவர்கள் யார்? என்ற விவரம் தெரியவில்லை. இதுகுறித்து போலீசார் வழக்குப்பதிவு செய்து விசாரித்து வருகின்றனர்.News