" “Not only must we be good, but we must also be good for something.” – Henry David Thoreau"

குமரி மாவட்டத்தில் கிராமிய அஞ்சல் ஊழியர்கள் காலவரையற்ற வேலைநிறுத்த போராட்டம்

Views - 56     Likes - 0     Liked


  • நாகர்கோவில், 

    7–வது ஊதியக்குழுவில் கிராமிய அஞ்சல் ஊழியர்களுக்கு அமைக்கப்பட்ட கமலேஷ் சந்திரா குழு அறிக்கையை உடனடியாக அமல்படுத்தக்கோரி மத்திய பா.ஜனதா அரசை வலியுறுத்தி அனைத்திந்திய கிராமிய அஞ்சல் ஊழியர் சங்கம் மற்றும் அனைத்திந்திய அஞ்சல் ஊழியர் சங்கங்கள் அஞ்சல் மூன்று, அஞ்சல் நான்கு தபால்காரர் சங்கங்கள் உள்ளிட்டவை சார்பில் மே 22–ந் தேதி (நேற்று) முதல் காலவரையற்ற வேலை நிறுத்த போராட்டத்தில் ஈடுபடப்போவதாக அறிவித்திருந்தன.

    அதன்படி நேற்று நாடு முழுவதும் கிராமிய அஞ்சல் ஊழியர் உள்ளிட்ட சங்கங்களின் சார்பில் காலவரையற்ற வேலை நிறுத்த போராட்டம் நடந்தது. இதேபோல் குமரி கோட்டத்தில் உள்ள அனைத்திந்திய கிராமிய அஞ்சல் ஊழியர்களும், அனைத்திந்திய அஞ்சல் ஊழியர் சங்கங்களான அஞ்சல் மூன்று, அஞ்சல் நான்கு சங்க ஊழியர்களும் காலவரையற்ற வேலைநிறுத்த போராட்டத்தில் ஈடுபட்டனர்.

    இதனால் குமரி மாவட்டத்தில் ஏராளமான கிராமிய தபால் நிலையங்களும், துணை தபால் நிலையங்களும் மூடிய நிலையில் இருந்தன. நாகர்கோவில் தலைமை தபால் நிலையம் மற்றும் தக்கலை தபால் நிலையம் போன்றவற்றில் ஒரு சில ஊழியர்கள் மட்டுமே பணிக்கு வந்திருந்தனர்.

    எனவே தபால் பட்டு வாடா பணிகள், பண பட்டுவாடா பணிகள், தபால் நிலைய பண பரிவர்த்தனை பணிகள், கிராமிய அஞ்சல் இன்சூரன்ஸ் திட்டப்பணிகள் பாதிக்கப்பட்டன. தேசிய ஊரக வேலை உறுதித்திட்டத்தின்கீழ் தொழிலாளர்கள் சம்பளம் பெற முடியாத நிலையும் ஏற்பட்டது. தபால் நிலைய சேமிப்பு கணக்குளில் பணம் போடவோ, பணம் எடுக்கவோ முடியவில்லை. இதனால் தபால் நிலைய பணிகள் முடங்கின.

    காலவரையற்ற வேலைநிறுத்த போராட்டத்தில் ஈடுபட்ட ஊழியர்கள் நாகர்கோவில் தலைமை தபால் நிலையம் முன் ஆர்ப்பாட்டமும் செய்தனர். 

    ஆர்ப்பாட்டத்துக்கு அஞ்சல் மூன்று தபால்காரர் சங்க குமரி மாவட்ட தலைவர் அய்யம்பெருமாள் தலைமை தாங்கினார். கிராமிய அஞ்சல் ஊழியர் சங்க மாநில செயலாளரும், குமரி கோட்ட தலைவருமான இஸ்மாயில் முன்னிலை வகித்தார். அஞ்சல் நான்கு தபால்காரர் சங்க குமரி கோட்ட தலைவர் வர்க்கீஸ், செயலாளர் செந்தில், நிர்வாகிகள் சுரேஷ்குமார், தெய்வ செல்வன், சுபாஷ், ஐசக் உள்பட பலர் கலந்து கொண்டனர். ஆர்ப்பாட்டத்தில் கோரிக்கைகளை வலியுறுத்தி கோ‌ஷங்கள் எழுப்பப்பட்டன.

    இந்த போராட்டம் தொடர்பாக கிராமிய அஞ்சல் ஊழியர் சங்க மாநில செயலாளர் இஸ்மாயில் கூறியதாவது:–

    குமரி மாவட்டத்தில் 186 கிராமிய தபால் நிலையங்களும், 78 துணை தபால் நிலையங்களும் உள்ளன. எங்களது காலவரையற்ற வேலைநிறுத்த போராட்டத்தால் மாவட்டத்தில் 85 சதவீத தபால் நிலையங்கள் மூடப்பட்டுள்ளன. மீதமுள்ள தபால் நிலையங்கள் ஒரு சில தற்காலிக ஊழியர்களைக் கொண்டு செயல்படுகின்றன. நாகர்கோவில் தபால் நிலையம் மற்றும் தக்கலை தபால் நிலையங்களில் நேற்று தலா 2 ஊழியர்கள் மட்டுமே பணியில் இருந்தனர்.

    இதனால் தபால் சேவை முழுமையாக பாதிக்கப்பட்டுள்ளது. மேலும் குமரி மாவட்டத்தில் நேற்று ஒரே நாளில் ரூ.10 கோடி மதிப்பிலான பண பரிவர்த்தனை முடங்கியுள்ளது. கோரிக்கை நிறைவேறும் வரை போராட்டத்தில் ஈடுபடுவோம்.

    இவ்வாறு இஸ்மாயில் தெரிவித்தார்.

    News