" Only I can change my life."

தாய்ப்பால் ஊட்டுவதன் மூலம் பெண்களுக்கு கர்ப்பப்பை புற்றுநோய் வராமல் தடுக்கலாம்

Views - 95     Likes - 0     Liked


  • நாகர்கோவில், 

    தாய்ப்பால் ஊக்குவிப்போர் கூட்டமைப்பு சார்பில் நாகர்கோவில் ஆசாரிபள்ளம் அரசு மருத்துவக்கல்லூரியில் செயல்படும் நர்சிங் மாணவிகளுக்கும், பிரசவ வார்டு நர்சுகள், பச்சிளங்குழந்தைகள் பராமரிப்பு வார்டு நர்சுகள் ஆகியோருக்கான ஒருநாள் பயிற்சி மற்றும் கருத்தரங்கு நடந்தது.

    கருத்தரங்குக்கு அரசு மருத்துவக்கல்லூரி டீனும், தாய்ப்பால் ஊக்குவிப்போர் கூட்டமைப்பு தலைவருமான டாக்டர் சோமசேகர் தலைமை தாங்கி, பயிற்சி மற்றும் கருத்தரங்கை தொடங்கி வைத்து பேசினார். அப்போது அவர் கூறியதாவது.

    தாய்ப்பால் குடிப்பது ஒவ்வொரு குழந்தையின் கடமை. அதைக்கொடுப்பது தாயின் கடமை. அன்னையை நடமாடும் தெய்வம் என்று சொல்கிறோம். ஒரு குழந்தைக்கு தாயார் 6 மாதம் தொடர்ந்து தாய்ப்பால் கொடுக்க வேண்டும். அவ்வாறு 6 மாதம் தாய்ப்பால் கொடுக்கும் தாய்மார்களின் சதவீதம் தமிழகத்தில் 50 சதவீதம்தான் இருக்கிறது. இதை 100 சதவீதமாக உயர்த்த வேண்டும். குடும்ப சூழ்நிலை, பொருளாதார நிலை போன்ற காரணங்களால் குழந்தை பெற்ற தாய்மார்கள் காலையில் சீக்கிரமே வேலைக்கு செல்ல வேண்டியிருப்பதால் குழந்தைகளுக்கு தாய்ப்பால் கொடுப்பது தடைபடுகிறது. இதனால் டப்பா பால், பவுடர் பால் போன்றவற்றை குழந்தைகளுக்கு புகட்டும் நிலை உருவாகிறது.

    தாய்ப்பால் குடிக்கும் குழந்தைகள்தான் அழகாகவும், ஆரோக்கியமாகவும் இருக்கும். தடிமன் குறைவாக இருக்கும். டப்பா பால், பவுடர் பால் கொடுத்து குழந்தைப் பருவத்தில் தடிமனாக இருக்கும் குழந்தைகளுக்கு எதிர்காலத்தில் ரத்தக்குழாய் அடைப்பு, சர்க்கரை வியாதி போன்றவை வர வாய்ப்புள்ளது. தாய்ப்பால் சுற்றுச்சூழல் மாசு ஏற்படுத்தாதது.

    தாய்ப்பால் கொடுப்பதால் குழந்தைகளுக்கு தொற்றுநோய், வாந்தி-பேதி, நிமோனியா, ஆஸ்துமா, உடல் பருமன் போன்ற நோய்கள், பிரச்சினைகள் ஏற்படுவதில்லை.

    அதேபோல தாய்ப்பால் கொடுக்கும் பெண்களுக்கு கர்ப்பப்பை புற்றுநோய் வராமல் தடுக்கலாம். மேலும் அவர்களது உடல் வாகு, மனது இலகுவாகும். பெண்களின் அழகும் அதிகரிக்கும்.

    அரசு துறைகளில் பணிபுரியும் தாய்மார்களுக்கு பிரசவ கால விடுப்பாக முதலில் 6 மாதம் வழங்கப்பட்டது. தற்போது 10 மாதம் விடுப்பு அளிக்கப்படுகிறது. எனவே இந்த வாய்ப்பை பயன்படுத்தி தாய்மார்கள் குழந்தைகளுக்கு தாய்ப்பால் கொடுக்க வேண்டும்.

    வேலைக்கு செல்லும்போதும் இடைவேளை நேரங்களில் குழந்தைகளுக்கு தாய்ப்பால் புகட்டுவதை வழக்கமாக கொள்ள வேண்டும். தாய்ப்பாலை எடுத்து 6 முதல் 8 மணி நேரம் வரை சாதாரண தட்ப-வெப்ப நிலையில் வைத்திருந்தும் குழந்தைகளுக்கு புகட்டலாம்.

    பிரசவத்துக்குப்பிறகு பதற்றம், இனம்புரியாத பயம், மன அழுத்தம், சந்தேகம் போன்றவற்றின் காரணமாக பெண்களுக்கு தாய்ப்பால் சுரப்பது குறைவாக இருக்கிறது. அதனால் பிரசவமான பெண்கள் மன அழுத்தம், பயம் போன்றவற்றுக்கு உள்ளாகாமல் இருக்க பழகிக்கொள்ள வேண்டும். இவ்வாறு டீன் சோமசேகர் பேசினார்.

    பின்னர் குழந்தைகளுக்கு தாய்ப்பால் புகட்டும் முறைகள், குறைபிரசவத்தில் பிறந்த குழந்தைகள், இரட்டை குழந்தைகளாக பிறந்த குழந்தைகள், 3 குழந்தைகளாக பிறந்த குழந்தைகள் ஆகியவற்றுக்கு பால் புகட்டும் முறைகள், தாய்ப்பாலை பயன்படுத்தும் கருவிகள் போன்றவை குறித்து செயல் விளக்கத்தோடும், படக்காட்சிகளோடும் விளக் கப்பட்டது. மேலும் வார்டுகளுக்கு மாணவிகள் அழைத்து செல்லப்பட்டு விளக்கம் அளிக்கப்பட்டது.

    பயிற்சியில் பங்கேற்ற மாணவிகள் மற்றும் நர்சுகளுக்கு பயிற்சி கையேடு மற்றும் சான்றிதழ்கள் வழங்கப்பட்டன. பயிற்சி கருத்தரங்கு தொடக்க நிகழ்ச்சியில் ஆஸ்பத்திரி சூப்பிரண்டு ராதாகிருஷ்ணன், துணை முதல்வர் லியோடேவிட், சமூக மருந்தியல்துறை தலைவர் சுரேஷ்பாலன், தாய்ப்பால் ஊக்குவிப்போர் கூட்டமைப்பு ஒருங்கிணைப்பாளர் டாக்டர் சாம்பசிவம் உள்பட பலர் கலந்து கொண்டனர்.

    News