" “It always seems impossible until it is done.”-Nelson Mandela"

வள்ளவிளை, நீரோடி பகுதிகளில் 2-வது நாளாக கடல் சீற்றம் மீனவர்கள் மீன்பிடிக்க செல்லவில்லை

Views - 70     Likes - 0     Liked


  • கருங்கல்,

    தென்கிழக்கு அரபிக்கடல் பகுதியில் குறைந்த காற்றழுத்த தாழ்வு நிலை உருவாகி உள்ளது. இதனால் கடல் அலையின் வேகம் அதிகமாக இருக்கும் என்றும், மீனவர்கள் மீன்பிடிக்க செல்ல வேண்டாம் எனவும் வானிலை ஆய்வு மையம் எச்சரிக்கை விடுத்துள்ளது. இந்தநிலையில், குமரி மாவட்டத்தில் நேற்று முன்தினம் கடல் சீற்றம் ஏற்பட்டது. வள்ளவிளை, மார்த்தான்டன்துறை போன்ற மீனவ கிராமத்தில் கடற்கரையோரம் இருந்த பல வீடுகள் சேதமடைந்தன. இதனால், மீனவர்கள் வீடுகளைவிட்டு வெளியேறி பாதுகாப்பான பகுதிகளில் தஞ்சம் அடைந்தனர்.

    மாவட்டத்தில் பல இடங்களில் இரவு முழுவதும் கடல் சீற்றம் நீடித்தது. இதையடுத்து கரையோர பகுதி மக்கள் இரவு முழுவதும் அச்சத்துடன் தூக்கமின்றி தவித்தனர்.

    இந்தநிலையில், குமரி மாவட்டத்தில் பல பகுதிகளில் நேற்று 2-வது நாளாக கடல் சீற்றம் இருந்தது. குறிப்பாக, நீரோடி, மார்த்தாண்டன்துறை, வள்ளவிளை, பூத்துறை போன்ற பகுதிகளில் கடல் சீற்றம் அதிகமாக ஏற்பட்டது. கடலில் ராட்சத அலைகள் எழுந்து தடுப்பு சுவரையும் கடந்து ஊருக்குள் புகுந்தன. இதனால், கரையோர பகுதி மக்கள் வீடுகளில் தங்க முடியாமல் தவித்தனர். மார்த்தாண்டன்துறை கிராமத்தில் கடற்கரையில் உள்ள ஆலயத்தின் கொடிமர பீடம் முற்றிலுமாக சேதம் அடைந்தது.

    கடல் சீற்றம் காரணமாக இந்த பகுதியில் உள்ள மீனவர்கள் மீன்பிடிக்க செல்லவில்லை.

    குளச்சல் மீன்பிடி துறைமுகத்தை தங்குதளமாக கொண்டு 300-க்கும் மேற்பட்ட விசைப்படகுகளும், ஆயிரத்துக்கும் மேற்பட்ட வள்ளம், கட்டுமரங்களும் மீன்பிடித்து வருகின்றன. நாளை மறுநாள் (வெள்ளிக்கிழமை) முதல் மீன்பிடி தடைக்காலம் அமலில் வர உள்ளதால், ஏற்கனவே, கடலுக்குள் சென்றிருந்த விசைப்படகுகள் கரை திரும்பிய வண்ணம் உள்ளன.

    கட்டுமர மீனவர்கள் பொதுவாக அதிகாலையில் கடலுக்குள் சென்று மதியம் கரை திரும்புவார்கள். நேற்று முன்தினம் குளச்சல் பகுதியில் கடல் சீற்றம் ஏற்பட்டதால் கட்டுமர மீனவர்கள் யாரும் மீன்பிடிக்க செல்லவில்லை.

    இந்தநிலையில் நேற்று குளச்சல் பகுதியில் கடலுக்குள் பலத்த காற்று வீசியது. இதனால், 2-வது நாளாக நேற்றும் வள்ளம், கட்டுமர மீனவர்கள் மீன்பிடிக்க செல்லவில்லை. இதையடுத்து மீனவர்கள் தங்களது கட்டுமரம், வள்ளங்களை மேடான பகுதியில் பாதுகாப்பாக நிறுத்தி வைத்திருந்தனர். இதனால், குளச்சலில் மீன்பிடி தொழில் பாதிக்கப்பட்டுள்ளது. 

    News