" “The best preparation for tomorrow is doing your best today.”"

அரசு ஆஸ்பத்திரியில் தைராய்டு பரிசோதனைக்கு ரூ.2 லட்சம் செலவில் புதிய கருவி

Views - 99     Likes - 0     Liked


  • நாகர்கோவில்,

    நாகர்கோவில் ஆசாரிபள்ளம் அரசு மருத்துவக்கல்லூரி ஆஸ்பத்திரியில் தைராய்டு பரிசோதனைக்காக ரூ.2 லட்சத்து 18 ஆயிரம் செலவில் புதிய கருவி வாங்கப்பட்டுள்ளது. இதனை தொடங்கி வைக்கும் நிகழ்ச்சி நேற்று ஆஸ்பத்திரியில் நடந்தது. டீன் (பொறுப்பு) டாக்டர் ராதாகிருஷ்ணன் புதிய கருவி மூலம் பரிசோதனையை தொடங்கி வைத்தார்.

    இதேபோல் ஆஸ்பத்திரி விரிவாக்க கட்டிடத்தின் அறுவை சிகிச்சை அரங்கில் இருந்த எண்டோஸ்கோபி பரிசோதனையை, அதே கட்டிடத்தின் 3-வது மாடியில் தனிப்பிரிவாக தொடங்கி வைக்கும் நிகழ்ச்சியும் நடந்தது. இந்த நிகழ்ச்சியிலும் டீன் ராதாகிருஷ்ணன் எண்டோஸ்கோபி தனிப்பிரிவை ரிப்பன் வெட்டி தொடங்கி வைத்தார். பின்னர் டாக்டர் ராதாகிருஷ்ணன் நிருபர்களிடம் கூறியதாவது.

    ஆஸ்பத்திரியில் செயல்படும் தைராய்டு பரிசோதனையை டாக்டர் வீணா தலைமையில் டாக்டர்கள் தீபா, ரோமி, அருணா ஆகியோர் மேற்கொள்கிறார்கள். தைராய்டு பரிசோதனை புதிய கருவியில் ஒரு ‘கிட்‘ மூலம் 90 பரிசோதனைகள் மேற்கொள்ளலாம். வாரந்தோறும் புதன்கிழமைகளில் இந்த மையத்தில் தைராய்டு பரிசோதனை மேற்கொள்ளப்படுகிறது. மறுநாளான வியாழக்கிழமை பரிசோதனை அறிக்கை வழங்கப்படும். தனியார் பரிசோதனைக்கூடங்களுக்கு இணையாக அரசு மருத்துவக்கல்லூரியில் தைராய்டு பரிசோதனை மேற்கொள்ளப்படுகிறது.

    அரசு மருத்துவக்கல்லூரி ஆஸ்பத்திரி வெளி நோயாளிகள், உள் நோயாளிகள், மாவட்டத்தின் பிற பகுதிகளில் உள்ள அரசு மருத்துவமனை நோயாளிகளும் இங்கு பரிசோதனை செய்து கொள்ளலாம். கடந்த வாரம் இந்த பரிசோதனை கூடத்தில் 70 பேர் பரிசோதனை மேற்கொண்டனர். இந்த வாரத்துக்கு இதுவரை 54 பேர் பரிசோதனைக்காக பதிவு செய்துள்ளனர்.

    வயிற்றில் உள்ள புற்றுநோய் கட்டிகள், சாதாரண கட்டிகள், வயிற்றுப்புண்களால் ஏற்படும் ரத்தக்கசிவு, பித்தநீர் குழாயில் கல் அடைப்பு, வேறு பல காரணங்களால் ஏற்படும் ரத்தக்கசிவுகள் போன்றவற்றுக்கு தனிப்பிரிவாக தொடங்கப்பட்டுள்ள எண்டோஸ்கோபி மூலம் சிகிச்சை அளிக்க வசதியாக இருக்கும். இதே சிகிச்சைகளை இதற்கு முன்பு கீழ்தளத்தில் உள்ள அறுவை சிகிச்சை அரங்கில் வைத்து செய்தோம். இனிமேல் இந்த சிகிச்சைகள் அனைத்தும் தனிப்பிரிவில் நடைபெறும். இவ்வாறு ராதாகிருஷ்ணன் கூறினார்.

    இந்த நிகழ்ச்சியில் உறைவிட மருத்துவ அதிகாரி ஆறுமுகவேலன், உதவி உறைவிட மருத்துவ அதிகாரிகள் கலைக்குமார், டாக்டர் ரெனிமோள், கல்லீரல் மற்றும் குடல்நலப்பிரிவு துறைத்தலைவர் டாக்டர் பாப்பி ரிஜாய்ஸ், குடல் அறுவை சிகிச்சை நிபுணர்கள் பிரபாகரன், ஜான்சன் மற்றும் பயிற்சி டாக்டர்கள், நர்சுகள் கலந்து கொண்டனர்.

    News