" If you fell down yesterday, stand up today."

ஊதிய உயர்வு வழங்க கோரி அரசு ரப்பர் கழக தொழிலாளர்கள் சாலை மறியல்; 583 பேர் கைது

Views - 65     Likes - 0     Liked


  • நாகர்கோவில்,

    குமரி மாவட்டத்தில் கீரிப்பாறை, காளிகேசம், மணலோடை, குற்றியார், சிற்றார் உள்பட 9 இடங்களில் அரசு ரப்பர் தோட்டங்கள் உள்ளன. இதுபோக 2 இடங்களில் அரசு ரப்பர் தொழிற்சாலைகள் செயல்பட்டு வருகிறது. இந்த அரசு ரப்பர் கழகத்தில் சுமார் 1500 தொழிலாளர்கள் பணியாற்றி வருகிறார்கள். இவர்களுக்கு 3 ஆண்டுகளுக்கு ஒரு முறை ஊதிய உயர்வு வழங்கப்படுவது வழக்கம். அதன்படி கடைசியாக கடந்த 2013-ம் ஆண்டு ஊதிய உயர்வு வழங்கப்பட்டது. அதன்பிறகு கடந்த 2016-ம் ஆண்டு மீண்டும் ஊதிய உயர்வு வழங்கப்பட்டு இருக்க வேண்டும். ஆனால் இதுவரை வழங்கப்படவில்லை.

    ஊதிய உயர்வு தொடர்பாக தொழிற்சங்க நிர்வாகிகளுடன் அதிகாரிகள் நடத்திய பேச்சுவார்த்தைகள் தோல்வியிலேயே முடிந்து வந்தது. இதைத் தொடர்ந்து பல்வேறு கோரிக்கைகளை வலியுறுத்தி அரசு ரப்பர் கழக அனைத்து சங்க ஒருங்கிணைப்பு குழு சார்பில் 23-ந் தேதி (அதாவது நேற்று) நாகர்கோவில் வடசேரியில் உள்ள அரசு ரப்பர் கழக அலுவலகம் முன் சாலை மறியல் போராட்டம் நடத்தப்படும் என்று அறிவிக்கப்பட்டு இருந்தது.

    அதாவது அரசு ரப்பர் கழக தொழிலாளர்களுக்கு ஊதிய உயர்வு வழங்கி மாதம் ரூ.18 ஆயிரம் கிடைத்திட வழிசெய்ய வேண்டும். அகவிலைப்படி ஒரு புள்ளிக்கு ரூ.1 வழங்க வேண்டும். வேலைக்கான கத்தியை தீட்டிட ரூ.250 வழங்குதல் அவசியம். தொழிலாளர்களுக்கு வீட்டு வாடகை மாதம் தோறும் ரூ.500 வழங்கினால் பயனுள்ளதாக இருக்கும். மழை நாள் படியாக அரை நாள் ஊதியம் வழங்க வேண்டும் உள்ளிட்ட பல்வேறு கோரிக்கைகளை வலியுறுத்தி சாலை மறியல் போராட்டத்தை அறிவிக்கப்பட்டது.

    அதன்படி அரசு ரப்பர் கழக அனைத்து சங்க ஒருங்கிணைப்பு குழுவை சேர்ந்த நிர்வாகிகளும், தொழிலாளர்களும் நேற்று காலை அரசு ரப்பர் கழக அலுவலகம் முன் திரண்டனர். அவர்களுக்கு ஆதரவாக தி.மு.க., காங்கிரஸ் மற்றும் அன்னை சோனியா ராகுல்காந்தி பேரவை நிர்வாகிகளும் அங்கு கூடியிருந்தனர்.

    பின்னர் அனைவரும் மாவட்ட வன அலுவலகம் முன் ஆர்ப்பாட்டம் நடத்தினர். ஆர்ப்பாட்டத்துக்கு சி.ஐ.டி.யு. பொதுச்செயலாளர் வல்சகுமார் தலைமை தாங்கினார். தி.மு.க. மாவட்ட செயலாளர் சுரேஷ்ராஜன் எம்.எல்.ஏ, முன்னாள் எம்.பி. ஹெலன் டேவிட்சன், குமரி கிழக்கு மாவட்ட காங்கிரஸ் தலைவர் ராதாகிருஷ்ணன், பிரின்ஸ் எம்.எல்.ஏ., ஐ.என்.டி.யு.சி. மாவட்ட செயலாளர் அனந்தகிருஷ்ணன், முன்னாள் எம்.பி. பெல்லார்மின் உள்பட பலர் கலந்து கொண்டனர்.

    போராட்ட அறிவிப்பை தொடர்ந்து சங்க ஒருங்கிணைப்பு குழு நிர்வாகிகளை அரசு ரப்பர் கழக அதிகாரிகள் பேச்சுவார்த்தைக்கு அழைத்தனர். அதைத் தொடர்ந்து எம்.எல்.ஏ.க்கள் சுரேஷ்ராஜன், பிரின்ஸ் ஆகியோர் தலைமையில் சங்க நிர்வாகிகள் சென்று பேச்சுவார்த்தை நடத்தினர். வெகு நேரம் நடைபெற்ற இந்த பேச்சுவார்த்தையில் உடன்பாடு ஏற்படவில்லை.

    எனவே திட்டமிட்டபடி அனைவரும் மாவட்ட வன அலுவலகம் முன் உள்ள வடசேரி சந்திப்பில் இருந்து புத்தேரி செல்லும் சாலையில் அமர்ந்து மறியலில் ஈடுபட்டனர். இதில் எம்.எல்.ஏ.க்கள் சுரேஷ்ராஜன், பிரின்ஸ் உள்பட ஏராளமானவர்கள் கலந்து கொண்டு கண்டன கோஷங்கள் எழுப்பினர். தொடர்ந்து மறியலில் ஈடுபட்ட 223 பெண்கள் உள்பட 583 பேரை போலீசார் கைது செய்து அங்குள்ள ஒரு மண்டபத்தில் அடைத்தனர். இதில் எம்.எல்.ஏ.க்கள் கைது செய்யப்படவில்லை. துணை போலீஸ் சூப்பிரண்டு இளங்கோவன், இன்ஸ்பெக்டர் அருள்ஜாண் ஒய்ஸ்லின்ராஜ், சப்-இன்ஸ்பெக்டர்கள் மோகனஅய்யர், சுந்தரமூர்த்தி உள்பட ஏராளமான போலீசார் இந்த பாதுகாப்பு பணியில் ஈடுபட்டனர்.

    இதுகுறித்து சங்க நிர்வாகிகள் கூறுகையில், ‘அரசு ரப்பர் கழக தொழிலாளர்களுக்கு கடந்த 2016-ம் ஆண்டே ஊதிய உயர்வு வழங்கப்பட்டிருக்க வேண்டும். ஆனால் இன்னும் வழங்கப்படவில்லை. இதனால் ஊதிய உயர்வு கேட்டு பல கட்ட போராட்டங்கள் நடத்தி வருகிறோம். இந்த நிலையில் அரசின் கவனத்தை ஈர்க்கும் வகையில் தற்போது மறியல் போராட்டம் நடத்தப்பட்டு இருக்கிறது. இனியும் கோரிக்கை நிறைவேற்றப்படவில்லை எனில் அடுத்த கட்ட போராட்டம் நடத்தப்படும்‘ என்றனர். 

    News