அமெரிக்க டாலருக்கு நிகரான இந்திய ரூபாயின் மதிப்பு வரலாறு காணாத வகையில் வீழ்ச்சி

Views - 54 Likes - 0 Liked

மும்பை,

டாலருக்கு நிகரான ரூபாயின் மதிப்பு தொடர்ந்து சரிவைச் சந்தித்து வருகிறது. துருக்கி நாணய மதிப்பு சரிவு உள்ளிட்ட சர்வதேச காரணிகளின் தாக்கம் காரணமாகவே ரூபாயின் மதிப்பு சரிந்து வருவதாக நிபுணர்கள் தெரிவிக்கின்றனர்.

2018-ஆம் ஆண்டில் இதுவரை ரூபாயின் மதிப்பு 10 சதவீதம் அளவுக்கு சரிந்திருப்பதாகவும் சில புள்ளி விவரங்கள் தெரிவிக்கின்றன. இந்நிலையில், மாத இறுதி என்பதால் இறக்குமதியாளர்கள் மத்தியில் டாலருக்கான தேவை அதிகரித்ததால் அதற்கு நிகரான ரூபாயின் மதிப்பு மேலும் சரிவைச் சந்தித்துள்ளது.

அந்நியச் செலாவணி சந்தையில் இன்று காலை வர்த்தகத்தின்போது டாலருக்கு நிகரான இந்திய ரூபாயின் மதிப்பு மேலும் 26 காசுகள் குறைந்து ரூ.71 ஆக உள்ளது. டாலருக்கு நிகரான ரூபாய் மதிப்பு 71- ஐ எட்டுவது இதுதான் முதல் தடவையாகும். ரூபாயின் மதிப்பு சரிவால் இறக்குமதிகள், வெளிநாட்டு கல்வி மற்றும் வெளிநாட்டு பயணங்களுக்கான செலவு அதிகரித்துள்ளது.

கச்சா எண்ணெய் தேவையில் 80 சதவீதத்தை இந்தியா இறக்குமதி செய்வதால், கச்சா எண்ணெய் இறக்குமதியிலும் ரூபாய் மதிப்பின் சரிவு கடுமையான தாக்கத்தை ஏற்படுத்தி, அரசு மற்றும் நுகர்வோர் இருதரப்புக்கும் பாதிப்பை ஏற்படுத்தியிருப்பதாக வல்லுநர்கள் தெரிவித்துள்ளனர்.அதேவேளையில், மும்பை பங்குச்சந்தையில் சென்செக்ஸ் 78.64 புள்ளிகள் வீழ்ச்சி அடைந்து 38,611.46 புள்ளிகளாக வர்த்தகம் ஆகிறது.

News