" “Practice kindness all day to everybody and you will realize you’re already in heaven now.” – Jack Kerouac"

125 கடைகளுக்கு சீல் வைப்பு; மாநகராட்சி அதிகாரிகள் அதிரடி நடவடிக்கை

Views - 96     Likes - 0     Liked


  • நாகர்கோவில், 
     
    நாகர்கோவில் வடசேரி பஸ் நிலையம் அருகில் பிரபல வணிக வளாக கட்டிடம் ஒன்று உள்ளது. இந்த கட்டிடம் தரைதளம் மற்றும் 6 தளங்களைக் கொண்டதாகும். இதில் லாட்ஜ், வங்கிகள், இன்சூரன்ஸ் நிறுவனம், டிராவல்ஸ் நிறுவன அலுவலகங்கள், செல்போன் கடைகள், ஜவுளிக்கடைகள், பேக்கரி கடைகள், பேன்சி ஸ்டோர், பரிசுப்பொருள் விற்பனை மையம், உடற்பயிற்சிக்கூடம் உள்ளிட்ட பல்வேறு வணிக நிறுவனங்கள், கடைகள் செயல்பட்டு வந்தன.
     
    இந்தநிலையில் இந்த கட்டிடம் திட்ட அனுமதிக்கு மாறாக கட்டப்பட்டுள்ளதாகவும், எனவே இந்த வணிக வளாகத்தில் உள்ள கடைகள் அனைத்தையும் காலி செய்யுமாறும் மாநகராட்சி மற்றும் உள்ளூர் திட்டக்குழுமம் சார்பில் கடந்த ஒரு மாதத்துக்கு முன்பு நோட்டீஸ் வழங்கப்பட்டது.
     
    ஆனாலும் இந்த வணிக வளாகத்தில் தொடர்ந்து கடைகள், வணிக நிறுவனங்கள் செயல்பட்டு வந்தன. இதையடுத்து 13–ந்தேதி (நேற்று) அன்று கடைகள் அனைத்தும் பூட்டி சீல் வைக்கப்படும் என்றும், கடைகள் மற்றும் நிறுவனங்கள், அலுவலகங்கள் நடத்துபவர்கள் காலி செய்துகொள்ளுமாறு கூறி கடந்த சில நாட்களுக்கு முன்பும் அதிகாரிகள் அறிவித்திருந்ததாக கூறப்படுகிறது. இதையடுத்து பெரும்பாலான கடைக்காரர்கள் கடைகளில் இருந்த பொருட்களை அகற்றி காலி செய்தனர். சிலர் நேற்று காலை வரையிலும் பொருட்களை அகற்றிக் கொண்டிருந்தனர்.
     
    இந்த வணிக வளாகத்தில் செயல்பட்டு வந்த 2 வங்கிகள் நேற்றும் வழக்கம்போல் திறக்கப்பட்டு செயல்பட்டுக் கொண்டிருந்தன. அதேபோல் இன்சூரன்ஸ் நிறுவனம், டிராவல்ஸ் நிறுவனங்கள் போன்றவை செயல்பட்டுக் கொண்டிருந்தன. இந்தநிலையில் நேற்று மதியம் மாநகராட்சி ஆணையர் சரவணக்குமார், உள்ளூர் திட்டக்குழும உதவி இயக்குனர் மூக்கையா, நாகர்கோவில் மாநகர நகரமைப்பு அதிகாரி விமலா, ஆய்வாளர்கள் கெபின்ஜாய், சந்தோஷ்குமார், மகேஸ்வரி, துர்காதேவி மற்றும் மாநகராட்சி ஊழியர்கள் வணிக வளாகத்தில் உள்ள கடைகளை பூட்டி சீல் வைக்கும் நடவடிக்கை எடுக்க வந்தனர்.
     
    அப்போது அங்குள்ள வங்கிகள் மற்றும் இன்சூரன்ஸ் நிறுவனம் போன்றவற்றில் பணியாற்றிய அதிகாரிகள், ஊழியர்கள், வாடிக்கையாளர்கள் அனைவரையும் வெளியேற்றிவிட்டு அவற்றை பூட்டி சீல் வைத்தனர். இதேபோல் கடைகள், வணிக நிறுவனங்களுக்கும் பூட்டு போட்டு சீல் வைக்கப்பட்டது. சீல் வைத்தபின்னர் ஒவ்வொரு கடை மற்றும் நிறுவனம் போன்றவற்றில் அனுமதிக்கு மாறாக இந்த கட்டிடம் கட்டப்பட்டுள்ளதால் நகர் ஊரமைப்புச் சட்டம் 1971 பிரிவு 56 மற்றும் 57–ன்கீழ் இன்று (அதாவது நேற்று) மூடி முத்திரையிடப்படுகிறது. மூடி முத்திரையிடப்பட்ட இந்த கட்டிடத்துக்கு பாதுகாப்பு தரவேண்டியது சட்டப்படி கட்டிட உரிமையாளரின் முழு பொறுப்பாகும் எனவும் இதன்மூலம் அறிவிக்கப்படுகிறது என்ற அறிவிப்பு நோட்டீஸ் ஒட்டப்பட்டது.
     
    நேற்று மாலை வரை இந்த வணிக வளாகத்தில் உள்ள சுமார் 125 கடைகள் மற்றும் வணிக நிறுவனங்கள், வங்கிகள் போன்றவற்றுக்கு அதிரடியாக சீல் வைக்கப்பட்டது. இந்த தகவலை மாநகராட்சி அதிகாரிகள் தெரிவித்தனர். அதேநேரத்தில் வீட்டு உபயோக பொருட்கள் விற்பனை செய்யும் நிறுவனம் கோர்ட்டில் 2 மாதங்களுக்கு தடை ஆணை பெற்றிருந்ததால், அதற்கு மட்டும் அதிகாரிகள் சீல் வைக்கவில்லை.
     
    இந்த சீல் வைப்பு நடவடிக்கையையொட்டி வடசேரி போலீஸ் சப்–இன்ஸ்பெக்டர் அனில்குமார் தலைமையில் போலீசார் பாதுகாப்பு பணியில் ஈடுபட்டனர். இதனால் நேற்று வடசேரி பகுதியில் பரபரப்பு நிலவியது.
     
    நாகர்கோவில் வடசேரி சந்திப்பு பகுதியில் சாலையை விரிவாக்கம் செய்ய மாநகராட்சி சார்பில் திட்டமிடப்பட்டு இருந்தது. இதற்காக வடசேரி கனகமூலம் சந்தையில் இருந்த பழமைவாய்ந்த கட்டிடங்கள் அகற்றப்பட்டு இருந்தது. அதில் மீதமிருந்த 2 கடைகளை அகற்றும் பணி மாநகராட்சி ஆணையர் சரவணகுமார் உத்தரவின்பேரில் நேற்று நடந்தது. அப்போது புல்டோசர் மூலம் கடைகள் இடித்து அகற்றப்பட்டன.

     

    News