" Only I can change my life."

குமரி மாவட்டத்தில்கோர்ட்டு பணியாளர்களுக்கு தெர்மல் ஸ்கேனர் மூலம் பரிசோதனை

Views - 119     Likes - 0     Liked


  • நாகர்கோவில்,
     
    குமரி மாவட்டத்தில் கோர்ட்டு பணியாளர்களுக்கு தெர்மல் ஸ்கேனர் மூலம் பரிசோதனை செய்யப்பட்டது.
     
    கொரோனா பரிசோதனை
     
    ஊரடங்கு உத்தரவு காரணமாக கோர்ட்டுகளில் வழக்கு விசாரணை நடைபெறாமல் இருந்தது. அதே சமயம் அவசர வழக்குகள், ஜாமீன் மனுக்களின் மீதான விசாரணை மட்டும் ஆன்லைன் மூலமாக நடந்தன. இதற்காக குறைவான பணியாளர்கள் மட்டும் கோர்ட்டுக்கு வந்து சென்றனர். அதே சமயம் வக்கீல்கள் மற்றும் வழக்கில் சம்பந்தப்பட்டவர்கள் கூட கோர்ட்டுக்குள் அனுமதிக்கப்படவில்லை
    இந்த நிலையில் தமிழகத்தில் அனைத்து கோர்ட்டுகளிலும் பணிக்கு வரும் பணியாளர்களுக்கு கொரோனா பரிசோதனை நடத்தும்படி சென்னை ஐகோர்ட்டு உத்தரவிட்டது. அதன்படி குமரி மாவட்டத்தில் நேற்று கோர்ட்டுக்கு வந்த பணியாளர்களுக்கு தெர்மல் ஸ்கேனர் மூலம் பரிசோதனை நடந்தது. மேலும் நீதிபதிகளுக்கும் பரிசோதனை மேற்கொள்ளப்பட்டது.
     
    நாகர்கோவில் கோர்ட்டில் நேற்று 50 சதவீத பணியாளர்கள் பணிக்கு வந்தனர். அதாவது சுமார் 200 பேர் வந்திருந்தனர். அவர்களுக்கு நாகர்கோவில் மாநகராட்சி அதிகாரிகள் தெர்மல் ஸ்கேனர் மூலம் உடல் வெப்பத்தை பரிசோதனை செய்தனர். இதில் சராசரியான உடல் வெப்பம் இருந்த அனைத்து பணியாளர்களும் கோர்ட்டுக்குள் அனுமதிக்கப்பட்டனர். இந்த பரிசோதனையானது கோர்ட்டில் நுழைவு வாயில் அருகே நடந்தது. மேலும் மாவட்ட முதன்மை நீதிபதி அருள்முருகன் மற்றும் பல நீதிபதிகளுக்கும் பரிசோதனை நடந்தது.
     
    பத்மநாபபுரம்
     
    தக்கலையில் உள்ள பத்மநாபபுரம் கோர்ட்டில் நீதிபதிகள் மற்றும் கோர்ட்டு பணியாளர்களுக்கு தெர்மல் ஸ்கேனர் மூலம் கொரோனா பரிசோதனை பத்மநாபபுரம் நகராட்சி சார்பில் நடத்தப்பட்டது. பத்மநாபபுரம் சார்பு நீதிபதி ரேணுகா தேவி, மாவட்ட முதன்மை உரிமையியல் நீதிபதி தர்மபிரபு, கூடுதல் மாவட்ட உரிமையியல் நீதிபதி விஸ்வதா மற்றும் நீதிபதிகளுக்கும் கோர்ட்டு பணியாளர்களுக்கும் தெர்மல் ஸ்கேனர் மூலம் பரிசோதனை நடந்தது. அப்போது தக்கலை வட்டார மருத்துவ அலுவலர் டாக்டர் லாரன்ஸ் விக்டர் ஜோ கொரோனா குறித்து விழிப்புணர்வு ஏற்படுத்தினார். நகராட்சி சுகாதார ஆய்வாளர் முத்துராமலிங்கம், சுகாதார மேற்பார்வையாளர் மோகன் ஆகியோர்கள் உடனிருந்தனர்.
     
    இதே போல் பூதப்பாண்டி குழித்துறை உள்பட அனைத்து கோர்ட்டுகளிலும் இந்த பரிசோதனை நடந்தது
    News