" Love For All, Hatred For None"

குமரியில் கொரோனாவுக்கு ஒரே நாளில் 4 பேர் பலி - வங்கி, மருந்துக்கடை மூடப்பட்டன

Views - 109     Likes - 0     Liked


  • நாகர்கோவில்,
     
    குமரி மாவட்டத்தில் கொரோனா பாதிப்பு எண்ணிக்கை ஒவ்வொரு நாளும் அதிர்ச்சி அளிக்கும் வகையில் உயர்ந்து வருகிறது. இதுவரை இல்லாத அளவுக்கு நேற்று முன்தினம் ஒரே நாளில் 184 பேர் பாதிக்கப்பட்டனர். நள்ளிரவில் இந்த எண்ணிக்கை மேலும் உயர்ந்து 201 ஆக உயர்ந்தது
    இதனால் மாவட்டத்தில் மொத்த பாதிப்பு எண்ணிக்கை 3 ஆயிரத்து 86 ஆனது. அதேபோல் கொரோனாவால் ஏற்கனவே 21 பேர் இறந்துள்ளனர். இதற்கிடையே ஒரே நாளில் மேலும் 4 பேர் கொரோனாவுக்கு பலியாகி உள்ளனர்.
     
    நாகர்கோவில், காந்திநகர் பகுதியைச் சேர்ந்த 71 வயது பெண் கொரோனா நோய் தொற்றுடன் ஆசாரிபள்ளம் அரசு மருத்துவக்கல்லூரி ஆஸ்பத்திரியில் சிகிச்சை பலன் அளிக்காமல் பரிதாபமாக இறந்தார். இதேபோல் திருவட்டார் பகுதியைச் சேர்ந்த 54 வயது பெண் நாகர்கோவிலில் உள்ள ஒரு தனியார் ஆஸ்பத்திரியில் சிகிச்சை பலனின்றி இறந்தார்.
     
    நாகர்கோவில் மேலராமன்புதூர் பகுதியைச் சேர்ந்த 69 வயது முதியவர் கொரோனா தொற்றுடன் நாகர்கோவிலில் உள்ள ஒரு தனியார் ஆஸ்பத்திரியில் சிகிச்சை பெற்று வந்தார். அங்கு அவருக்கு உடல்நிலை மோசமானதைத் தொடர்ந்து அவரை ஆசாரிபள்ளம் ஆஸ்பத்திரிக்கு கொண்டு சென்றனர். ஆனால் செல்லும் வழியிலேயே அவர் இறந்து விட்டதாக கூறப்படுகிறது. வெட்டூர்ணிமடம் கிறிஸ்துநகர் பகுதியை சேர்ந்த 72 வயது முதியவர் கொரோனாவால் ஆசாரிபள்ளம் ஆஸ்பத்திரியில் இறந்தார். இவர்கள் அனைவரும் கொரோனாவுடன் பிற நோயாலும் பாதிக்கப்பட்டிருந்ததாக டாக்டர்கள் தெரிவித்தனர். இந்த 4 பேருடன் சேர்த்து குமரி மாவட்டத்தில் பலியானவர்களின் எண்ணிக்கை 25 ஆக உயர்ந்துள்ளது.
     
    நேற்று முன்தினம் தொற்று கண்டறியப்பட்டவர்களில் ஒருவர் நாகர்கோவில் கோர்ட்டு ரோட்டில் உள்ள ஒரு வங்கிக் கிளையில் ஊழியராக பணியாற்றி வருகிறார். இவருடைய வீடு நாகர்கோவில் கணேசபுரத்தில் உள்ளது. இதையடுத்து மாநகராட்சி சுகாதார ஆய்வாளர் பகவதிப்பெருமாள் தலைமையில் ஊழியர்கள் அந்த வங்கி கிளைக்கு கிருமி நாசினி தெளித்து வங்கியை மூடினர்.
     
    இதேபோல் அவருடைய வீட்டுக்கும் கிருமி நாசினி தெளித்து தடை செய்யப்பட்ட பகுதியாக அறிவிக்கப்பட்டது. அவருடைய குடும்பத்தினர், உடன் பணியாற்றிய ஊழியர்கள், தொடர்பில் இருந்தவர்கள் பட்டியலை மாநகராட்சி சுகாதாரப்பணியாளர்கள் சேகரித்து, அவர்களுக்கும் கொரோனா பரிசோதனை மேற்கொள்ள முடிவு செய்துள்ளனர்.
     
    கோர்ட்டு ரோட்டில் உள்ள ஒரு மருந்து கடையில் அறுகுவிளையைச் சேர்ந்தவர் பணியாற்றி வந்தார். அவருக்கு கடந்த சில நாட்களாக காய்ச்சல் இருந்ததையடுத்து கொரோனா பரிசோதனை மேற்கொள்ளப்பட்டது. இதில் அவருக்கு கொரோனா தொற்று இருப்பது உறுதி செய்யப்பட்டது.
     
    இதையடுத்து அவர் ஆஸ்பத்திரியில் அனுமதிக்கப்பட்டு சிகிச்சை பெற்று வருகிறார். அவர் பணியாற்றிய மருந்துக்கடை முழுவதும் கிருமி நாசினி தெளித்து கடை மூடப்பட்டது. மருந்துக்கடை ஊழியர் குடும்பத்தினர் மற்றும் மருந்துக்கடையில் அவருடன் பணியாற்றியவர்களுக்கு கொரோனா பரிசோதனை மேற்கொள்ளும் நடவடிக்கையில் சுகாதாரத்துறை அதிகாரிகள் ஈடுபட்டுள்ளனர்
    News