" If you fell down yesterday, stand up today."

மார்த்தாண்டம் மேம்பாலத்தில் திடீர் பள்ளம் வாகன ஓட்டிகள் பீதி

Views - 79     Likes - 0     Liked


  • மார்த்தாண்டம் மேம்பாலத்தில் திடீர் பள்ளம் வாகன ஓட்டிகள் பீதி

    மார்த்தாண்டம் மேம்பாலத்தில் திடீர் பள்ளம் தோன்றியுள்ளதால் பெரும் பரபரப்பு ஏற்பட்டுள்ளது. மார்த்தாண்டம் பகுதியில் நிலவும் போக்குவரத்து நெரிசலை கட்டுப்படுத்தும் நோக்கில் குழித்துறை தாமிரபரணி ஆற்றுபாலத்திலிருந்து பம்மம் வரை சுமார் 2.5 கி.மீ. தூரத்திற்கு இரும்பில் ஆன மேம்பாலம் அமைக்கப்பட்டது.

    இந்த மேம்பாலத்தை கன்னியாகுமரிக்கு வந்த பிரதமர் நரேந்திரமோடி வீடியோ கான்பிரன்ஸ் மூலம் திறந்து வைத்தார். மேம்பாலம் வழியாக வாகன போக்குவரத்து நடந்து வருகிறது. அதேபோன்று மேம்பாலத்தின் கீழ்பகுதியில் உள்ள ரோடு வழியாகவும் வாகனங்கள் சென்று வருகிறது.

    மேம்பாலம் வழியாக வாகனங்கள் சென்றுவரும் நிலையில் மேம்பாலத்தின் பக்கசுவர்களில் ஆங்காங்கே விரிசல் ஏற்பட்டது பொதுமக்களை அதிர்ச்சி அடைய செய்தது. மேலும், மேம்பாலத்தில் பொருத்தப்பட்டிருந்த மெகாசைஸ் பிளாஸ்டிக் பைப் வாகனங்கள் சென்று கொண்டிருந்த போது உடைந்து குறுக்கே விழுந்தது பரபரப்பை ஏற்படுத்தியது. மேம்பால பக்கசுவரில் உள்ள காங்கிரீட் துண்டுகள் உடைந்து விழுந்து நடந்து சென்ற பாதசாரிகளை பதம் பார்த்தது மேலும் அச்சத்தை ஏற்படுத்தியது. இது ஒருபுறம் இருக்க மேம்பாலத்தில் உள்ள ரோட்டின் மேற்பகுதி ஆங்காங்கே திடீரென சேதம் அடைந்து வருவதும் அவை சீரமைக்கப்படுவதுமாக உள்ளது.

    மேம்பால பணிகள் மேற்கொள்ளப்பட்ட போது அவசர கதியில் செய்யப்பட்டதும், அலட்சியம் காட்டப்பட்டதாக ஏற்கெனவே குற்றச்சாட்டுகள் எழுந்து வந்தது. இந்நிலையில், மேம்பாலத்தில் திடீரென பள்ளம் தோன்றியதை கண்ட பொதுமக்கள் சம்பந்தப்பட்ட துறைக்கு தகவல் தெரிவித்தனர். இதைதொடர்ந்து தார் போட்ட ரோட்டில் ஏற்பட்ட பள்ளத்தில் சிமெண்ட் கலவை கொண்டு பராமரிப்பு மேற்கொள்ளப்பட்டுள்ளது. அத்துடன் அப்பகுதி வழியாக வாகனங்கள் செல்லாதவாறு டிரம் வைக்கப்பட்டுள்ளது. அப்பகுதியில் டிரம் வைக்கப்பட்டிருப்பது தெரியாமல் வரும் வாகனங்கள் விபத்தில் சிக்கும் அபாயம் ஏற்பட்டுள்ளதாகவும் சமூக ஆர்வலர்கள் குற்றஞ்சாட்டி உள்ளனர்.

    எனவே, மார்த்தாண்டம் மேம்பாலத்தில் அவ்வப்போது ஏற்படும் பழுதுகளை களைய சம்பந்தப்பட்ட துறை உயர் அதிகாரிகள் நேரில் ஆய்வு செய்து நிரந்தர தீர்வு காண வழி வகை செய்ய வேண்டும் எனவும் கோரிக்கை விடுக்கப்பட்டுள்ளது.

    News