" Love For All, Hatred For None."

வட்டக்கோட்டையை சுற்றி பார்க்க படகு சர்வீஸ் மனது வைக்குமா தமிழகஅரசு?

Views - 102     Likes - 0     Liked


  • குமரிக்கு மிக அருகில் அமைந்துள்ள வரலாற்று சிறப்புமிக்க சுற்றுலாத்தலமான வட்டக்கோட்டைக்கு கன்னியாகுமரியில் இருந்து சுற்றுலா படகு இயக்கப்பட சுற்றுலா ஆர்வலர்கள் கோரிக்க விடுத்துள்ளனர்.

    இந்தியாவின் தென் எல்லையில் அமைந்துள்ள சர்வதேச சுற்றுலாத் தலமான கன்னியாகுமரிக்கு மிக அருகில் வட்டக்கோட்டை என்ற பழங்காலத்து கடல் கோட்டை அமைந்துள்ளது. கிபி 18 ம் நூற்றாண்டில் பாண்டிய மன்னர்களின் ஆட்சிக் காலத்தில் கட்டப்பட்ட இந்த வட்டக்கோட்டை கடற்கரையை ஒட்டி அமைந்துள்ளது. எதிரி நாட்டிலிருந்து கடல் வழியாக படையெடுத்து வரும் கப்பல்களைக் கண்காணிப்பதற்காகவும், கடற்கொள்ளையர்களை கட்டுப்படுத்துவதற்காகவும் இந்தக் கோட்டைக் கட்டப்பட்டது. இந்தக் கோட்டை பிற்காலத்தில் திருவிதாங்கூர் சமஸ்தானத்தின் கட்டுப்பாட்டின் கீழ் வந்தது. திருவிதாங்கூர் சமஸ்தான மன்னர்கள் வந்து தங்கிச் செல்லும் இடமாகவும் ராணுவ வீரர்கள் தங்கி கடலைக் கண்காணிப்பதற்கான கோட்டை கொத்தளமாகவும் இந்த வட்டக்கோட்டை இருந்து வந்தது. இந்தியாவில் மன்னர்கள் ஆட்சி முடிவுக்கு வந்ததும் ராணுவத் தளமாக இருந்த இந்தக் கோட்டை மத்திய அரசின் தொல்லியல் துறையின் கட்டுப்பாட்டின் கீழ் கொண்டுவரப்பட்டது. இந்தக் கோட்டையின் மீது ஏறி நின்று பார்த்தால் குமரி கடலில் பெரும் பகுதியைப் பார்க்க முடியும். இதனால் இந்தப் பகுதி சுற்றுலாத்தலமாக மாற்றப்பட்டது. கன்னியாகுமரி மாவட்டம் சர்வதேச சுற்றுலாத் தலமாக உள்ளதால் அங்கு வரும் உள்நாட்டு, வெளிநாட்டு சுற்றுலாப் பயணிகள், வட்டக்கோட்டை சென்று பார்வையிட்டு வருகின்றனர். எனவே சர்வதேச சுற்றுலா தலமான கன்னியாகுமரியில் இருந்து வரலாற்று சிறப்புமிக்க வட்டக்கோட்டைக்கு கடல் மார்க்கமாக சுற்றுலா படகு போக்குவரத்து தொடங்க வேண்டும் என்ற கோரிக்கை வந்துள்ளது. கன்னியாகுமரி கடலின் நடுவே அமைந்துள்ள விவேகானந்தர் பாறை மற்றும் திருவள்ளுவர் சிலையை சுற்றுலா பயணிகள் நேரில் பார்த்து செல்வதற்காக தமிழக அரசால் படகு சேவை நடத்தப்பட்டு வருகிறது. இந்த படகினை விவேகானந்தர் நினைவு மண்டபத்துக்கு மட்டும் இயக்குவதோடு இல்லாமல் கடல் மார்க்கமாக இங்கிருந்து சுமார் ஆறு கிலோமீட்டர் தொலைவில் அமைந்துள்ள வரலாற்று சிறப்புமிக்க வட்டக்கோட்டை வரை இயக்க வேண்டும் என்ற சுற்றுலா ஆர்வலர்கள் கோரிக்கை வைத்து வருகின்றனர். இந்த படகு சேவை தொடங்கப்படும் பட்சத்தில் சுற்றுலாப் பயணிகளுக்கு சிறந்த பொழுதுபோக்கு அம்சமாக இருப்பதுடன் சுற்றுலாப் பயணிகளின் வருகையை அதிகரிக்கும். அரசுக்கு கூடுதல் வருவாய் கிடைக்கும் வாய்ப்பும் அமையும் என சமூக ஆர்வலர்கள் கோரிக்கை விடுத்துள்ளனர்

    News