" Work hard, stay humble, and follow your heart."

குறைந்த காற்றழுத்த தாழ்வுநிலை உருவானதால் குமரி மாவட்டத்தில் 2–வது நாளாக மழை

Views - 59     Likes - 0     Liked


  • குமரி கடல் முதல் தமிழகத்தின் வழியாக மத்தியபிரதேசம் வரை குறைந்த காற்றழுத்த தாழ்வு நிலை உருவாகியுள்ளதால் நேற்று முன்தினம் தமிழகத்தின் தென் மாவட்டங்களில் சில இடங்களில் மழை பெய்தது. இதேபோல் குமரி மாவட்ட பகுதிகளிலும் அதிகாலை மற்றும் காலை வேளைகளில் மழை பெய்தது.

    இந்த மழையினால் நாகர்கோவிலில் உள்ள அண்ணா விளையாட்டரங்க சுற்றுச்சுவர் இடிந்து விழுந்து நீச்சல்குளத்துக்குள் கழிவுநீர் புகுந்தது. ஒரு கடையின் சுவர் இடிந்து விழுந்து ஆட்டோ சேதம் அடைந்தது.

    அதேநேரத்தில் நேற்று முன்தினம் பகல் முழுவதும் கடுமையான வெயில் காணப்பட்டது. நேற்று அதிகாலை நேரங்களில் லேசான சாரல் மழை பெய்தது. நாகர்கோவில் நகரப்பகுதியிலும் இந்த மழை இருந்தது.

    குலசேகரத்தில்...


    நேற்று காலை 6 மணி வரையிலான 24 மணி நேரத்தில் சிற்றார்–2 அணைப்பகுதியில் 9.8 மில்லி மீட்டர், குருந்தங்கோடு பகுதியில் 1.2 மி.மீ., பாலமோர் பகுதியில் 1.2 மி.மீ. மழை பதிவானது.

    குலசேகரம் பகுதியில் நேற்று மதியம் வரை வெயில் இருந்தது. மதியத்திற்கு பிறகு, திடீரென வானில் கார் மேகம் சூழ்ந்து குளிர்ந்த காற்று வீசியது. தொடர்ந்து, மாலை 3 மணிஅளவில் பலத்த மழை பெய்ய தொடங்கியது. இந்த மழை சுமார் 45 நிமிடத்துக்கு மேல் பெய்ததால் சாலைகளில் வெள்ளம் பெருக்கெடுத்து ஓடியது. இதுபோல், திற்பரப்பு, பொன்மனை, பேச்சிப்பாறை ஆகிய பகுதிகளில் மழை பெய்தது.

    அணை நிலவரம்


    பேச்சிப்பாறை அணையின் நீர்ப்பிடிப்பு பகுதியில் இருந்து அணைக்கு நேற்றைய நிலவரப்படி வினாடிக்கு 221 கன அடி தண்ணீர் வந்தது. அணையில் இருந்து 210 கன அடி தண்ணீர் திறந்து விடப்படுகிறது. அணையின் நீர்மட்டம் தொடர்ந்து 3.90 அடியாக இருந்து வருகிறது. பெருஞ்சாணி அணைக்கு தண்ணீர் வரத்தும் இல்லை, வெளியேற்றமும் இல்லை. சிற்றார்–1 அணைக்கு 12 கன அடி தண்ணீர் வருகிறது. 12 கன அடி தண்ணீர் திறந்து விடப்படுகிறது. அணையின் நீர்மட்டம் 0.89 அடியாக உள்ளது.

    சிற்றார்–2 அணைக்கு 50 கன அடி தண்ணீர் வருகிறது. அணையில் இருந்து 50 கன அடி தண்ணீர் திறந்து விடப்படுகிறது. அணையின் நீர்மட்டம் 0.98 அடியாக உள்ளது. பொய்கை அணை நீர்மட்டம் 3 அடியாகவும், மாம்பழத்துறையாறு அணை நீர்மட்டம் 24.77 அடியாகவும் உள்ளன.

     

    News