" “Yesterday is history. Tomorrow is a mystery. .."

ஏழை பெண்களுக்கான இலவச கியாஸ் இணைப்புக்கு ‘ஆதார்’ கட்டாயம் மத்திய அரசு அறிவிப்பு

Views - 57     Likes - 0     Liked


  • ஏழை பெண்களுக்கான இலவச கியாஸ் இணைப்புக்கு ஆதார் அட்டை கட்டாயம் என்று அறிவிக்கப்பட்டுள்ளது.

    இலவச கியாஸ் இணைப்பு

    வறுமைக்கோட்டுக்கு கீழ் உள்ள ஏழை பெண்களுக்கு இலவச கியாஸ் இணைப்பு வழங்கும் வகையில் ‘பிரதம மந்திரி உஜ்வாலா யோஜனா’ திட்டம் கடந்த ஆண்டு தொடங்கப்பட்டது. இந்த திட்டத்தின் கீழ் 3 ஆண்டுகளுக்குள் 5 கோடி ஏழைகளுக்கு இலவசமாக கியாஸ் இணைப்பு வழங்க மத்திய அரசு திட்டமிட்டு உள்ளது.

    இந்த திட்டத்தில் விண்ணப்பிக்க ஆதார் அட்டை கட்டாயம் வேண்டும் என மத்திய அரசு தற்போது அறிவித்து உள்ளது. அவ்வாறு ஆதார் எண் இல்லாதவர்கள் மே மாதம் 31–ந் தேதிக்குள் ஆதார் அட்டைக்கு விண்ணப்பித்து, அதற்கான ரசீது அல்லது ஆதார் விண்ணப்ப நகலை இணைக்க வேண்டும் என மத்திய பெட்ரோலியம் மற்றும் இயற்கை எரிவாயுத்துறை அமைச்சகம் அறிவித்து உள்ளது.

    இப்படி ஆதார் அட்டை இல்லாமல் அதற்கு விண்ணப்பித்த ரசீது அல்லது விண்ணப்ப நகலுடன் இலவச எரிவாயு திட்டத்துக்கு விண்ணப்பிப்பவர்கள், அதனுடன் புகைப்படத்துடன் கூடிய வங்கி கணக்கு புத்தகம், வாக்காளர் அடையாள அட்டை, ரே‌ஷன் கார்டு, பான்கார்டு, பாஸ்போர்ட் போன்ற ஏதாவது ஒரு அரசு அடையாள ஆவணத்தின் நகலை கண்டிப்பாக இணைக்க வேண்டும் என்றும் மத்திய அரசு அறிவித்து உள்ளது.

    பயிர் காப்பீடு

    இதனிடைய விவசாயிகள் பயிர் காப்பீடு பெறுவதற்கும் ஆதார் கட்டாயம் என்று மத்திய அரசு அறிவித்து உள்ளது. அதன்படி அடுத்த மாதம் 1–ந் தேதி முதல் பயிர் சேதம், வறட்சி காரணமாக விவசாயிகள் பயிர் காப்பீடு பெற அவர்களிடம் இருந்து ஆதார் எண்ணை பெற நடவடிக்கை எடுக்க வேண்டும் என்று மத்திய விவசாய துறை அமைச்சகம் வங்கிகளுக்கு அறிவுறுத்தி உள்ளது.

    அவ்வாறு ஆதார் எண் இல்லாத விவசாயிகள் அதனை பெற ஏற்பாடு செய்து கொள்ளவும் கேட்டுக்கொள்ளப்பட்டு உள்ளனர். ஆதார் எண்ணை பெற்ற விவசாயிகள் அதனை வங்கிகளில் பதிவு செய்து கொள்ளவும் அறிவுறுத்தப்பட்டனர்.

    மதிய உணவு திட்டம்

    இதே போல் சுமார் 3 டஜன் திட்டங்களுக்கு ஆதார் அடையாள அட்டையை மத்திய அரசு கட்டாயம் ஆக்கி உள்ளது. அந்த வகையில் மதிய உணவு திட்டத்துக்கும், சர்வ சிக்ஷா அபியான் என்னும் அனைவருக்கும் கல்வி திட்டத்துக்கும் ஆதார் அடையாள அட்டை கட்டாயம் ஆக்கப்பட்டுள்ளது.

    இதற்கான அறிவிக்கையை மத்திய மனிதவள மேம்பாட்டுத்துறை அமைச்சகம் வெளியிட்டது. அதில் இந்த திட்டங்களில் ஜூன் 30–ந் தேதிக்குள் ஆதார் அடையாள எண்ணை இணைக்குமாறு கூறப்பட்டிருந்தது.

    கடும் எதிர்ப்பு

    இதனால் நாட்டில் மதிய உணவு திட்டத்தின்கீழ் பலன் அடைந்து வருகிற 10 கோடிக்கும் அதிகமான குழந்தைகளில், ஆதார் அட்டை பெறாத குழந்தைகள் பாதிக்கப்படும் நிலை உருவானது. ஆதார் அடையாள அட்டையை கொண்டு வந்து காட்டி பதிவு செய்து கொண்டால்தான் மதிய உணவு சாப்பிட முடியும் என்ற சூழல் ஏற்பட்டது.

    மதிய உணவு திட்டத்தின் கீழ் உணவு சாப்பிடுகிற பள்ளி குழந்தைகளுக்கு ஆதார் அடையாள அட்டை கட்டாயம் என்ற அரசின் முடிவுக்கு கடும் எதிர்ப்பு எழுந்தது. இதை காங்கிரஸ், திரிணாமுல் காங்கிரஸ், இடதுசாரி கட்சிகள் கடுமையாக விமர்சித்துள்ளன.

    நிறுத்திவைத்தது

    கடும் எதிர்ப்பால் மத்திய அரசு இப்போது அந்த உத்தரவை நிறுத்திவைத்து இருக்கிறது. இது தொடர்பாக மத்திய மந்திரிசபை செயலகம் நேற்று ஒரு அறிக்கை வெளியிட்டது.

    அந்த அறிக்கையில், ‘‘ஆதார் அடையாள எண் பெறுகிற வரையில் மாற்று அடையாள முறையின் கீழ் மதிய உணவு திட்ட பயனாளிகள் பலன் பெற முடியும்’’ என சுட்டிக்காட்டப்பட்டுள்ளது.

    News