" “Why fit in when you were born to stand out?”"

அக்டோபர் 20–ந்தேதிக்கு முன் வாங்கிய நிலத்தை பத்திரப்பதிவு செய்ய தடை நீங்கியது

Views - 53     Likes - 0     Liked


  • ‘தமிழகம் முழுவதும் விவசாய நிலங்கள் அனைத்தும் சட்டவிரோதமாக வீட்டுமனைகளாக மாற்றப்படுகின்றன.

    இதனால், விவசாயமும், விவசாய நிலங்களும் அழிந்து வருகின்றன. விவசாய நிலத்தில் வீட்டுமனைகள் அமைக்க சட்டப்படி முறையான அங்கீகாரங்களை பெறுவதில்லை. இந்த சட்டவிரோத வீட்டுமனைகளை தடையின்றி பத்திரப்பதிவுத்துறை அதிகாரிகள் பதிவு செய்கின்றனர்.

    ஆனால், ஒரு ஏக்கர் நிலத்தை வீட்டுமனையாக மாற்றும்போது, சாலை, தெருவிளக்கு, கழிவுநீர் கால்வாய் உள்ளிட்ட அடிப்படை வசதிகளை செய்யவேண்டும். இந்த வசதிகளை செய்ய, ஒரு ஏக்கர் நிலத்துக்கு ரூ.20 லட்சம் செலவு செய்யவேண்டும். ஆனால், இந்த தொகையை செலவு செய்யாமல், வீட்டுமனைகள் உருவாக்கப்படுகின்றன’.  இவ்வாறு அந்த மனுவில் கூறியிருந்தார்.

    பத்திரப்பதிவுக்கு தடை

    மேலும், ‘தற்போது உள்ள வீட்டுமனைகளை தமிழக அரசு வரையறை செய்தாலும், அந்த வீட்டு மனைகள் அமைந்துள்ள பகுதியில் அடிப்படை வசதிகளை செய்ய அரசுக்கு பல ஆயிரம் கோடி ரூபாய் செலவு ஆகும்’ என்றும் அந்த மனுவில் கூறியிருந்தார்.

    இந்த பொதுநல வழக்கை கடந்த ஆண்டு செப்டம்பர் மாதம் 9–ந் தேதி விசாரித்த, அப்போதைய தலைமை நீதிபதி சஞ்சய்கி‌ஷன் கவுல், நீதிபதி ஆர்.மகாதேவன் ஆகியோர், அங்கீகாரம் இல்லாத வீட்டு மனைகளை பத்திரப்பதிவு செய்ய தடைவிதித்து உத்தரவிட்டனர். மேலும், அந்த உத்தரவில், ‘இந்த சட்டவிரோதமான, அங்கீகாரமற்ற வீட்டுமனைகளை எவ்வாறு வரையறை செய்யப்படும் என்பது குறித்து தமிழக அரசு ஒருங்கிணைந்த திட்டத்தை உருவாக்கி அறிக்கையை தாக்கல் செய்யவேண்டும்’ என்றும் கூறியிருந்தனர்.

    சட்டத்திருத்தம்

    ஐகோர்ட்டின் இந்த உத்தரவினால், தமிழகம் முழுவதும் ரியல் எஸ்டேட் தொழில் கடுமையாக பாதிக்கப்பட்டன. அதனால், இந்த தடையை நீக்கவேண்டும் என்று ரியல் எஸ்டேட் தொழிலதிபர்கள் பலர் ஐகோர்ட்டில் மனு தாக்கல் செய்தனர்.

    இதற்கிடையில், கடந்த 2016–ம் ஆண்டு அக்டோபர் மாதம் 20–ந் தேதி, தமிழ்நாடு நகரமைப்பு சட்டம், பிரிவு 22(ஏ)–வில் தமிழக அரசு சட்டத்திருத்தம் கொண்டுவந்து, ஒரு அரசாணையை வெளியிட்டது. அதில், அக்டோபர் 20–ந் தேதிக்கு முன்பு விற்பனை செய்யப்பட்ட அங்கீகாரம் இல்லாத வீட்டு மனைகளை மறு விற்பனை செய்யலாம் என்றும், புதிதாக உருவாக்கப்பட்டுள்ள வீட்டு மனைகளை விற்பனை செய்ய தடைவிதித்தும் உத்தரவிட்டிருந்தது.

    அந்த அரசாணையை, ஐகோர்ட்டிலும் தமிழக அரசு தாக்கல் செய்தது. ஆனால், இந்த அரசாணையை நீதிபதிகள் ஏற்றுக்கொள்ளவில்லை.

    தடை நீக்க முடியாது

    அங்கீகாரம் இல்லாத வீட்டு மனைகளை வரையறை செய்ய ஒருங்கிணைந்த திட்டத்தை தமிழக அரசு உருவாக்கி, அறிக்கை தாக்கல் செய்யவேண்டும். அதுவரை தடையை நீக்க முடியாது என்று உத்தரவிட்டனர். இதன்பின்னர், ஒவ்வொரு முறையும் இந்த வழக்கு விசாரணைக்கு வரும்போதெல்லாம், ஒருங்கிணைந்த அறிக்கையை தாக்கல் செய்ய தமிழக அரசு காலஅவகாசம் கேட்டு வந்தது.

    இந்தநிலையில், இந்த வழக்கு தலைமை நீதிபதி (பொறுப்பு) ஹூலுவாடி ஜி.ரமேஷ், நீதிபதி ஆர்.எம்.டி.டீக்காராமன் ஆகியோர் முன்பு நேற்று விசாரணைக்கு வந்தது. அப்போது, அரசு தரப்பில் அட்வகேட் ஜெனரல் ஆர்.முத்துகுமாரசாமி, மனுதாரர் யானை ராஜேந்திரன் உள்பட பல வக்கீல்கள் ஆஜராகி வாதிட்டார்கள். ரியல் எஸ்டேட் தொழிலதிபர்கள் ஏராளமானோர் கோர்ட்டில் குவிந்து இருந்தனர்.

    உத்தரவு மாற்றி அமைப்பு

    அனைத்து தரப்பு வக்கீல்களின் வாதங்களை கேட்டறிந்த நீதிபதிகள் பிறப்பித்த உத்தரவில் கூறியிருப்பதாவது:–

    அங்கீகாரம் இல்லாத வீட்டு மனைகளை பத்திரப்பதிவு செய்ய இந்த ஐகோர்ட்டு கடந்த ஆண்டு செப்டம்பர் 9–ந் தேதி தடைவிதித்து உத்தரவிட்டது. இந்த தடை உத்தரவு பிறப்பிக்கப்பட்டவுடன், தமிழக அரசு, நகரமைப்பு சட்டத்தின் கீழ் சட்டதிருத்தம் கொண்டுவந்துள்ளது. அதில், அங்கீகாரம் இல்லாத வீட்டுமனைகள் ஏற்கனவே விற்பனை செய்யப்பட்டிருந்தால், அந்த வீட்டு மனைகளை மறு விற்பனை செய்யலாம். ஆனால், அங்கீகாரம் இல்லாமல் புதிதாக உருவாக்கப்பட்ட வீட்டு மனைகளை விற்பனை செய்வதற்கும், அதை பத்திரப்பதிவு செய்வதற்கும் தடைவிதிப்பதாக கூறியுள்ளது. இந்த சூழ்நிலையில், கடந்த ஆண்டு செப்டம்பர் 9–ந் தேதி இந்த ஐகோர்ட்டு பிறப்பித்த தடைஉத்தரவை மாற்றியமைக்கிறோம்.

    மறுவிற்பனை

    அதாவது, அங்கீகாரம் இல்லாத வீட்டு மனைகளை கடந்த ஆண்டு அக்டோபர் 20–ந் தேதிக்கு முன்பு ஏற்கனவே விற்பனை செய்திருந்தால், அதை மறுவிற்பனை செய்யலாம்.

    அதேநேரம், விற்பனை செய்யப்படாத அங்கீகாரம் இல்லாத வீட்டு மனைகளை பொறுத்தவரை, அதை பத்திரப்பதிவு செய்யக்கூடாது. அப்படிப்பட்ட வீட்டு மனைகளை பத்திரப்பதிவு செய்ய விதிக்கப்பட்ட தடை நீட்டிக்கப்படுகிறது. இந்த வழக்கு விசாரணையை வருகிற ஏப்ரல் 11–ந் தேதிக்கு தள்ளிவைக்கிறோம்.  இவ்வாறு நீதிபதிகள் உத்தரவில் கூறியுள்ளனர்.

    ஐகோர்ட்டு உத்தரவை தொடர்ந்து அக்டோபர் 20–ந்தேதிக்கு முன்பு விற்பனை செய்யப்பட்ட வீட்டு மனையை மீண்டும் விற்பனை செய்ய முடியும். இந்த மனைகளை பத்திரப்பதிவு செய்வதற்கு இருந்த தடையும் நீங்கி இருக்கிறது.

    News