" “Yesterday is history. Tomorrow is a mystery. .."

தமிழ்நாடு முழுவதும் சீமை கருவேல மரங்களை அகற்ற தடை; சென்னை ஐகோர்ட்டு உத்தரவு

Views - 68     Likes - 0     Liked


  • சீமை கருவேல மரங்களை அகற்ற உத்தரவு

    அந்த வழக்குகளை விசாரித்த நீதிபதிகள் ஏ.செல்வம், பொன்.கலையரசன் ஆகியோர் கடந்த டிசம்பர் மாதம் 20–ந்தேதி பிறப்பித்த உத்தரவில், மதுரை ஐகோர்ட்டுக்கு உட்பட்ட 13 மாவட்ட தலைநகரங்களிலும் சாலை ஓரங்கள், நீர்நிலைகள், காலிமனைகள், தனியார் நிலங்கள் போன்ற பகுதிகளில் இருக்கும் சீமை கருவேல மரங்களை உடனடியாக அகற்ற வேண்டும் என்று கூறி இருந்தனர்.

    அதன்பின்னர் கடந்த ஜனவரி மாதம் இந்த வழக்கு விசாரணைக்கு வந்தபோது, தமிழகம் முழுவதும் உள்ள சீமை கருவேல மரங்களை அகற்றும்படி அந்தந்த மாவட்ட கலெக்டர்களுக்கு மதுரை ஐகோர்ட்டு உத்தரவிட்டது. மேலும் இதுதொடர்பான தனிச்சட்டத்தை நிறைவேற்ற வேண்டும் என்றும் அரசுக்கு உத்தரவு பிறப்பித்தது.

    சென்னை ஐகோர்ட்டில் வழக்கு

    இந்தநிலையில் சீமை கருவேல மரங்களை அகற்றுவதற்கு எதிராக வி.மேகநாதன் என்ற வக்கீல் சென்னை ஐகோர்ட்டில் பொதுநல மனு ஒன்றை தாக்கல் செய்து உள்ளார்.

    அந்த மனுவில் கூறப்பட்டு இருப்பதாவது:–

    சீமை கருவேல மரம் பல்வேறு நாடுகளில் உள்ளது. தமிழகத்தில் இந்த மரம் ஏராளமாக உள்ளது. குறிப்பாக வறட்சிப்பகுதிகளில் இந்த மரம் அதிக அளவில் வளருகிறது. இந்த மரம், எரிபொருளாகவும், நிழல் தரும் மரமாகவும் திகழ்கிறது. மண்ணின் உறுதித்தன்மையை பாதுகாக்கவும், காற்றின் வேகத்தை குறைப்பதற்கும் இந்த மரம் உதவியாக இருக்கிறது. பெரும்பாலான கிராமப்புறங்களில், இந்த மரத்தை விறகாக பயன்படுத்துகின்றனர். இந்த மரத்தை வெட்டி விறகாக விற்பனை செய்பவர்களுக்கு வருமானம் கிடைக்கிறது.

    கருவேலம் மரம் வளர்வதால், சுற்றுச்சூழல் பாதிக்கப்படுகிறது என்பது அறிவியல்பூர்வமாக நிரூபிக்கப்படவில்லை. இந்த மரம், வணிக ரீதியாக பயன்படுத்தப்படுகிறது. உலகத்துக்கு ஒரு பசுமை போர்வையாக இருந்து வருகிறது.

    மருத்துவ குணம்

    அதுமட்டுமல்லாமல் கால்நடைகளுக்கு தீவனமாகவும், வனவிலங்குகளுக்கு உணவாகவும் இந்த மரம் உள்ளது. அத்துடன் காகிதம், அட்டை தயாரிக்கவும், மரச்சாமான்கள் செய்வதற்கும், நிலங்களுக்கு வேலியாகவும் பயன்படுகிறது.

    இந்த மரத்தில் மருத்துவ குணங்களும் உள்ளன. இந்த மரம் எங்கெல்லாம் வளர்கிறதோ, அந்த நிலத்தில் நைட்ரஜன், கந்தகம் வளங்கள் அதிகரிக்கின்றன. இந்த மரம் கட்டுப்படுத்த முடியாத அளவுக்கு பல இடங்களில் பரவி வளர்ந்து, சுற்றுச்சூழலுக்கு பாதிப்பு ஏற்படுத்துவதாக கூறினாலும், இதை முற்றிலுமாக ஒரேநாளில் அழிக்க முடியாது. இதற்கு அறிவியல் பூர்வமான விதிமுறைகள் வேண்டும். இந்த மரத்தை திடீரென ஒரேநாளில் முற்றிலுமாக அழிப்பது, கிராம மக்களுக்கு பாதிப்பை ஏற்படுத்தும். மண்ணின் ஸ்திரத்தன்மையை உறுதி செய்யும் இந்த மரத்தை வெட்டுவதால் மண்ணுக்கும் பாதிப்பு ஏற்படும்.

    நிலச்சரிவு ஏற்பட வாய்ப்பு

    மலைப்பகுதிகளில் உள்ள இந்த மரத்தை வெட்டுவதால், மழைக்காலங்களில் நிலச்சரிவு ஏற்பட வாய்ப்பு உள்ளது. நிழல் தரக்கூடிய வகையில் மாற்று மரங்களை நடாமல், இந்த சீமை கருவேல மரங்களை வெட்டுவதை ஏற்க முடியாது. அறிவியல்பூர்வமான ஆய்வுகளை மேற்கொண்ட பின்னரே, இந்த மரங்களை வெட்டவேண்டும்.

    இந்த மரம் தடை செய்யப்பட்டது என்று அறிவிக்கும் விதமாக எந்த ஒரு சட்டமும் இல்லை. அதனால், இந்த மரத்தை அகற்ற வேண்டும் என்று ஐகோர்ட்டு மதுரை கிளை பிறப்பித்த உத்தரவு சட்டபூர்வமானது கிடையாது. இந்த உத்தரவின் காரணமாக, தற்போது உள்ள சுற்றுச்சூழலுக்கும், இந்த மரத்தை சார்ந்து இருக்கும் மக்களுக்கும் பெரும் பாதிப்பை ஏற்படுத்துகிறது. எனவே, சீமை கருவேல மரத்தை வெட்டுவதாக இருந்தால், அதுகுறித்து சட்டம் இயற்ற வேண்டும்.

    நிபுணர்கள் குழு

    சென்னை, கிண்டியில் 630 ஏக்கர் நிலப்பரப்பில் ஐ.ஐ.டி. மற்றும் சிறுவர் பூங்கா உள்ளது. இங்கு ஏராளமான மரங்கள் உள்ளன. அதுமட்டுமல்லாமல், புள்ளிமான், குரங்கு, உடும்பு, நட்சத்திர ஆமை, பாம்பு, 120 வகையான பறவை இனங்களும், 60 வகையான வண்ணத்துப்பூச்சிகளும், 300 வகையான மரங்களும் உள்ளன. இங்கு ஏராளமான சீமை கருவேல மரங்களும் உள்ளன.

    கடந்த டிசம்பர் மாதம் தாக்கிய ‘வார்தா’ புயலினால், இந்த வளாகத்தில் ஆயிரக்கணக்கான மரங்கள் சாய்ந்து விழுந்தன. தற்போது சீமை கருவேல மரங்களையும் வெட்டத் தொடங்கினால், அங்கு சுற்றுச்சூழல் பெரிதும் பாதிக்கப்படும்.

    சீமை கருவேல மரங்களை வெட்டுவதற்கு ஐகோர்ட்டு மதுரை கிளை உத்தரவிட்டு இருப்பது காடுகளை அழிப்பதற்கு சமமானது ஆகும்.

    எனவே, தமிழகத்தில் சீமை கருவேல மரங்களை அகற்றுவதற்கு தடை விதிக்கவேண்டும். அதை அகற்றுவதால் ஏற்படக்கூடிய பாதிப்பை ஆய்வுசெய்ய ஒரு நிபுணர்கள் குழுவை அமைத்து அறிக்கை தாக்கல் செய்ய அரசுக்கு உத்தரவிட வேண்டும்.  இவ்வாறு அந்த மனுவில் கூறப்பட்டு உள்ளது.

    அகற்ற தடை

    இந்த மனு தலைமை நீதிபதி இந்திரா பானர்ஜி, நீதிபதி எம்.சுந்தர் ஆகியோர் முன்பு நேற்று விசாரணைக்கு வந்தது.

    மனுவை விசாரித்த நீதிபதிகள் பிறப்பித்த உத்தரவு வருமாறு:–

    சீமை கருவேல மரங்களை அகற்ற வேண்டும் என்று இரண்டு நீதிபதிகளை கொண்ட அமர்வு ஏற்கனவே உத்தரவிட்டுள்ளதால், இந்த வழக்கை 3 நீதிபதிகள் அடங்கிய அமர்வு விசாரிக்கும். அதேநேரம், இந்த மனுவுக்கு வருகிற மே 11–ந்தேதிக்குள் ஐ.ஐ.டி. இயக்குனர் பதில் அளிக்க வேண்டும். அதுவரை சீமை கருவேல மரங்களை அகற்ற எந்த ஒரு நடவடிக்கையும் தமிழக அரசு எடுக்கக்கூடாது.

    இந்த வழக்கு விசாரணையை வருகிற மே 11–ந்தேதிக்கு தள்ளிவைக்கிறோம்.  இவ்வாறு நீதிபதிகள் தங்கள் உத்தரவில் கூறி உள்ளனர்.

    News