" “Not only must we be good, but we must also be good for something.” – Henry David Thoreau"

ரேங்க்’ பட்டியல் வெளியிடாததால் வெறிச்சோடிய பள்ளிக்கூடங்கள்

Views - 57     Likes - 0     Liked


  • பிளஸ்–2 தேர்வு முடிவுகள் நேற்று வெளியானது. ‘ரேங்க்’ பட்டியல் வெளியிடாதது மற்றும் மாணவர்களின் செல்போன்களுக்கு எஸ்.எம்.எஸ். மூலம் மதிப்பெண்கள் அனுப்பப்பட்டதன் எதிரொலியாக பள்ளிக்கூடங்கள் மாணவர்கள் இன்றி வெறிச்சோடி காணப்பட்டன.
     
    ‘ரேங்க்’ பட்டியல் 
     
    பிளஸ்–2 மாணவர்களின் தேர்வு முடிவுகள், அரசு தேர்வுகள் இயக்ககத்தினால் நேற்று வெளியிடப்பட்டது. வழக்கமாக தேர்வு முடிவுகள் வெளியிடப்பட்டதும், மாவட்ட அளவில் முதல் இடம் பிடித்த மாணவர்கள், மாநில அளவில் முதல் இடம் பிடித்த மாணவர்களின் ‘ரேங்க்’ பட்டியல்கள் வெளியிடப்படும். மேலும் பாடங்கள் வாரியாக அதிக மதிப்பெண்கள் பெற்றவர்களின் பட்டியலும் வெளியிடப்படும்.
     
    இதைத் தொடர்ந்து, பள்ளி அளவில் அதிக மதிப்பெண் பெற்ற மாணவ–மாணவிகள், மாவட்ட அளவில் அதிக மதிப்பெண் பெற்ற மாணவ–மாணவிகள், மாநில அளவில் அதிக மதிப்பெண் பெற்ற மாணவ–மாணவிகள் தங்களின் பள்ளிகளுக்கு வருகை புரிவார்கள். அவர்களை பள்ளி தாளாளர், முதல்வர், தலைமை ஆசிரியர் போன்றோர் வாழ்த்துவார்கள்.
     
    கூட்டம் அதிகமாக காணப்படும் 
     
    பள்ளியில் பயின்ற சக மாணவ–மாணவிகளும் அதிக அளவில் வருகைபுரிந்து, தங்கள் பள்ளியில் அதிக மதிப்பெண் பெற்ற மாணவ–மாணவிகளை வாழ்த்தி கேக் மற்றும் இனிப்புகள் வழங்கி கொண்டாடுவார்கள். மாணவ–மாணவிகளின் பெற்றோரும் பள்ளிகளுக்கு வந்து தங்கள் பிள்ளைகள் பெற்ற மதிப்பெண்களை பார்வையிடுவதுடன், சக மாணவ–மாணவிகள் பெற்ற மதிப்பெண்களை கேட்டறிந்து அவர்களுக்கும் வாழ்த்துகள் மற்றும் அறிவுரைகள் வழங்குவார்கள்.
     
    இது ஒருபுறம் இருக்க, இணையதளத்தில் தேர்வு முடிவுகளை பார்ப்பதற்கு சிரமப்படும் மாணவ–மாணவிகள் தங்கள் மதிப்பெண்களை தங்கள் பள்ளிகளில் சென்று பார்ப்பது வழக்கம். இதனால், தேர்வு முடிவுகள் வெளியிடப்படும் தினத்தில், பள்ளிகளில் மாணவ–மாணவிகளின் கூட்டம் அதிகமாக காணப்படும்.
     
    பள்ளிகள் வெறிச்சோடின 
     
    ஆனால், இந்த முறை முதல் இடங்கள் பெற்ற மாணவ–மாணவிகளின் ‘ரேங்க்’ பட்டியல் வெளியிடப்படவில்லை. மேலும், மாணவர்களின் செல்போன்களுக்கும் மதிப்பெண்கள் அனுப்பி வைக்கப்பட்டன. இதனால், மாணவ–மாணவிகள் தங்களின் மதிப்பெண்களை வீட்டில் இருந்தபடியே தெரிந்து கொண்டனர்.
     
    மேலும், ‘ரேங்க்’ பட்டியல் வெளியிடப்படாததால், மாணவர்கள் பள்ளிக்கு வந்து அதிக மதிப்பெண் பெற்ற மாணவ–மாணவர்களை வாழ்த்த வேண்டும் என்ற எண்ணம் இன்றி, தங்களின் அடுத்தகட்ட செயல்பாடுகளில் இறங்க தொடங்கிவிட்டனர். இதனால், பிளஸ்–2 தேர்வு முடிவுகள் வெளியிடப்பட்ட தினமான நேற்று, பள்ளிகள் அனைத்தும் மாணவ–மாணவிகள் கூட்டம் இன்றி வெறிச்சோடி காணப்பட்டன.
     
    எனினும், அதிக மதிப்பெண் பெற்ற மாணவ–மாணவிகள் மட்டும் தங்கள் பள்ளியில் தங்களின் ‘ரேங்க்’ என்ன, தங்களுடன் போட்டி போட்டு பயின்ற மாணவ–மாணவிகள் என்ன மதிப்பெண் பெற்றுள்ளனர் என்பதை ஒப்பிட்டு பார்த்து தெரிந்துகொள்வதற்காக பள்ளிகளுக்கு வந்து சென்றனர்.
     

     

    News