" Work hard, stay humble, and follow your heart."

பிளஸ்-1 வகுப்புக்கு பொதுத்தேர்வு அமைச்சர் செங்கோட்டையன் அறிவிப்பு

Views - 59     Likes - 0     Liked


  • பாடதிட்டங்களை மாற்றுவது குறித்து 2 நாட்களில் அரசு ஆணை வெளியிடப்படும் என்றும், பிளஸ்-1 வகுப்புக்கு இனிமேல் பொதுத்தேர்வு நடத்தப்படும் என்றும் அமைச்சர் செங்கோட்டையன் அறிவித்து உள்ளார்.
     
    ஆய்வுக்கூட்டம்
     
    முதன்மை கல்வி அலுவலர்கள், மாவட்ட தொடக்கக்கல்வி அலுவலர்கள் மற்றும் மெட்ரிக் பள்ளி ஆய்வாளர்களுக்கான ஆய்வுக்கூட்டம் சென்னை நுங்கம்பாக்கத்தில் உள்ள தமிழ்நாடு பாடநூல் மற்றும் கல்வியியல் பணிகள் கழக அலுவலக கட்டிடத்தில் நேற்று நடைபெற்றது.
     
    கூட்டத்துக்கு பள்ளிக்கல்வி துறை அமைச்சர் செங்கோட்டையன் தலைமை தாங்கினார். இதில் பள்ளிக்கல்வித்துறை செயலாளர் உதயச்சந்திரன், பள்ளிக்கல்வித்துறை இயக்குனர் இளங்கோவன், தொடக்கக்கல்வி இயக்குனர் கார்மேகம், அனைவருக்கும் இடைநிலை கல்வித் திட்ட மாநில திட்ட இயக்குனர் கண்ணப்பன், அனைவருக்கும் கல்வித் திட்டம் மாநில திட்ட இயக்குனர் பூஜா குல்கர்ணி, தமிழ்நாடு பாடநூல் மற்றும் கல்வியியல் பணிகள் கழக மேலாண்மை இயக்குனர் ஜெகநாதன், பள்ளி சாரா மற்றும் வயது வந்தோர் கல்வி திட்ட இயக்குனர் ராமேஸ்வர முருகன், மாநில கல்வியியல் ஆராய்ச்சி மற்றும் பயிற்சி நிறுவன இயக்குனர் அறிவொளி உள்பட அதிகாரிகள் பலர் கலந்து கொண்டனர்.
     
    கூட்டம் முடிந்து வெளியே வந்த அமைச்சர் செங்கோட்டையன் நிருபர்களுக்கு பேட்டி அளித்தார்.
     
    அப்போது அவர் கூறியதாவது:-
     
    பாடங்கள் மாற்றம்
     
    பள்ளி கல்வித்துறையில் பல்வேறு மாற்றங்கள் செய்யப்பட வேண்டும் என்ற நிலையில் தற்போது இந்த ஆய்வுக்கூட்டம் நடைபெறுகிறது. பள்ளிகளை தூய்மையாக வைக்க வேண்டும். அனைத்து பள்ளிகளிலும் நவீன கழிப்பறை வசதி ஏற்படுத்தி தரவேண்டும். மாணவர்களின் எண்ணிக்கையை அதிகரிக்க வேண்டும் என்பது தான் இதன் முக்கிய நோக்கம் ஆகும்.
     
    சிறந்த மாணவர்களை உருவாக்க யோகா, சாலைவிதிகள், தேசப்பற்று, மனிதநேயம், உடற்பயிற்சி போன்ற பல்வேறு பாடங்களை ஒன்றாக இணைத்து செயல்படுத்த இந்த ஆய்வுக்கூட்டம் உபயோகமாக இருக்கும். எதிர்கால மாணவர்களின் நலனை கருத்தில் கொண்டு, மத்திய அரசு உருவாக்கி இருக்கிற ‘நீட்’ தேர்வுக்கு மாணவர்களை எப்படி தயார் செய்வது? என்ற முறையில், 12 ஆண்டுகாலம் மாற்றப்படாமல் இருக்கும் பாடங்களை மாற்ற இருக்கிறோம். அதை மாற்றி அமைக்க 2 நாட்களுக்குள் அனுமதி வழங்க இருக்கிறோம்.
     
    மிகப்பெரிய புரட்சி
     
    எந்தெந்த பாடங்களை எந்த ஆண்டுகளில் மாற்ற வேண்டும்? என்ற உத்தரவை வழங்க இருக்கிறோம். முதல்-அமைச்சரிடம் இது தொடர்பாக கலந்துரையாடி முடிவு மேற்கொள்ளப்பட்டுள்ளது. மாணவர்களின் முன்னேற்றத்துக்கான பல்வேறு நலத்திட்டங்களை அரசு செய்ய இருக்கிறது.
     
    6-ம் வகுப்பு படிக்கும் மாணவர்களுக்கு 2 அல்லது 3 ஆண்டுகளுக்குள் பள்ளிகளில் முழுவதும் கணினி மயமாக்கல் நடவடிக்கை எடுக்கப்பட்டு வருகிறது. தேர்ச்சி எண்ணிக்கையில் மற்ற மாநிலங்களை காட்டிலும் நாம் அதிகமாகத் தான் இருக்கிறோம்.
     
    மாணவர்கள் நலனை மனதில் கொண்டு 32 மாவட்டங்களில் நூலகங்களில் ஐ.ஏ.எஸ்., ஐ.பி.எஸ். போன்ற பயிற்சி தேர்வுகளுக்கு தயாராக அவர்களுக்கு தேவையான பாடநூல்கள் வழங்கவும் தயாராக இருக்கிறோம். இதற்காக ரூ.2.13 கோடி நிதி ஒதுக்கப்பட்டு இருக்கிறது. தமிழகத்தில் கல்வித்துறையில் மிகப்பெரிய புரட்சி விரைவில் உருவாகப் போகிறது.
     
    இவ்வாறு அவர் கூறினார்.
     
    ‘நீட்’ தேர்வு
     
    இதையடுத்து நிருபர்கள் கேட்ட கேள்விகளும், அவற்றுக்கு அவர் அளித்த பதில்களும் வருமாறு:-
     
    கேள்வி:- மத்திய அரசு ‘நீட்’ தேர்வில் தமிழகத்துக்கு விலக்கு அளிக்க முடியாது என்று தெரிவித்துள்ளது. இந்த பிரச்சினையில் அடுத்தக்கட்ட நடவடிக்கை என்ன?
     
    பதில்:- எங்களை பொறுத்தவரையில் கடிதங்கள் அனுப்பப்பட்டு உள்ளது. பிரதமரை, முதல்-அமைச்சர் 3 முறை தொடர்ந்து வலியுறுத்தி இருக்கிறார். எங்கள் முயற்சிகள் வலியுறுத்தப்பட்டு இருக்கிறது.
     
    கேள்வி:- பாடதிட்டத்தை மாற்றுவது தொடர்பாக பல்வேறு விமர்சனங்கள் இருக்கிறதே?
     
    பதில்:- 2 தினங்களுக்கு முன்பு கல்வியாளர்களை வைத்து ஆய்வு நடத்தப்பட்டது. அந்த ஆய்வின் அடிப்படையில் 2 நாட்களில் எந்தெந்த ஆண்டில், எந்தெந்த வகுப்புகளுக்கு பாடதிட்டத்தில் மாற்றங்களை உருவாக்க போகிறோம்? என்பதை அரசு ஆணையாக வெளியிட இருக்கிறோம்.
     
    பிளஸ்-1 பொதுத்தேர்வு
     
    கேள்வி:- இலவச பாடபுத்தகங்கள், இலவச பொருட்கள் எப்போது வினியோகிக்கப்படும்?
     
    பதில்:- எல்லாம் தயார் நிலையில் இருக்கிறது. உடனடியாக வழங்க ஏற்பாடு செய்து வருகிறோம். பள்ளி தொடங்கிய முதல் வாரத்திலேயே அதை வழங்க நடவடிக்கை எடுக்கப்படும்.
     
    கேள்வி:- மறைந்த முதல்-அமைச்சர் ஜெயலலிதாவின் உருவப்படம் அதில் பொறிக்கப்பட்டு இருக்குமா?
     
    பதில்:- இந்த ஆண்டும் ஜெயலலிதாவின் உருவப்படம் இருக்கும்.
     
    கேள்வி:- பிளஸ்-1 வகுப்புக்கு பொதுத்தேர்வு இந்த ஆண்டு நடத்தப்படுமா?
     
    பதில்:- பிளஸ்-1 வகுப்புக்கு வருகிற ஆண்டு முதல் பொதுத்தேர்வு நடத்தப்படும்.
     
    பள்ளிகள் திறப்பு எப்போது?
     
    கேள்வி:- பள்ளிகளின் தரத்தை உயர்த்த நடவடிக்கை எடுக்கப்பட்டுள்ளதாக கூறப்படுகிறதே?
     
    பதில்:- 150 நடுநிலைப்பள்ளிகளை உயர்நிலைப்பள்ளிகளாகவும், 100 உயர்நிலைப்பள்ளிகளை மேல்நிலைப்பள்ளிகளாகவும் என மொத்தம் 250 பள்ளிகள் தரம் உயர்த்தப்பட உள்ளன. முதல்-அமைச்சரின் நிதிநிலை அறிக்கையின் போது அது அறிவிக்கப்படும்.
     
    கேள்வி:- வெயிலின் தாக்கம், வறட்சி அதிகமாக இருக்கிறது. இதன் காரணமாக பள்ளிகள் திறக்கப்படும் திறப்பு தேதி தள்ளிவைக்கப்படுமா?
     
    பதில்:- கோடைவெயிலை கருத்தில் கொண்டு கடந்த மாதம் (ஏப்ரல்) 21-ந்தேதியில் இருந்து விடுமுறை அளித்தோம். வெயிலின் தாக்கத்தை பொறுத்தும், பெற்றோர்களின் ஆலோசனையை கேட்டும் பள்ளிகளை திறப்பது குறித்து பின்னர் அறிவிப்போம்.
     
    இவ்வாறு அவர் பதில் அளித்தார்.
     
    பின்னர் அமைச்சர் செங்கோட்டையன் தலைமைச் செயலகத்தில் நிருபர்களுக்கு அளித்த பேட்டியின் போது கூறியதாவது:-
     
    கூடுதல் சுமை அல்ல
     
    3 ஆண்டுகளில் எந்தெந்த பாடநூல்களை மாற்ற வேண்டும் என்பது பற்றி பரிசீலிக்கப்பட்டு வருகிறது. பாடதிட்டங்களை மாற்றி அமைக்க அமைக்கப்பட்டுள்ள உயர்மட்ட குழுவில் முன்னாள் துணைவேந்தர்கள், அமைச்சர்கள், தலைமைச் செயலாளர், கல்வித்துறை செயலாளர் ஆகியோர் இடம்பெற்று உள்ளனர்.
     
    10-ம் வகுப்பு, பிளஸ்-1, பிளஸ்-2 என்று தொடர்ந்து 3 ஆண்டுகள் பொதுத்தேர்வு எழுதுவது மாணவர்களுக்கு கூடுதல் சுமை அல்ல. மாணவர்கள் எதிர்காலத்தில் நல்ல கல்வியை கற்பதற்கும், கல்லூரிக்கு செல்லும்போது சிறந்த மாணவர்களாக விளங்குவதற்கும் இது பயனுள்ளதாக இருக்கும்.
     
    அரசு பள்ளிகளில் சேர்க்கை விகிதத்தை அதிகரிக்க பல்வேறு முயற்சிகள் மேற்கொள்ளப்பட்டு வருகின்றன.
     
    பள்ளிகளில் தூய்மை என்ற முறையில், 2 மாதங்களுக்கு ஒரு முறை 100 நாள் வேலைவாய்ப்பு திட்டத்தில் பணிபுரிபவர்களை பள்ளிகளுக்கு வரவழைத்து சுத்தம் செய்ய திட்டமிடப்பட்டு உள்ளது.
     
    இவ்வாறு அவர் கூறினார்.
    News